ការសិក្សាថ្មីមួយបានរកឃើញថា គ្រាន់តែគេងបានតិចឬមិនគ្រប់ម៉ោង និងការគេងច្រើនម៉ោងពេក អាចធ្វើឱ្យប៉ះពាល់ដល់សុខភាពតម្រងនោម និងសុខភាពភ្នែកបាន បើយោងតាមការឱ្យដឹងពីប្រភព vnexpress។ ការស្រាវជ្រាវត្រូវបានបង្ហាញនៅក្នុងកិច្ចប្រជុំប្រចាំឆ្នាំរបស់សមាគមអឺរ៉ុបសម្រាប់ការសិក្សាជំងឺទឹកនោមផ្អែម (EASD) នៅទីក្រុងម៉ាឌ្រីដ អ្នកវិទ្យាសាស្ត្របានរកឃើញថាការគេងច្រើនពេកអាចបង្កើនការខូចខាតមីក្រូសរសៃឈាមចំពោះអ្នកជំងឺទឹកនោមផ្អែម 31% ។ ខណៈដែលការគេងមិនបានគ្រប់គ្រាន់អាចបង្កើនការខូចខាតដល់ទៅ 38% ។
ផលវិបាកទូទៅនៃជំងឺទឹកនោមផ្អែមគឺ ខ្សោយតំរងនោម និងពិការភ្នែក។ ដើម្បីធ្វើការសិក្សា អ្នកវិទ្យាសាស្ត្របានវិភាគលើលំនាំនៃការគេង និងសុខភាពរបស់អ្នកស្ម័គ្រចិត្ត ៤០០នាក់ ដែលមានរោគសញ្ញាជំងឺទឹកនោមផ្អែមអស់រយៈពេលជាង ៣ ឆ្នាំ។ ការស្រាវជ្រាវបានរកឃើញថា ផលប៉ះពាល់ដ៏គ្រោះថ្នាក់នៃទម្លាប់នៃការគេងមិនទៀងទាត់កើនឡើងតាមអាយុ។ មនុស្សម្នាក់ក្នុងចំណោម5នាក់ ដែលមានជំងឺទឹកនោមផ្អែមមានបញ្ហាតម្រងនោម ដែលអាចទាមទារការលាងឈាម និងការប្តូរតម្រងនោម។ បន្ថែមពីនោះ បញ្ហាសរសៃឈាមដែលលេចឡើងបន្ទាប់ពីការគេងមិនបានគ្រប់គ្រាន់ក៏បណ្តាលឱ្យមានសម្ពាធឈាមខ្ពស់ដែលនាំឱ្យមានជំងឺសរសៃឈាមបេះដូងនិងជំងឺដាច់សរសៃឈាមខួរក្បាលផងដែរ។
លទ្ធផលសិក្សាគឺស្រដៀងគ្នាមួយទៀត អ្នកវិទ្យាសាស្ត្របានរកឃើញថា អ្នកដែលមានកាលវិភាគនៃការគេងមិនគ្រប់គ្រាន់ មានហានិភ័យនៃការវិវត្តទៅជាជំងឺដក់ទឹកក្នុងភ្នែក ដែលនាំឱ្យបាត់បង់ការមើលឃើញ ប្រសិនបើមិនបានធ្វើរោគវិនិច្ឆ័យ និងព្យាបាលទាន់ពេលវេលា។
អ្នកវិទ្យាសាស្ត្រមកពីមន្ទីរពេទ្យ Brigham and Women's Hospital ក្នុងទីក្រុង Boston បានបង្ហាញផងដែរថា ការគេងតិចពេកអាចនាំឱ្យមុខងារតម្រងនោមធ្លាក់ចុះយ៉ាងឆាប់រហ័ស។ ពួកគេបានរកឃើញថាស្ត្រីដែលគេងបានត្រឹម 5ម៉ោងឬតិចជាងនេះក្នុងមួយយប់គឺ 65% ទំនងជាមានការថយចុះមុខងារតម្រងនោមយ៉ាងឆាប់រហ័សជាងស្ត្រីដែលគេងបានពី 7 ទៅ 8 ម៉ោងក្នុងមួយយប់។ អ្នកដឹកនាំការស្រាវជ្រាវ វេជ្ជបណ្ឌិត Ciaran McMullan ដែលជាសាស្ត្រាចារ្យផ្នែកវេជ្ជសាស្ត្រ បាននិយាយថា "នេះគឺជាការព្រួយបារម្ភ ដោយសារតែរយៈពេលនៃការគេងរបស់យើងបានថយចុះក្នុងរយៈពេល 20 ឆ្នាំកន្លងមកនេះ"។ ជនជាតិអាមេរិកធ្លាប់គេងជាមធ្យម 8 ម៉ោងក្នុងមួយយប់ ប៉ុន្តែឥឡូវនេះនៅត្រឹមតែប្រហែល 6.5 ម៉ោងនិងកាន់តែថយចុះតិចជាងនេះទៀត។
សូមបញ្ជាក់ផងដែរ យោងតាមអ្នកជំនាញ ចំនួនពេលវេលាគេងល្អបំផុតក្នុងការគេងគឺពី 7 ទៅ 9 ម៉ោងក្នុងមួយថ្ងៃ ប៉ុន្តែអ្វីដែលគួរឱ្យព្រួយបារម្ភនៃគឺមនុស្សជាច្រើននាបច្ចុប្បន្ននេះ កំពុងតែគេងមិនបានគ្រប់គ្រាន់ ដែលជាកត្តាប្រឈមមួយប៉ះពាល់ដល់សុខភាពនិងអាយុជីវិត៕
អត្ថបទដោយ៖ សេងហុង-Senghong