បើអ្នកស្មុគស្មាញ ស្រ្តេស និងគិតអវិជ្ជមានច្រើននោះ វានឹងទាញជីវិតអ្នកឱ្យដើរថយក្រោយ និងអស់ថាមពលទៀត។ ដើម្បីចៀសបញ្ហាទាំងអស់នេះ អ្នកគួរប្រតិបត្តិតាមទម្លាប់ទាំង ៣ខាងក្រោមនេះ ដើម្បីសម្រួលផ្លូវចិត្តរបស់អ្នកក៏ផ្លាស់ប្តូរពីខ្សោយទៅជារឹងមាំ។ ទម្លាប់ទាំង ៣នេះ មានអំណាចឥទ្ធិពលដល់ផ្លូវចិត្តអ្នកឱ្យរីករាយ។

១. គិតវិជ្ជមាន៖ ការរៀនមើលអ្វីៗ ក្នុងផ្លូវល្អជាការស្ថាបនាសេចក្តីសុខចូលក្នុងជីវិតរបស់អ្នកកាន់តែច្រើន។ នេះជាសម្តីលោក ម៉ារទីន សេលិកម៉ែន សូម្បីនៅក្នុងសៀវភៅ Learned Optimism របស់លោកក៏បានបញ្ជាក់បន្ថែមថា ពេលអ្នកងើបពីការដួល ការបរាជ័យ និងការឈឺចាប់អ្វីមួយ មិនមែនការជម្នះលើអារម្មណ៍ផ្លូវចិត្តនោះទេ ប៉ុន្តែជាការសម្លឹងមើលជីវិតជាថ្មីក្នុងផ្លូវវិជ្ជមានដោយគិតថា ការដួលក្នុងជីវិតនេះ គ្រាន់តែជាមួយរឿងមួយកើតឡើងមួយរយៈពេលខ្លី រួចក៏រលាយបាត់ទៅវិញហើយ។” អ្នកអាចគិតមើលថា តើបញ្ហារាប់រយចូលមកក្នុងជីវិតអ្នកនេះ មានបញ្ហាមួយណាជាការពិត? គឺគ្មានទេ វាតែងរសាតតាមខ្យល់រហូត។ ការគិតបែបនេះ នាំឱ្យរឿងល្អៗ ក៏ចូលមកក្នុងជីវិតអ្នក។

២. ការស្ដាប់តន្រ្តី៖ ពេលអ្នកមានកំហឹង ការស្តាប់តន្រ្តីជួយបណ្ដែតអារម្មណ៍ឱ្យហោះហើរតាមសម្លេងតន្រ្តី ការធ្វើបែបនេះជាវិធីសាស្រ្តសាមញ្ញមួយ ដើម្បីកម្ចាត់កំហឹងមានប្រសិទ្ធភាពលឿន។ យើងត្រូវដឹងថា សិល្បៈជាគ្រឿងលួងលោមចិត្តដ៏ពូកែបំផុត ធ្វើឱ្យអ្នកសប្បាយរីករាយ បាត់ស្រ្តេស និងរំភើបញាប់ញ័រទៅតាមតន្រ្តីនេះដែរ។ ដូច្នេះ តន្រ្តីជាទម្រង់មួយនៃសិល្បៈ ដើម្បីជួយឱ្យអ្នកបានបន្ធូរអារម្មណ៍ខឹងបានល្អបំផុត។ ស្រង់ពីគេហទំព័រ Healthline ។

៣. ភាពរវល់បញ្ចេលបញ្ហាចេញពីផ្លូវចិត្ត៖ “ការបណ្ដេញទុក្ខឲ្យចេញផុតពីផ្លូវចិត្តរបស់អ្នក គឺអ្នកត្រូវធ្វើឲ្យខ្លួនឯង មានកិច្ចការរវល់មមាញឹកជាប្រចាំថ្ងៃ។ ព្រោះការងារជាថ្នាំដ៏ល្អបំផុតសម្រាប់បំបាត់ក្តីទុក្ខ។” លោក Dale Carnegie ហ៊ាននិយាយបែបនេះ ព្រោះតែគាត់ដឹងថា បើគ្មានការងារធ្វើទេ គ្មានលទ្ធផល ឬដោះស្រាយក៏មិនលេចព្រមគ្នាចេញមកដែរ។ បើអ្នកឃ្លានហូបបាយ តែមិនព្រមដាំបាយ អ្នកគិតតែថា ខ្ញុំគ្មានបាយហូបទេ។ នៅលើលោកនេះ គ្មានបាយណាចេះហោះមករកអ្នកទេ លុះត្រាតែអ្នកទៅដាំបាយ។ កុំនិយាយច្រើន ចូរអ្នកចាប់ផ្តើមធ្វើវាតែម្តងទៅ៕

អត្ថបទដោយ៖ ទ្រ សុភាព