ធ្លាប់លឺចាស់ៗ ផ្ដាំថា ឱ្យញុំាប៉េងប៉ោះឱ្យច្រើនៗទៅ សាច់ស្អាត ញុំាល្ហុងឱ្យច្រើនទៅសាច់ភ្លឺ ក៏ប៉ុន្តែបងប្អូនមានដឹងទេ ថាហេតុអ្វីក៏ផ្លែឈើទាំងនេះ ជួយឱ្យសាច់ស្អាត តើវាផ្ទុកសារធាតុអ្វី?

ក្នុងអត្ថបទនេះ ខ្ញុំលើកយកស្ដេចផ្លែឈើ ដែលជាពពួកផ្លែឈើដែលងាយស្រួលរកនៅស្រុកខ្មែរមួយចំនួន ដែលជាកំពូលផ្លែឈើដែលជួយឱ្យស្បែកភ្លឺម៉ដ្ឋរលោង និងមិនងាយចាស់ជ្រីវជ្រួញ។ 

ទី១គឺ ផ្លែក្រូច

ត្បិតតែក្រូចខ្លះមានរសជាតិផ្អែម ឬក៏មានរសជាតិជូរ ក៏ប៉ុន្តែអម្បូរផ្លែក្រូច គឺជាផ្លែឈើដែលគេចាត់ទុកថា ជាប្រភពវីតាមីន C ខ្ពស់អាចផ្តល់ឱ្យអ្នកនូវអត្ថប្រយោជន៍ជាច្រើនដូចជាការការពារការបំផ្លាញអុកស៊ីតកម្ម។ មូលហេតុដែលក្រូចអាចជួយឱ្យសម្រស់អ្នកស្អាត ឬជួយឱ្យសាច់អ្នកស្រស់ថ្លាភ្លឺរលោង គឺដោយសារក្នុងទឹកក្រូចមានផ្ទុកវីតាមីនសេ វាអាចការពារការខូចខាត DNA កាត់បន្ថយការរលាក ហើយវាជំរុញការផលិតកូឡាជែន ជួយឱ្យស្បែកមិនងាយចាស់ ឬជ្រីវជ្រួញមុនអាយុនោះឡើយ។

ទី២ផ្លែ​ល្ហុង

ផ្លែល្ហុង គឺផ្លែឈើដែលពេញនិយមបំផុតសម្រាប់ជីវភាពរស់នៅរបស់បងប្អូន វាជាផ្លែឈើដែលសម្បូរដោយជាតិកាកសរសៃខ្ពស់ ភាគច្រើននៅពេលបងប្អូនពិបាកបន្ទោបង់តែងតែត្រូវបានគេណែនាំឱ្យញុំាផ្លែឈើនេះ ដើម្បីជួយសម្រួលដល់ការបន្ទោបង់ ពីព្រោះវាមានជាតិកាកសរសៃច្រើន​ជំរុញដល់ការរំលាយអាហារបានល្អ..មូលហេតុដែលល្អជួយឱ្យសាច់ស្អាតម៉ដ្ឋខៃ គឺដោយសារវា ជាប្រភពដ៏ល្អបំផុតនៃវីតាមីន A, B, និង C ជាពិសេស វាក៏សំបូរទៅដោយសារធាតុប្រឆាំងមេរោគ បាក់តេរី និងប្រឆាំងផ្សិតដែលអាចព្យាបាលបញ្ហាស្បែកដូចជា ឫស ជំងឺត្រអក ដំបៅជាដើម ដោយសារវីតាមីនដ៏ច្រើនរបស់ល្ហុង ទើបល្ហុងត្រូវបានគេចាត់ទុកថាជាស្ដេចផ្លែឈើជួយសម្រស់អ្នក។

ទី៣ ផ្លែត្រសក់

ត្រសក់ត្រូវបានអ្នកជំនាញខាងចំណីអាហារចាត់ទុកវាថាផ្លែឈើ បើទោះបីជាយើងធ្លាប់គិតថាវាជាបន្លែ​ឬ បរិភោគវាក្នុងលក្ខណៈជាបន្លែក៏ដោយ ផ្លែឈើមួយប្រភេទនេះ គឺសម្បូរទៅដោយជាតិទឹកជួយផ្ដល់សំណើមដល់ស្បែក ជួយឱ្យស្បែកមានលក្ខណៈត្រជាក់ រក្សាតុល្យភាពនៃសម្រស់ស្បែកត្រសក់​សម្បូរ​វីតាមីន C និង K ហើយ​វាក៏ជាផ្លែឈើដែលសម្បូរជាតិកាកសរសៃខ្ពស់ផងដែរ អ្នកអាចបន្ថែមត្រសក់ទៅសាឡាត់របស់អ្នក។ បន្ថែមនៅក្នុងសាំងវិច ឬកិនធ្វើទឹកត្រសក់ញុំាក៏បាន។ សម័យមុន ចាស់ៗតែងតែ ចិតត្រសក់យកមកបិទលើភ្នែកដើម្បីជួយរក្សាសម្រស់ ពីព្រោះសម័យនោះមិនទាន់សូវសម្បូរគ្រឿងថែសម្រស់ដូចឥឡូវទេ ហើយពួកគាត់គិតថា ការធ្វើបែបនេះ គឺ ដើម្បីបន្ធូរអារម្មណ៍ និងមានអារម្មណ៍ថាមានជាតិទឹកត្រជាក់ៗនៅលើភ្នែកគាត់។

ទី៤ប៉េងប៉ោះ

មនុស្សជាច្រើនគិតថា ប៉េងប៉ោះគឺជាបន្លែ សូម្បីក្រុមអ្នកជំនាញអាហារូបត្ថម្ភ ក៏ពួកគាត់ចាត់ទុកថាជាបន្លែដែរ ក៏ប៉ុន្តែតាមរុក្ខសាស្ត្រ វាគឺជាសមាជិកនៃគ្រួសារផ្លែឈើ។ មូលហេតុដែលប៉េងប៉ោះជួយឱ្យសាច់យើងស្អាត ក្មេងជាងវ័យ គឺដោយសារវាជាផ្លែឈើដែលសម្បូរវីតាមីនស៊ី ជួយជំរុញការផលិតកូឡាជេនស្បែក ជាតិជូរនៃប៉េងប៉ោះ ជួយជម្រុះកោសិកាចាស់ៗនៃស្បែក និងជួយផលិតកោសិកាថ្មីៗសម្រាប់ស្បែកបានលឿនបំផុត។​​​ ល្អជាងនេះ គឺវាជួយបង្រួមរន្ធញើសរបស់ស្បែក និងប្រឆាំងរ៉ាឌីកាល់សេរី ដោយសារវាមានសារធាតុប្រឆាំងអុកស៊ីតកម្ម lycopene ការញុំាប៉េងប៉ោះញឹកញាប់ ប្រៀបដូចការបញ្ចូលវីតាមីនឱ្យស្បែកអញ្ចឹង។

ចំពោះផ្លែឈើ ឬបន្លែខាងលើដែលបានលើកឡើងនេះ បងប្អូនចូលចិត្តមួយណា បងប្អូនអាចជ្រើសញុំាតាមចំណង់ចំណូលចិត្ត។​ ចំពោះអត្ថប្រយោជន៍គឺ ល្អៗដូចគ្នា ដូច្នេះបងប្អូនអាចធ្វើការជ្រើសរើសបាន៕

អត្ថបទស្រាវជ្រាវដោយ៖ តឹក ស៊ីថា 

ប្រភពដកស្រង់៖ News18