១. សោកស្តាយព្រោះតែមិនធ្វើរឿងមានអត្ថន័យក្នុងជីវិត៖

នៅពេលណាមួយអ្នកមិនបានធ្វើរឿងដែលអ្នកស្រឡាញ់ឬចង់ធ្វើវាទេ អ្នកចេះតែកើតទម្លាប់មួយនេះគឺទម្លាប់ពន្យាពេលវេលា ចាំស្អែក ចាំធ្វើ... ចាំថ្ងៃក្រោយចាំធ្វើ... ពេលអ្នកមានទម្លាប់ចាំបែបនេះ វាធ្វើស៊ីជីវិតរបស់អ្នកឱ្យរស់នៅគ្មានអត្ថន័យនោះទេ។ ទម្លាប់ចាំ ដេកចាំនេះ ធ្វើឱ្យអ្នកក្លាយជាមនុស្សខ្ចិលច្រអូស ហើយពេលខ្លះធ្វើឱ្យអ្នកគិតថាខ្លួនគួរតែបានធ្វើការងារទាំងនោះ ប៉ុន្តែអ្នកបែរជាមិនបានធ្វើ វាទាល់តែសោះ។ តាមលោក Pablo Picasso បាននិយាយថា “បើអ្នកចូលចិត្តពន្យាពេលវេលាទុករហូតដល់ថ្ងៃស្អែកនោះ មានន័យថា អ្នកបានបន្សល់រឿងកាន់តែច្រើនឡើងចូលក្នុងជីវិតរបស់អ្នកហើយ”។ អ្នកឃើញទេ! ទម្លាប់ដេកចាំមួយមាត់នេះ ធ្វើឱ្យជីវិតស្តាយក្រោយចំពោះរឿងដែលអ្នកគួរធ្វើបានច្រើន បែរជាធ្វើបានតិចទៅវិញ។ មានពាក្យ១ពោលថា “អ្នកធ្វើច្រើន ចំណូលច្រើន”។ ធ្វើច្រើនហើយចេះអភិវឌ្ឍន៍សមត្ថភាពឱ្យរីកចម្រើនពីការរៀនសូត្រទើបអ្នកមានអនាគតល្អ។

២. កាន់តែពន្យារពេលអ្នកកាន់តែកប់លទ្ធផល៖ ពេលអ្នករស់នៅគ្មានវិន័យ ជីវិតអ្នកកំពុងតែបណ្តែតបណ្តោយឱ្យហូរតាមខ្សែជីវិតដោយគ្មានគោលដៅហើយ។ អ្នកឃើញទេ! អ្នកអាស៊ូជីវិតដែរទេ?​ ពេលអ្នករស់នៅ ធ្វើការ និងរកស៊ីគ្មានវិន័យបែបនេះ វាធ្វើឱ្យអារម្មណ៍អ្នកម្តងចង់ធ្វើបន្តិច ម្តងអត់ចង់ធ្វើបន្តិចទៅវិញ ហេតុអ្វីអ្នកមានអារម្មណ៍បែបនេះ? ព្រោះតែអារម្មណ៍របស់អ្នកគ្មានការគ្រប់គ្រងដោយវិន័យឬគ្មានគោលដៅនេះឯង។ ករណីអ្នកធ្វើការរបាន១០មុខក្នុងមួយថ្ងៃ ប៉ុន្តែគួរឱ្យស្តាយណាស់ អ្នកធ្វើបានតែ ២មុខទៅវិញ។ អ្នកឃើញទេ! លទ្ធផលរបស់អ្នកត្រូវបានកប់ចោលចំនួន ៨មុខបាត់ទៅហើយ។

តាមសៀវភៅ The art of Laziness បានលើកឡើងថា ពេលវេលានឹងមិនសមតាមបំណង និងមិនល្អឥតខ្ចោះសម្រាប់ជីវិតរបស់អ្នកនោះទេ។ ព្រោះវាមានឧបសគ្គជាច្រើននឹងកើតមានឡើងនៅក្នុងដំណើរជីវិតមួយនេះ។ ដោយសារតែបញ្ហាជាច្រើនចូលមកកាន់ជីវិតបែបនេះហើយ វាធ្វើឱ្យអ្នកមានអារម្មណ៍ខ្ជិលច្រអូសហើយស្ទាក់ស្ទើរ ប៉ុន្តែអ្នកត្រូវតែជម្នះ និងចេះតស៊ូជាមួយបញ្ហាទាំងអស់នោះឱ្យឈ្នះណា! បើអ្នកចង់ឈ្នះទម្លាប់អាក្រក់ទាំងពីរនេះ គ្រាន់តែអ្នកព្យាយាមកែប្រែទម្លាប់ជាប្ររចាំថ្ងៃដោយដាក់វិន័យ និងអភិវឌ្ឍន៍ទៅតាមគោលដៅម្តងបន្តិចៗ អ្នកនឹងមានទម្លាប់ឈ្នះលើការពន្យាពេលនេះមិនខានឡើយ៕ អត្ថបទដោយ៖ ទ្រ សុភាព