នរណាខ្លះកំពុងជួបបញ្ហានោមញឹក? ទើបតែនោមមិនបានប៉ុន្មានផងដែរអារម្មណ៍ចង់ទៅនោមម្ដងទៀតហើយ? ជាការពិតមានការលើកឡើងជាច្រើន បាននិយាយថានោមញឹកដោយសារផឹកទឹកច្រើន នោមញឹកដោយសារផឹកស្រា វាមិនមែនជារឿងខុសនោះទេ គ្រាន់តែថាអាចមានមូលហេតុឬជំងឺជាច្រើនទៀតនៅពីក្រោយផងដែរ។

តើនោមប៉ុន្មានដង និងមានលក្ខណៈបែបណា ទើបរាប់ថានោមញឹកជាសញ្ញាមិនល្អសម្រាប់សុខភាព? ផ្សារភ្ជាប់ជាមួយសំណួរខាងលើនេះ ផ្អែកតាមការចែករំលែកពីលោកវេជ្ជបណ្ឌិត ហង្ស ដារ៉ា បានឱ្យដឹងថា សញ្ញានៃការនោមញឹក មានដូចជាឈឺនោមភ្លាមៗទ្រាំមិនបានទប់សឹងមិនជាប់ នោមរួចនៅតែមានអារម្មណ៍ថាចង់នោមទៀត នោមមិនអស់ ចំនួននៃការនោមក្នុងរយៈពេល២៤ម៉ោងច្រើនពេក លើសពី៨ទៅ១០ដង ឬច្រើនជាងនេះ គេងយប់ក្រោកនោមញឹកញាប់លើសពី៤ដងឡើងទៅ គេចាត់ទុកថាជាការនោមញឹកហើយ។

លោកវេជ្ជបណ្ឌិត បានបន្ថែមផងដែរថា ការនោមញឹកនេះចាំបាច់ត្រូវរកមូលហេតុរបស់វាឱ្យបានច្បាស់ដើម្បីងាយស្រួលព្យាបាលមិនមែនចេះតែទៅផ្សំថ្នាំលេបដោយខ្លួនឯង ទាំងមិនបានដឹងថាមកពីអ្វីនោះឡើយ។ លោកវេជ្ជបណ្ឌិត បានឱ្យដឹងថារឿងដែលនៅពីក្រោយការនោមញឹក អាចកើតឡើងដោយសារប្រព័ន្ធប្រសាទមានបញ្ហាធ្វើការមិនបានល្អ អាចកើតឡើងដោយសារមានជំងឺក្រួសក្នុងតម្រងនោមនៅពេលដែលយើងធ្វើសកម្មភាពក្រួសនឹងរមាលក្នុងប្លោកនោមរំញោចឱ្យចង់ឈឺនោម​។

មូលហេតុនេះផ្សេងទៀត ដូចជាបណ្ដាលមកការឡើងជាតិស្ករក្នុងឈាម វិវត្តទៅជាជំងឺទឹកនោមផ្អែម ជំងឺរលាកផ្លូវទឹកនោម និងអាចបណ្ដាលមកពីមានជំងឺថប់បារម្ភឬស្ត្រេសឬអ្នកដែលមានជំងឺផ្លូវចិត្ត សម្រាប់បុរសអាចបណ្ដាលមកពីជំងឺក្រពេញប្រូស្តាតផងដែរ។ កត្តាជំងឺទាំងអស់នេះ នឹងធ្វើឱ្យប៉ះពាល់ដល់ប្រព័ន្ធប្រសាទទើបបញ្ជារឱ្យមានការនោមញឹក។ ហេតុនេះ ត្រូវការការព្យាបាលទៅតាមប្រភេទជំងឺមួយៗ មិនមែនចេញតែលេបថ្នាំផ្ដេសផ្ដាសនោះទេ។

ជាមួយគ្នានេះដែរ លោកវេជ្ជបណ្ឌិត ហង្ស ដារ៉ា បានចែករំលែកពីវិធីក្នុងការថែរក្សាប្រព័ន្ធប្រសាទឱ្យបានល្អ គួរតែកុំទទួលទានប្រៃពេក ផ្អែមពេក កុំលេបថ្នាំផ្ដេសផ្ដាស កុំទទួលទានស្រាច្រើនពេក និងកុំប្រើប្រាស់ថ្នាំជក់ឬសារធាតុញៀនជាដើម។ ប្រសិនបើបងប្អូនកំពុងមានបញ្ហានោមញឹក គួរតែស្វែងរកការព្យាបាលធ្វើរោគវិនិច្ឆ័យឱ្យបានត្រឹមត្រូវ ចៀសវាងកើតជំងឺណាមួយដោយមិនដឹងខ្លួន ទុករហូតវិវត្តដល់ដំណាក់កាលធ្ងន់ធ្ងរ៕

អត្ថបទដោយ៖ Senghong