មនុស្សឆេវឆាវច្រើន ច្រើនតែនាំបញ្ហាដាក់ខ្លួន។ មានសុភាសិតមួយបានពោលថា “បើអ្នកមិនព្យាយាមទប់កំហឹងទេ កំហឹងនឹងបំផ្លាញជីវិតរបស់អ្នក”។ ជីវិតរបស់អ្នកកើតចេញពីជម្រើសដែលអ្នកសម្រេចចិត្តតែប៉ុណ្ណោះ។ អ្នកត្រូវចាំថា ជីវីតជារបស់អ្នក មិនមែនជារបស់អ្នកដទៃនោះទេ។ ក្តីសុខជារបស់អ្នក ក៏មិនមែនជារបស់អ្នកដទៃដែរ។ ក្តីសុខនៅក្នុងខ្លួនរបស់អ្នក មិនមែននៅក្រៅខ្លួនអ្នកនោះទេ។ តាមព្រះអង្គ គូ សុភាព មានសង្ឃដីកាថា “អ្នកមិនត្រូវផ្ញើរក្តីសុខជារបស់អ្នក នៅលើបបូមាត់របស់អ្នកដទៃនោះឡើយ។ ក្តីសុខស្ថិតក្នុងចិត្តរបស់អ្នក ហើយចិត្តអ្នកជាកម្មសិទ្ធរបស់អ្នក។ កុំឱ្យអ្នកដទៃមកបំផ្លាញក្តីសុខក្នុងចិត្តរបស់អ្នកណា!” ទោះបីអ្នកដទៃស្តីថាឱ្យអ្នក រិះគន់ឱ្យអ្នក មើលងាយអ្នក... ការពិត គេចង់ឱ្យយអ្នកឈឺចាប់នឹងសម្តីរបស់គេតើ។ ពេលអ្នកមិនឈឺចាប់ មិនខ្វល់ពីសម្តីពួកគេ និងមិនចាប់អារម្មណ៍នឹងពួកគេគឺពួកគេទេដែលមានការឈឺចាប់ទាំងអស់នេះ ហើយចិត្តរបស់អ្នកនឹងមានក្តីសុខ។
កត្តាធ្វើឱ្យអ្នកចេះតែឆាប់ខឹងអាចមកពីកត្តាខាងក្រៅមកដូចជា សម្ពាធការងារច្រើន ធ្វើមិនអស់ យូរទៅក៏ចាប់ផ្ដើមអស់កម្លាំងកាយ អស់កម្លាំងចិត្តនឹងធ្វើបន្ត ហើយក៏ធ្វើឱ្យចិត្តនឹងឆាប់ឆេវឆាវផងដែរ។ មួយទៀតអាចទាក់ទងនឹងជំងឺផ្លូវកាយដូចគ្នា ឈឺច្រើន ជាហេតុធ្វើឱ្យរាងកាយទ្រុឌទ្រោម អ៊ីចឹងក៏ធ្វើឱ្យសតិអារម្មណ៍ខ្សោយ នាំឱ្យប៉ះពាល់តិចមិនបានគឺឆាប់ឆេវឆាវឡើងមក។ បន្ថែមលើសពីនេះគឺមានជំងឺផ្លូវចិត្តរុំារ៉ៃយូរអង្វែងមកហើយ ក៏ងាយធ្វើឱ្យមនុស្សងាយធ្លាក់ក្នុងអន្លង់ ម៉ួម៉ៅឆេវឆាវច្រើន។ បែបនេះហើយ លោកគ្រូ គូ សុភាពបានណែនាំថា ត្រូវតែព្យាបាល ឬការពារគ្រប់មុំសម្រាប់ផ្លូវចិត្តរបស់អ្នក។ មានន័យថាត្រូវដឹងខ្លួនឯង ស្គាល់ខ្លួនឯងថាជាមនុស្សឆេវឆាវ និងត្រូវព្យាយាមតោង ឬទាញខ្លួនឯងមកវិញ ព្រោះថាដើរផ្លូវនេះគឺខុសហើយ ការឆេវឆាវមិនត្រឹមតែប៉ះពាល់តែខ្លួនឯងនោះទេ តែប៉ះពាល់ដល់អ្នកដទៃដូចគ្នាដែរ។
តាមព្រះអង្គបណ្ឌិត គូ សុភាព មានសង្ឃដីកាថា ចូរអ្នកព្យាយាមធ្វើលំហាត់ប្រាណជួយរំលាយអារម្មណ៍ឆេវឆាវ ឬខឹង ដើម្បីជួយបង្ការជំងឺដាច់សរសៃឈាមខួរក្បាល ការគាំងបេះដូង កាត់បន្ថយអារម្មណ៍ស្ត្រេស ព្រោះវាជួយពង្រឹងប្រព័ន្ធការពាររាងកាយ និងបង្កើនខួរក្បាលឱ្យចងចាំបានល្អ។ បើមិនមានអ្វីធំដុំ ក៏ត្រូវដើរយ៉ាងហោចណាស់ ៣០នាទីក្នុង១ថ្ងៃ ដើម្បីបញ្ចេញញើស បញ្ចេញជាតិពុលពីក្នុងខ្លួនដែរ ធ្វើរបៀបនេះ សូម្បីសុខភាពកាយនិងផ្លូវចិត្តរបស់អ្នកក៏ប្រសើរ ហើយមានក្តីសុខសម្រាប់ចិត្តបំផុត៕ អត្ថបទដោយ៖ ទ្រ សុភាព