បញ្ហាសក់ជ្រុះ ជាបញ្ហាដែលមនុស្សជាច្រើនកំពុងតែជួបប្រទះសឹងតែគ្រប់គ្នា ជួនកាលអ្នកគិតថា វាបណ្ដាលមកពីកត្តាផលិតផលដែលអ្នកកំពុងប្រើ។ ក៏ប៉ុន្តែអ្នកខ្លះចាយលុយរាប់សិបដុល្លារហើយ នៅតែមិនអាចដោះស្រាយបញ្ហានេះបានទៀត ដូច្នេះ អ្នកគួរតែងាកមកមើលពីវិធីសាមញ្ញមួយនេះ ក្រែងអាចជួយឱ្យសក់អ្នកលែងជ្រុះដូចមុន។

យោងតាមប្រភព ក្រៅស្រុក Cleveland Clinic បាននិយាយថា កំហុសរបស់មនុស្សទូទៅ នៅពេលជួបនឹងបញ្ហា ពួកគេមិនសូវស្វែងយល់ពី​បញ្ហានោះទេ ប៉ុន្តែបែរជាខំព្យាយាមរកវិធីសាស្ត្រ ឬដំណោះស្រាយទាំងមិនដឹងថាខ្លួនឯងកំពុងតែជួបនឹងបញ្ហាអ្វី ឬក៏ខ្វះខាតអ្វី? ជាក់ស្ដែងដូចជាបញ្ហាសក់ជ្រុះនេះជាដើម ដែលគ្រប់គ្នាបានព្យាយាមស្វែងរកផលិតផលល្អ ដើម្បីមកដោះស្រាយបញ្ហា។ មូលហេតុបណ្ដាលឱ្យសក់ជ្រុះគឺ មានកត្តាជាច្រើន ក៏ប៉ុន្តែកត្តាដែលត្រូវបានណែនាំដោយអ្នកជំនាញផ្នែកសើរស្បែកបានណែនាំឱ្យគ្រប់គ្នា ងាកមកចាប់អារម្មណ៍កត្តាហូបចុកប្រចាំថ្ងៃជាមុនសិន។ ពីព្រោះ ប្រសិនបើក្នុងរាងកាយរបស់អ្នកខ្វះ សារធាតុប្រូតេអ៊ីន និងវីតាមីន វា គឺជាកត្តាលាក់មុខធំបំផុតដែលធ្វើឱ្យសក់ជ្រុះស្ទើរតែរាល់ថ្ងៃ។ អ្នកត្រូវដឹងថា វីតាមីននិង ប្រូតេអ៊ីន ដែលអ្នកទទួលបានពីអាហារប្រចាំថ្ងៃ ដូចជា ត្រី សាច់ក្រហម បន្លែបៃតង បន្លែពណ៌លឿង ផ្លែឈើ គឺជាផ្នែកធំបំផុតដែលជួយឱ្យសរសៃសក់អ្នករឹងមាំ ពីព្រោះក្នុងផ្លែឈើ និងត្រីសាច់ មានផ្ទុកវីតាមីនជាច្រើន។ វីតាមីននិង ប្រូតេអ៊ីន គឺវាជំរុញដល់ការផលិតកូឡាជេនក្នុងស្បែក និងឫសសក់ ជួយឱ្យសរសៃសក់លូតលាស់បានល្អ និងមានភាពរឹងមាំ ថែមទាំងកាត់បន្ថយការជ្រុះ។ ប្រសិនបើជីវិតប្រចាំថ្ងៃរបស់អ្នក អ្នកមិនបានញុំាអាហារដែលមានជីវជាតិគ្រប់គ្រាន់ទេ ទោះអ្នកប្រើផលិតផលល្អក៏មិនអាចជួយឱ្យសក់រឹងមាំ និងឈប់ជ្រុះនោះដែរ។

នៅក្នុងប្រភព Healthline គេបាននិយាយថា ប្រសិនបើអ្នកជួបបញ្ហាសក់ជ្រុះច្រើនៗ វាអាចបណ្ដាលមកពីកត្តាស្ត្រេស អារម្មណ៍តប់ប្រមល់ ឬភាពតានតឹងក្នុងចិត្តរបស់អ្នក ដែលទាំងអស់នេះ​វាបានជះឥទ្ធិពល ពោលគឺ វាធ្វើឱ្យអរម៉ូនក្នុងរាងកាយរបស់អ្នកប្រែប្រួល។ ភាគច្រើនមនុស្សដែលស្រ្តេស គឺមើលទៅខ្សោះៗគ្មានថាមពលនោះទេ ដូច្នេះវាធ្វើឱ្យអាហារដែលអ្នកញុំាចូលទៅ គឺវាទៅបម្រុងទុកសម្រាប់ទប់ទល់នឹង ភាពស្រ្តេស ដូច្នេះ វាធ្វើឱ្យផ្នែកផ្សេងៗនៃរាងកាយរបស់អ្នកគឺ ចាប់ផ្ដើមបាត់បង់សារជាតិចិញ្ចឹមផងដែរ។

ប្រភពដដែរ និយាយថា វាក៏អាចមកពីកត្តាការកក់សក់មិនបានត្រឹម​ត្រូវផងដែរ។ ទម្លាប់ល្អបំផុតក្នុងការថែសក់ គឺអ្នកគួរតែកក់សក់យ៉ាងតិច២ថ្ងៃកក់ម្ដង ប្រសិនបើសក់អ្នកផ្ទុកធូលី បាក់តេរី ឬឆាប់ឡើងប្រេង អ្នកគួរតែកក់ជាប្រចាំក៏បាន។ ការកក់សក់ដ៏ល្អបំផុត គឺកក់ត្រដុសស្បែកក្បាលថ្នមៗ ដាច់ខាតកុំយកក្រចកអេះ ត្រដុសស្បែកក្បាលខ្លាំងៗពេក ដែលវាអាចបណ្ដាលឱ្យស្បែកក្បាលដាច់រលាត់ ធ្វើឆ្លងឱ្យមេរោគបាក់តេរី និងឆាប់ធ្វើឱ្យក្បាលឡើងអង្គែ លឿនផងដែរ។ បន្ទាប់ពីកក់សក់រួច អ្នកគួរតែប្រើក្រែមបន្ទន់សក់ អប់សក់ឱ្យមានទម្ងន់ និងមានសំណើមគ្រប់គ្រាន់ ការធ្វើបែបនេះ គឺជួយឱ្យសក់មិនបែកចុង ថែមទាំងរក្សាទម្ងន់សក់ទៀតផង ប៉ុន្តែដាច់ខាតកុំបណ្ដោយឱ្យក្រែមបន្ទន់សក់ប៉ះដល់ស្បែកក្បាលញឹកញាប់ពេក ពីព្រោះវាអាចធ្វើឱ្យស្បែករបស់អ្នកក្ដៅ រលាកគល់សក់បណ្ដាលឱ្យសក់ជ្រុះ។ បន្ទាប់មក អ្នកអាចប្រើឧបករណ៍ផ្លុំសក់ ឬ ប្រើកង្ហា សម្ងួតឱ្យសក់ស្ងួតត្រឹម ៧០%ទៅ៨០% រួចធ្វើការលាបប្រេងសក់ ដើម្បីរក្សាដើមសក់ឱ្យរលោង មានជាតិប្រេង ជួយសក់មិនឱ្យសំពោង និងមិនបែកចុង។

សូមបញ្ជាក់ថា​ សម្រាប់ទម្លាប់ខាងលើនេះ នឹងទទួលបានប្រសិទ្ធភាពនៅពេលអ្នកបរិភោគអាហារមានប្រូតេអ៊ីនវីតាមីនគ្រប់គ្រាន់ គួបផ្សំ​នឹងទម្លាប់ ឬក្បួនដែលបានរៀបរាប់ខាងលើ៕

អត្ថបទស្រាវជ្រាវដោយ៖ តឹក ស៊ីថា