១. ធ្វើលំហាត់ប្រាណ៖ គ្រាន់តែអ្នកចំណាយពេលហាត់ប្រាណមួយថ្ងៃ ១០ទៅ១៥នាទីនោះ អ្នកនឹងជ្រះស្រ្តេសចេញពីខួរក្បាលមិនខានទេ។ ពេលអ្នកហាត់ប្រាណដូចជាអ្នកយកទុក្ខលំបាកទៅជះចោលកន្លែងហ្នឹងអ៊ីចឹងដែរ។

២. លេងជាមួយក្មេងកាត់ស្រ្តេស៖ ខ្ញុំបានអង្គុយនៅហាងកាហ្វេមួយកន្លែង ហើយអារម្មណ៍ខ្ញុំមិនសូវជាសប្បាយចិត្តប៉ុន្មានទេ ព្រោះតែធ្វើការងារមិនសូវជាបានល្អ ប៉ុន្តែខ្ញុំបានឃើញកូនក្មេងម្នាក់ បានញញឹមដាក់ខ្ញុំ ស្រាប់តែអារម្មណ៍ខ្ញុំបែបជាទៅរីករាយ ហើយខ្ញុំក៏ញញឹមដាក់កូនក្មេងនោះវិញ។ វាធ្វើឱ្យខ្ញុំអស់ស្រ្តេសហើយសប្បាយចិត្តទៀត។

៣. ស្តាប់តន្ត្រី៖ ពេលអ្នកស្តាប់តន្ត្រីវាពិតជាជះឥទ្ធិពលទៅលើខួរក្បាលរបស់អ្នកណាស់។ មានអ្នកចិត្តសាស្រ្តបានណែនាំថា ការស្តាប់តន្ត្រីធ្វើខួរក្បាលរីករាយដើម្បីកាត់បន្ថយការបាក់ទឹកចិត្ត និងទុក្ខកង្វល់ពីក្នុងចិត្តផងដែរ។

៤. ដើរស្រូបពន្លឺព្រះអាទិត្យ៖ នៅពេលព្រឹកគ្រាន់តែអ្នកដើរក្រោមពន្លឺព្រអាទិត្យ វាពិតជាមានអត្ថប្រយោជន៍ដល់សុខភាពផ្លូវចិត្តរបស់អ្នកឱ្យរីករាយ ហើយវាអត្ថប្រយោជន៍ជួយឱ្យអ្នកឆាប់គេងលក់នៅពេលយប់ផង។

៥. កំណត់ពេលធ្វើការ៖ ការមានទម្លាប់ពន្យាពេល អ្នកនឹងមានអារម្មណ៍៍ស្រ្តេស។ ហើយទម្លាប់បែបនេះ ស៊ីពេលវេលារបស់អ្នកឱ្យខាតចោលទទេៗ ។ ពេលអ្នកកំណត់ម៉ោងការងារហើយខំផ្តោតអារម្មណ៍ អ្នកនឹងធ្វើការបានលឿនហើយមានអារម្មណ៍សប្បាយចិត្តថែមទៀត។

៦. លេងជាមួយសត្វចិញ្ចឹម៖ បើអ្នកកំពុងតែស្រ្តេស អ្នកអាចលេងជាមួយសត្វចិញ្ចឹមដូចជាឆ្កែ ឆ្មា និងសត្វផ្សេងទៀត ពេលអ្នកវក់លេងជាមួយសត្វចិញ្ចឹមនោះ អ្នកនឹងភ្លេចអស់ស្រ្តេសជាមិនខានទេ។

៧. ជួយអ្នកដទៃ៖ ការជួយនេះ មិនចាំបាច់មានលុយក៏អ្នកអាចជួយគេនិងសង្គមបានដែរ។ គ្រាន់តែអ្នកមានចិត្តជួយចាស់ៗ ដើរឆ្លងថ្នល់ និងការងារមនុស្សធម៌ក៏បានដែរ។ ឬមួយអ្នកជួយកុមារឱ្យជាសៀវភៅ ជាខោអាវ ជាស្នាមញញឹម និងជាគំនិតក៏បានដែរ។ នេះជាការផ្តល់ក្តីស្រឡាញ់ឱ្យអ្នកដទៃ ហើយបេះដូងរបស់អ្នកក៏សប្បាយចិត្តវិញ។

៨. អាន៖ អ្នកអាចទៅខ្ចីសៀវភៅពីមិត្តភក្តិមួយក្បាលមក ដើម្បីបង្កើនចំណេះដឹង ឱ្យការគិតរបស់អ្នករីកចម្រើន។ អ្នកអានច្រើនកម្រស្រ្តេសណាស់។ ព្រោះតែគេមានគំនិតទៅដោះស្រាយបញ្ហានោះឯង។

៩. សមាធិ៖ តាមសៀវភៅ លំហូរចិត្ត បានសរសេរថា សមាធិជួយលាងជម្រះអារម្មណ៍អវិជ្ជមានចេញពីផ្លូវចិត្តរបស់អ្នក ហើយវានៅសល់របស់ម្យ៉ាងគឺថាមពលផ្លូវចិត្ត សេចក្តីរីករាយ និងក្តីស្រឡាញ់អាណិតចំពោះអ្នកដទៃតែប៉ុណ្ណោះ”៕