ខែត្រជាក់ ធ្លាក់ខ្យល់ មនុស្សម្នាធ្លាក់ខ្លួនឈឺ ក្តៅខ្លួន ក្អក កណ្តាស់ ដែលអាចជាសញ្ញានៃជំងឺផ្តាសាយ។ ប៉ុន្តែអ្នកជំនាញបានបកស្រាយថា វីរុសកើតមានជាប្រចាំថ្ងៃ​ទាំងថ្មីទាំងចាស់ មិនមែនឱ្យតែមានសញ្ញាទាំងនេះ សុទ្ធតែផ្តាសាយទាំងអស់នោះទេ រោគសញ្ញាអាចស្រដៀងគ្នា តែអ្នកអាចមានជំងឺភ្សេងក្រៅពីផ្តាសាយដែលត្រូវយកចិត្តទុក្ខដាក់ខ្ពស់បំផុត។ នៅក្នុងអត្ថបទនេះ​យើងនឹងធ្វើការបែងចែក នូវរោគសញ្ញាជំងឺផ្តាសាយ និងជំងឺឆ្លងផ្សេងៗទៀតដែលមានលក្ខណៈស្រដៀងគ្នា ដើម្បីឱ្យបងប្អូនងាយស្រួលយល់និងការពារខ្លួន។

វេជ្ជបណ្ឌិត Charu Dutta Arora ជាគ្រូពេទ្យពិគ្រោះយោបល់ និងឯកទេសជំងឺឆ្លងនៅ Amerihome Healthcare និងមន្ទីរពេទ្យ Asian បានពន្យល់ឱ្យដឹងនៅក្នុងHealthshotថា ជំងឺផ្តាសាយអាចបណ្តាលឱ្យមានរោគសញ្ញាដូចជាគ្រុនក្តៅ ឈឺបំពង់ក ញ័រ ញាក់ ឈឺសាច់ដុំ ក្អក កកស្ទះ ហៀរសំបោរ ឈឺក្បាល និងហត់នឿយ។ ករណីខ្លះអាចមានការ​ក្អួត និង​រាគ​បន្ថែមទៀត។ ប៉ុន្តែវេជ្ជបណ្ឌិតបានពន្យល់បន្ថែមថា អ្នកអាចមានជំងឺផ្សេង ប្រសិនអ្នកមានរោគសញ្ញានៃជំងឺដូចខាងក្រោម។

កូវីដ១៩: ជំងឺកូវីដ១៩គឺជាជំងឺឆ្លងមួយប្រភេទដែលបងប្អូនបានស្គាល់រួចមកហើយ វាកើតឡើងតាំងពីឆ្នាំ២០១៩មកម្លេះ។ ទោះបីជាកូវីដ១៩បានធូរស្បើយ មិនរាតត្បាតខ្លាំងដូចពីមុន អ្នកក៏មិនគួរមើលស្រាលនៃឥទ្ធិពលរបស់វាលើសុខភាពដែរ។ វាមានអាការដូចជាផ្តាសាយ ប៉ុន្តែបន្ថែមនូវអាការក្តៅខ្លួនខ្លាំងជាង, ឈឺក្បាលខ្លាំងជាង, បាត់បង់ក្លិននិងរសជាតិអាហារ។ ហេតុនេះ បើមានសញ្ញាបែបនេះ គប្បីតេស្តរហ័សសាកល្បងដើម្បីប្រាកដចិត្តថាមិនឆ្លងកូវីដ១៩ ឬឆ្លងប្រញាប់ព្យាបាលឱ្យទាន់ពេល។

ឆ្លងបាត់តេរី pharyngitis: បាត់តេរី១ប្រភេទនេះឆ្លងតាមខ្យល់ ខណៈរោគសញ្ញាស្ទើរតែស្រដៀងទៅនឹងជំងឺផ្តាសាយ ការឆ្លងមេរោគនេះចូលទៅបំពង់ក និង tonsils អាចបណ្តាលឱ្យមានកូនកណ្តុរហើម ចំណុចក្រហមនៅខាងក្នុងមាត់ និងគ្រុនក្តៅខ្លាំង។ ប៉ុន្តែវាមិនតឹងច្រមុះ ដូចផ្តាសាយឡើយ។

ការរលាកសួត: ការឆ្លងមេរោគបាក់តេរី, មេរោគផ្សិតធ្ងន់ធ្ងរ ឬជំងឺរលាកសួត គឺជាផលវិបាកទូទៅមានសញ្ញាស្រដៀងនឹងជំងឺផ្តាសាយ។ អ្នកអាចគ្រុនក្តៅយូរ ក្អកជាប់ៗគ្នា និងឈឺទ្រូង ដែលនេះជាលក្ខណៈ នៃការឆ្លងមេរោគរលាកសួត។ បន្ថែមពីនេះអ្នកជំងឺអាចមានដង្ហើមខ្លី ឬកម្រិតអុកស៊ីសែនក្នុងឈាមមិនគ្រប់គ្រាន់។

រលាកទងសួត: ការ​រលាក​ផ្លូវដង្ហើម ឬ​រលាកទងសួត​ មាន​លក្ខណៈ​ស្រដៀង​គ្នា​នឹង​ជំងឺគ្រុន​ ដូចជា​ក្អក​ តឹង​ច្រមុះ និង​ឈឺ​បំពង់ក។ ទោះជាយ៉ាងណាក៏ដោយ ជំងឺរលាកទងសួតអាចបណ្តាលមកពីអាឡែស៊ី ឬការបំពុលផ្សេងៗ។ ដូចគ្នានេះផងដែរ ការក្អកក្នុងករណីរលាកទងសួតអាចអូសបន្លាយជាច្រើនសប្តាហ៍ ហើយអាចត្រូវការថ្នាំស្តេរ៉ូអ៊ីតទើបអាចព្យាបាលបាន។ ដូចនេះបើកត់សម្គាល់ឃើញខ្លួនឯង ក្អកលើសជាប់ដល់សប្តាហ៍គប្បីរកពេទ្យដើម្បីពិគ្រោះជំងឺ។

ឆ្លងមេរោគបំពង់ ក /រលាកបំពង់ ក: ជំងឺនេះមានរោគសញ្ញាស្រដៀងនឹងជំងឺគ្រុនផ្តាសាយ ដែលអាការនឹងចេញមករួមជាមួយនឹងការមានកូនកណ្តុរហើម កន្ទួល អស់កម្លាំងខ្លាំង និងហើមប៉ោងត្រង់ក ដែលសុទ្ធតែជាសញ្ញាសម្គាល់ហើយគប្បីទៅពេទ្យដើម្បីព្យាបាល។

ជំងឺរលាកស្រោមខួរក្បាល: បញ្ហារលាកស្រោមខួរក្បាល (ស្រទាប់ជុំវិញខួរក្បាល និងខួរឆ្អឹងខ្នង) អាចបង្កឡើងដោយមេរោគ ឬបាក់តេរី មានរោគសញ្ញាដែលចាប់ផ្តើមដូចនឹងជំងឺផ្តាសាយ ប៉ុន្តែត្រូវបានផ្សារភ្ជាប់ជាមួយនឹងការរឹងក ឈឺក្បាលខ្លាំង គ្រុនក្តៅខ្លាំង ក្អួត ប្រតិកម្មទៅនឹងពន្លឺ និងសំឡេង និងការភាន់ច្រលំ។ សូមរមឹ្លកផងដែរថា នេះ​ជា​ជំងឺ​ធ្ងន់​ធ្ងរ​ដែល​មាន​អត្រា​មរណៈ​ខ្ពស់​ដែលត្រូវប្រុងប្រយ័ត្នមែនទែន។

ជំងឺទាំងអស់ខាងលើនេះ មានរោគសញ្ញាស្រដៀងនឹងផ្តាសាយ ហេតុនេះប្រសិនបើបងប្អូនមានរោគសញ្ញាស្ថិតក្នុងជំងឺណា១ដែលសង្ស័យ គប្បីទៅពេទ្យពិនិត្យឱ្យបានលឿនបំផុត។ កុំគ្រាន់តែទិញថ្នាំលេបតាមឱសថស្ថាន ត្រូវទៅរកពេទ្យដើម្បីវិនិច្ឆ័យរោគសញ្ញា រួចចាំយកវេជ្ជបញ្ជារបស់ពេទ្យទៅរកថ្នាំ។ ការពារប្រសើរជាងព្យាបាល រកឃើញជំងឺលឿន ព្យាបាលក៏ឆាប់ជា។ ខែត្រជាក់មនុស្សឈឺច្រើន សូមមើលថែសុខភាពឱ្យបានល្អណា៎ ផឹកទឹកក្តៅ ហាត់ប្រាណ គេងឱ្យគ្រប់ ញ៉ាំអាហារមានតុល្យភាពនោះទើបសុខភាពអ្នករឹងមាំ៕

អត្ថបទដោយ៖ កញ្ញា លីហួយ