គ្រាន់តែចង់ស្អាតមិនពិបាកនោះទេ ឱ្យតែយើងមានលុយ គឺសម័យនេះពិតជាអាចជប់មុខមាត់ រូបរាងថ្មីឱ្យបានភ្លាម។ ក៏ប៉ុន្តែ ចំពោះបច្ចេកទេសថ្មីបែបនេះ ក៏មានហានិភ័យមួយចំនួនផងដែរ តើបងប្អូនធ្លាប់ឃើញគេរលួយច្រមុះ ធ្លុះខ្ទង់ច្រមុះ ឬក៏អ្នកខ្លះក៏ជួបបញ្ហារលួយចង្កា ដែរឬទេ? ហេតុអ្វីក៏បណ្ដាលឱ្យមានបញ្ហានេះកើតឡើង?

យោងតាមបទសម្ភាសជាមួយនឹងវេជ្ជបណ្ឌិត ឃុន សុភាវៈនារី ដែលជាឯកទេសស្បែក និងសម្ផស្ស បានបញ្ចប់ការសិក្សាថ្នាក់វេជ្ជបណ្ឌិតទូទៅនៅសកលវិទ្យាល័យអន្តជាតិ(IU) និងបានបញ្ចប់ថ្នាក់អនុបណ្ឌិត មកពីប្រទេសថៃ ថែមទាំងបញ្ចប់ការសិក្សាពីសហរដ្ដអាមេរិក បានពន្យល់ថា Filler គឺគេប្រើសម្រាប់ការចាក់បំពេញកន្លែងចន្លោះណាមួយនៃរាងកាយមនុស្ស ក៏ប៉ុន្តែ ភាគច្រើនគឺ គេចាក់បំពេញទម្រង់មុខរបស់យើង ដូចជាចង្កា ច្រមុះ ក្រោមភ្នែកជាដើម ដើម្បីជួយលើកសម្រស់របស់យើងឱ្យមើលទៅកាន់តែមានភាពស្រស់ស្អាតថែមមួយកម្រិតទៀត។

ចំពោះការចាក់Filler គឺមិនមែនមានតែក្នុងស្រុកខ្មែរនោះទេ ប៉ុន្តែមានយូរមកហើយ ដែលគេពេញនិយមក្នុងការធ្វើសេវាកម្មមួយនេះ នៅពេលអតិថិជនចង់បានច្រមុះ ឬចង្កាស្អាតជាងមុន​ ដោយមិនបាច់ធ្វើការវះកាត់នោះទេ។ Fillerនេះ គេអាចនាំចូលមកពីប្រទេសកូរ៉េ បារាំង សហរដ្ឋអាមេរិក ដែលFillerទាំងអស់នេះ​គឺ អាចនិយាយបានថាជាប្រភេទល្អ ដែលមិនសូវមានហានិភ័យនោះទេ។ ក៏ប៉ុន្តែ មូលហេតុដែលធ្វើឱ្យអតិថិជនមួយចំនួនទទួលសេវាកម្មរួច ជួបនឹងបញ្ហាដូចជា ក្រហមច្រមុះ រលួយចង្កា គឺមានមូលហេតុជាច្រើន ក៏ប៉ុន្តែ ក្នុងនេះ សុំលើកយកកត្តាធំៗ៣យ៉ាង ដែលងាយនឹងធ្វើឱ្យអតិថិជនងាយនឹងជួបបញ្ហា៖

ទី១ គឺដោយសារកត្តាឆ្លងមេរោគក្នុងកំឡុងពេលប្រតិបត្តិការនៃការចាក់Filler ឬក៏បន្ទាប់ពីការចាក់រួចភ្លាមៗ ដែលធ្វើឱ្យចង្កាអាចនឹងឡើងប៉ោង ក្រហម មានសភាពឈឺក្នុងបរិវេណដែលយើងបានចាក់រួច កត្តានេះ​ គឺអាចនឹងបណ្ដាលឱ្យមានឪ្យមានខ្ទុះ ឬក៏ដំបៅ។

ទី២ គឺបណ្ដាលមកពីកត្តាត្បៀត ឬស្ទះសរសៃឈាម បន្ទាប់ពីចាក់រួចភ្លាមៗ ក៏អាចនឹងលេចចេញជាសញ្ញាមួយចំនួនដូចជា ឈឺ ក្រហម ហើយក៏អាចបង្កទៅជាបញ្ហា បណ្ដាលឱ្យប៉ះពាល់ដល់សរសៃឈាមភ្នែកផងដែរ ប្រសិនបើការស្ទះសរសៃឈាម ប៉ះចំសរសៃដែលសំខាន់ ក្នុងការដឹកនាំ ឬបញ្ចូនសារធាតុចិញ្ចឹមទៅកាន់ភ្នែក ដូច្នេះវាក៏អាចបណ្ដាលឱ្យខ្វាក់ភ្នែកក៏មាន។

ទី៣ គឺកត្តា Fake Filler(Filler​ក្លែងក្លាយ) ត្រង់កន្លែងនេះ វាមានហានិភ័យខ្ពស់បន្តិច ប្រសិនបើអតិថិជនមានបញ្ហា ដូចជាបញ្ហាឆ្លងមេរោគបន្ទាប់ពីចាក់រួច គឺមិនអាចចាក់រំរំលាយFillerនោះឱ្យរលាយនោះទេ លុះត្រាតែធ្វើការវះកាត់យកFillerនោះចេញ ដូច្នេះនេះជាហានិភ័យធំមួយដែលអ្នកទទួលសេវាកម្មមួយនេះ ត្រូវតែប្រុងប្រយ័ត្នឱ្យបានខ្ពស់ ក៏ប៉ុន្តែប្រសិនបើFillerនោះ ជាប្រភេទFillerពិត នោះអាចនឹងងាយស្រួលក្នុងការរំលាយជាង។

ជាចុងក្រោយ វេជ្ជបណ្ឌិត ឃុន សុភាវៈនារី សូមធ្វើការណែនាំឱ្យបងប្អូនទាំងអស់ដែលចង់មានសម្រស់ស្រស់ស្អាត មុននឹងសម្រេចចិត្តទៅទទួលសេវាកម្មណាមួយ​ មិនថាតែការវះកាត់ ឬក៏មិនវះកាត់ សូមធ្វើការតាមដាន សិក្សាពីប្រវត្តិអ្នកជំនាញនោះឱ្យបានច្បាស់ ព្រោះបញ្ហាដែលបានលើកឡើងនេះ មិនមែនមានតែក្នុងស្រុកខ្មែរនោះទេ សូម្បីតែប្រទេសជិតខាង ក៏មានជួបនឹងបញ្ហានេះដែរ ដូច្នេះមុននឹងសម្រេចចិត្តទទួលសេវាកម្ម ត្រូវមើលលើគ្លីនិក បទពិសោធន៍គ្រូពេទ្យ ដើម្បីកាន់តែមានទំនុកចិត្ត៕

អត្ថបទដោយ៖ កញ្ញា តឹក ស៊ីថា