ចិត្តជាឪពុកម្ដាយ កូនគឺជាអ្វីៗគ្រប់យ៉ាង ក្ដីស្រឡាញ់ បេះដូង ភាពកក់ក្ដៅ ពេលវេលា ការសិក្សា គឺទំនុកបម្រុងគ្រប់យ៉ាង គ្មានគិតចង់បានមកវិញឡើយ ឱ្យតែឃើញកូនមានក្ដីសុខ គឺជាក្ដីសុខរបស់ខ្លួនឯងហើយ។ នាមជាឪពុកម្ដាយក្រៅពីការស្រឡាញ់កូន ក៏គួរតែដឹងពីរបៀបចិញ្ចឹមកូនៗឱ្យបានល្អដូចគ្នា ទើបអាចជួយពួកគេឱ្យក្លាយជា ក្មេងដែលមានសុខភាពល្អ ជាក្មេងរាងកាយរឹងមាំ មិនចេះឈឺផ្ដេសផ្ដាសច្រើន ជាក្មេងខួរក្បាលល្អ រៀនពូកែ ជាក្មេងដែល ធំឡើងក្លាយជាសសរទ្រូងរបស់ប្រទេសជាតិយ៉ាងមាំ។

ផ្សារភ្ជាប់ជាមួយរបៀបចិញ្ចឹមកូនខាងលើ ដើម្បីឱ្យពួកគេក្លាយជាក្មេងដែលមានអ្វីៗគ្រប់យ៉ាង ទាំងចំណេះ ទាំងសុខភាព គឺផ្ដើមចេញពីការមើលថែរបស់ឪពុកម្ដាយសំខាន់បំផុត។ ឪពុកម្ដាយគឺជាថ្នាលសម្រាប់ដាំគ្រាប់ពូជឱ្យលូតលាស់ចេញជាផ្លែផ្កាឡើងមក។ ក្រឡេកទៅចូលរបៀបចិញ្ចឹមកូនវិញ គឺនាមជាឪពុកម្ដាយត្រូវ បណ្ដុះតាំងពីពួកគេនៅក្មេង ព្រោះក្មេងគឺជាក្រដាសស ឪពុកម្ដាយផាត់ពណ៌អ្វីលើក្រដាស ប្រាកដជាចេញមកពណ៌បែបហ្នឹងមិនខានយោងតាមរយៈគេហទំពរ parents។

ដូច្នេះហើយ របៀបចិញ្ចឹមកូនៗឱ្យមានរាងកាយរឹងមាំ មិនឈឺច្រើន រៀនឆ្លាតមានដូចជា៖

-ថែរទាំសុខភាពមុនយកកូន ៖ ជាការពិតណាស់​ ការថែសុខភាពមុនយកកូនគឺជារឿងចាំបាច់បំផុត ដែលស្រ្តីត្រូវធ្វើ។ ដើម្បីជួយឱ្យការមានផ្ទៃពោះកាន់តែមានប្រសិទ្ធភាព ។ ចំណែកឯសុខភាពខ្លួនឯងក៏មិនឈឺ មិនទ្រុឌទ្រោមច្រើន ពីព្រោះថា កាលណាម្ដាយមានសុខភាពមិនល្អអំឡុងពេលពរពោះ អាចជះជាផលអាក្រក់ដល់ការលូតលាស់កូនក្នុងផ្ទៃ។ ជាឧទាហរណ៍ម្ដាយមានវិបត្តិផ្លូវចិត្ត គឺអាចប៉ះពាល់ដល់ការអភិវឌ្ឍន៍ខួរក្បាលរបស់កូនក្នុងផ្ទៃបាន ដូច្នេះត្រូវប្រយ័ត្ន ។ មួយវិញទៀតកាលណាកូនៗលូតលាស់ក្នុងផ្ទៃល្អ កើតមកក៏មានរាងកាយរឹងមាំដូចគ្នា។​

-បំបៅដោះកូន ៖ ការដំបៅដោះធម្មជាតិដល់កូន គឺល្អសម្រាប់ជួយសុខភាពកូនលោកអ្នកបំផុត ជាពិសេសទឹកដោះដែលហូរចេញប៉ុន្មានសប្ដាហ៍ដំបូង មានប្រសិទ្ធភាពជួយបង្កើនថាមពលខួរក្បាលកុមារ ជួយការពារប្រឆាំងជំងឺទឹកនោមផ្អែម ជំងឺមហារីក ជួយបង្កើនភាពសុំាក្នុងកាយ ការពារការរលាកស្រោមខួរក្បាល រលាកសួត ឆ្លងមេរោគតាមផ្លូវទឹកនោម និងអត្រាមរណភាពទាបនៅពេលសម្រាលផងដែរ។

-ចាក់វ៉ាកសាំង៖ ជាឪពុកម្ដាយ ត្រូវយកកូនទៅចាក់វ៉ាក់សាំងការពារជំងឺឱ្យបានទៀតទាត់​ព្រោះ ការចាក់វ៉ាកសាំង បានជួយឱ្យរាងកាយកូនអ្នករឹងមាំ ការពារការឆ្លងជំងឺសាហាវៗ ដូចជាជំងឺរលាកខ្សោយខួរ ខួរឆ្អឹងខ្នង ជំងឺអុតស្វាយជាដើម។ 

 -របបអាហារកូន៖ កូនៗអាចមានសុខភាពល្អ រាងកាយរឹងមាំ មិនឈឺច្រើន រៀនក៏ឆ្លាត ក៏ត្រូវចូលរួមពីរបបអាហារប្រចាំថ្ងៃ ដែលម៉ាក់ៗរៀបចំឱ្យញុំា ។ ដូច្នេះហើយគួរផ្ដល់ជាអាហារល្អៗដល់ពួកគេ ព្រោះជាវ័យកំពុងលូតលាស់ មានដូចជាបន្លែ​ ផ្លែឈើ ឱ្យបាន៥ដងក្នុង១ថ្ងៃ។ ព្រោះក្រុមអាហារទាំងអស់នេះមាន នាទីជួយដល់ការផលិតកោសិកាឈាមស ជួយប្រឆាំងជំងឺ។

-គេងឱ្យគ្រប់៖ តើកុមារត្រូវគេងប៉ុន្មានម៉ោងក្នុងថ្ងៃ? ជាការពិតណាស់ ការគេងសម្រាប់ទារក ​គឺមានរហូតដល់១៦ម៉ោង ក្នុង១ថ្ងៃ សម្រាប់ក្មេងចេះដើរតេះតាស់ ត្រូវការគេងឱ្យគ្រប់ប្រមាណ ១១ទៅ១៤ម៉ោង ចំណែកក្មេងរៀនថ្នាក់មតេ្តយ្យគឺត្រូវការគេងប្រមាណ១០ទៅ១៣ម៉ោងក្នុងមួយថ្ងៃ។ ដូច្នេះហើយម៉ាក់ៗអា​ចព្យាយាមឱ្យកូនៗគេងពេលថ្ងៃខ្លះផង ព្រោះល្អសម្រាប់ការលូតលាស់របស់កូន មួយវិញទៀតប្រសិនណាគេមិនបានគេងថ្ងៃគ្រប់ ត្រូវព្យាយាមឱ្យកូនឆាប់ចូលគេងនៅពេលយប់។

សរុបមកវិញ ខាងលើនេះគឺជាវិធីសាស្រ្តចិញ្ចឹមកូន ដើម្បីឱ្យក្លាយជាក្មេងមានរាងកាយរឹងមាំ ឆ្លាត មិនឈឺច្រើន គឺត្រូវយកចិត្តទុកដាក់តាំងពីពពោះ រួមទាំងការថែទាំ ពេលសម្រាលរួច ការបំបៅដោះ មានរបបអាហារ ជាដើម មួយវិញទៀតក្រៅពីការយកចិត្តទុកដាក់លើរឿងនេះ ការចិញ្ចឹមកូនៗនៅមានវិធីជាច្រើនបែបទៀត ដែលសុទ្ធតែមានប្រយោជន៍ដល់កូនៗលោកអ្នកលូតលាស់ល្អ៕

អត្ថបទដោយ៖ ប៉ែត ធីតា