ការធ្លាក់ស ដែលតែងកើតឡើងចំពោះស្រ្តី បានចែកចេញជា២ប្រភេទ។ ដែលប្រភេទទី១ ជាប្រភេទសធម្មជាតិ និងមួយប្រភេទទៀត ជាប្រភេទសខុសធម្មតាដែលបង្កជំងឺដល់ស្ត្រី។ ការធ្លាក់សមិនធម្មតាប្រភេទបង្កជំងឺ ប្រសិនបើទុកកាន់តែយូរអាចបង្កជាការរលាកទ្វារមាស អាចរលាកមាត់ស្បូន រលាកអាងត្រគៀក ព្រមទាំងអាចធ្វើឱ្យឆ្លងជំងឺកាមរោគចំនួនទៀតផងដែរ។

ធ្វើដូចម្តេចទើបអាចសម្គាល់ថា ជាការធ្លាក់សធម្មជាតិ និងការធ្លាក់សបង្កគ្រោះថ្នាក់? តាមការចែករំលែកពីអ្នកគ្រូពេទ្យ យន់ សូដា ឯកទេសឆ្មបនិងរោគស្រ្តី ព្រមទាំងជាស្ថាបនិក បន្ទប់ពិគ្រោះនិងព្យាបាលជំងឺស្មាយឃែរ បានប្រាប់ពីវិធីសម្គាល់ ដែលស្ត្រីអាចតាមដានដោយខ្លួនឯងបានដូចខាងក្រោម៖ 

ការធ្លាក់សរធម្មជាតិ ៖ ជាទូទៅ អាចធ្លាក់មុនពេលមករដូវ ពាក់កណ្ដាលនៃការមករដូវ និងក្រោយនៃការមករដូវហើយ។ ធ្លាក់សធម្មជាតិ មានវាពណ៌សថ្លាធម្មតា ដូចជាស៊ុតមាន់ពណ៌ស រំអិល អន្លាយស្រដៀងសំបោរ គ្មានក្លិនស្អុយ មិនធ្វើឱ្យរមាស់ នោះទេ អាចមានក្លិនឆ្អាបតិចតួច។ ចំណុចទាំងអស់នេះស្រ្តីអាចចំណាំទុកខ្លួនឯងបាន គេហៅថាសធម្មជាតិរបស់ស្ត្រី។

ការធ្លាក់សបង្កជំងឺ៖ សដែលជាសញ្ញាមិនល្អសម្រាប់សុខភាព ចាប់ផ្ដើមចេញជាសញ្ញាសម្គាល់ដូចជា សខាប់ដូចទាំងដោះគេ មានពណ៌ខុសប្រក្រតី អាចមានពណ៌លឿង ពណ៌ផ្កាឈូក ពណ៌បៃតង ប្រផេះ ជាដើម។ ចំពោះក្លិន មានក្លិនស្អុយ អាចមានសភាពខុសគ្នាតាមសុខភាពមនុស្សម្នាក់ៗ ខ្លះស្អុយតិច ខ្លះស្អុយខ្លាំង និងអាចមានរមាស់ជាដើម។

ប្រសិនបើស្ត្រី សម្គាល់ឃើញថាខ្លួនឯង មានការធ្លាក់សរខុសប្រក្រតី សូមលើកទឹកចិត្តឱ្យប្រញ៉ាប់ទៅជួបគ្រូពេទ្យជំនាញ ចៀសវាងការទុកកាន់តែយូរ បង្កគ្រោះថ្នាក់ដល់សុខភាពធ្ងន់ធ្ងរណាមួយកើតឡើង៕

អត្ថបទដោយ៖ Senghong