បញ្ចប់ការសិក្សាថ្នាក់ទី១២ភ្លាម សិស្សឈ្មោះ សៀវ គឹមហ៊ាង បានបន្តការសិក្សាថ្នាក់បរិញ្ញាបត្រគីមីវិទ្យានៅសាកលវិទ្យាល័យភូមិន្ទភ្នំពេញនៅក្នុងទីក្រុងភ្នំពេញ។ បញ្ចប់ការសិក្សា ធ្វើការបានមួយរយៈពេលធំ កញ្ញាសៀវ គឹមហ៊ាង បានបំប្លែងខ្លួនទៅជាអ្នករកស៊ីវ័យក្មេង ដែលច្នៃជំនាញរបស់ខ្លួនឱ្យកើតប្រយោជន៍សម្រាប់ប្រជាជនខ្មែរ និងសហគមន៍ខ្មែរ ក្លាយជាថៅកែ​(ស្ថាបនិក)ក្រុមហ៊ុនគីមឈឺ ខេមបូឌា។ តើសិស្សមួយរូបនេះឆ្លងកាត់អ្វីខ្លះ មានប្រវត្តិបែបណាខ្លះទើបបានចេញពីកន្លែងការងារមករកស៊ីខ្លួនឯងបែបនេះ នៅក្នុងអត្ថបទនេះបងប្អូននឹងបានអានលម្អិតពីកិច្ចសម្ភាសផ្ទាល់រវាង Healthy Cambodia និងកញ្ញា សៀវ គឹមហ៊ាង។

កញ្ញាសៀវ គឹមហ៊ាង គឺជាសិស្សធម្មតាមួយរូប ដែលរៀនចប់មានបំណងចេញធ្វើការមួយដើម្បីជាអាជីពជាប់ខ្លួន។ កាលៈទេសៈប្រែប្រួល កញ្ញាបានក្លាយជាថៅកែក្រុមហ៊ុនទាំងវ័យក្មេង ទោះបីជាក្រុមហ៊ុនគីមឈី ខេមបូឌា ជាក្រុមហ៊ុនលក្ខណៈStart Upក៏ដោយ, ប៉ុន្តែកញ្ញាមានចក្ខុវិស័យ និងបេសកម្មធំសម្រាប់ខ្លួនឯង ពលរដ្ឋខ្មែរ និងសហគមន៍ខ្មែរទាំងមូល។ ក្រោយរៀបចប់ ធ្វើការជាអ្នកវិភាគគីមីនៅក្នុងមន្ទីរពិសោធន៍មួយកន្លែង នៅអំឡុងពេលវីរុសកូវីដ១៩វាយលុក កញ្ញាក៏ជួបប្រទះនូវបញ្ហាមួយដូចបុគ្គលិកផ្សេងៗទៀតដែរ គឺការបាត់បង់ប្រាក់ចំណូលមួយផ្នែក។

ជាបុគ្គលិកធ្វើការ ពឹងប្រាក់ខែក្រុមហ៊ុនដែលជាប្រភពចំណូលតែមួយគត់សម្រាប់ខ្លួនឯង និងគ្រួសារ នៅពេលក្រុមហ៊ុនមានវិបត្តិ ខ្លួនឯងក៏មានវិបត្តិទៅដូចគ្នាដែរ។ ខណៈពេលនោះហើយដែលជម្រុញចិត្តឱ្យកញ្ញាសៀវ គឹមហ៊ាង ភ្ញាក់ខ្លួនថា ខ្លួនឯងរៀនចប់ហើយ មានជំនាញខ្លះដែរ មិនគួរតែនៅធ្វើការឱ្យគេរហូតទេ តែត្រូវតែមានប្រភពចំណូលបន្ថែម ហើយចំណូលដែលខ្លួនរកស៊ីនោះត្រូវតែផ្តល់ប្រយោជន៍ទៅដល់សង្គមដែលខ្លួនឯងរស់នៅ។ ចំណូលចិត្ត បូកនឹងជំនាញជម្រុញឱ្យកញ្ញាចាប់យកអាជីវកម្មនៅក្នុងវិស័យម្ហូបអាហារ គឺផលិតគីមឈីរូបមន្តកូរ៉េដោយប្រើវត្ថុធាតុដើមរបស់ខ្មែរ។ គីមឈីស្ពៃបូកគោ និងគីមឈីឆៃថាវ គឺជាផលិតផលម្ហូបអាហារដែលផលិតដោយកូនខ្មែរ វត្ថុធាតុដើមរបស់កសិករខ្មែរតាមរូបមន្តជនជាតិកូរ៉េ។

គីមឈីគ្រាន់តែជារបស់ញ៉ាំសាមញ្ញធម្មតា តែនិសិត្សជំនាញគីមីវិទ្យារូបនេះបានធ្វើឱ្យគីមឈីមានចំណុចពិសេស ចំណុចទាក់ទាញគួរឱ្យចាប់អារម្មណ៍ គ្រាន់តែស្តាប់ចប់ហើយគឺចង់ញ៉ាំតែម្តង។ ពោលគឺមិនត្រឹមតែផ្តល់នូវ គុណភាព តម្លៃ អនាម័យនិងរសជាតិដែលល្អបំផុតនោះទេ តែគីមឈី ខេមបូឌា ថែមទាំងផ្តោតយកចិត្តទុកដាក់យ៉ាងតឹងរ៉ឹងទៅលើការវេចខ្ចប់ ការទុកដាក់ ដែលងាយស្រួលបំផុតអាចបំពេញតម្រូវការអតិថិជនបានលឿន រហ័ស ងាយស្រួល និងរក្សារសជាតិដើម ទៅកាន់គ្រប់តំបន់ទូទាំងប្រទេសកម្ពុជា។

កញ្ញាសៀវ គឹមហ៊ាង ស្ថាបនិកក្រុមហ៊ុនគីមឈី ខេមបូឌា ក៏បានប្រាប់ពីចំណុចពិសេសរបស់ខ្លួនដែលគ្មាននៅលើទីផ្សារផ្សេង សូម្បីតែជនជាតិដើមក៏គ្មានចំណុចពិសេសទាំងនេះដែរ។ ពោលគឺ គីមឈី ខេមបូឌា មានវេបសាយពីគីមឈីដើម្បីឱ្យអតិថិជន បងប្អូនចូលទៅអានជាចំណេះដឹងបន្ថែម របៀបធ្វើម្ហូបពាក់ព័ន្ធនឹងគីមឈីជាច្រើនដែលមានតែ១គត់នៅកម្ពុជា។ លើសពីនេះ គីមឈី ខេមបូឌា បានបន្ថែមជាមួយនឹងចំណិតខ្ទឹម ស ដែលជាចំណូលចិត្តរបស់ប្រជាជនខ្មែរ ញ៉ាំចូលមាត់ទៅស្រួយ ឆ្ញាញ់ ឆ្ងុយតែម្តង ហើយមួយវិញទៀតនោះគឺរក្សាទុកបានយូរដល់ទៅ៣ខែ (៩០ថ្ងៃ) ដោយមិនបាច់បារម្ភថាគីមឈីនឹងខូច រសជាតិជូរខ្លាំងញ៉ាំមិនកើត ឬលែងស្រួយនោះទេ។ ញ៉ាំពេលណាក៏ឆ្ញាញ់ ញ៉ាំជាមួយអ្វីក៏បាន។

ជាចុងក្រោយ ស្ថាបនិកក្រុមហ៊ុនគីមឈី ខេមបូឌា ក៏បានប្រាប់ពីបំណងធំបំផុតរបស់ខ្លួនក្នុងការបង្កើតក្រុមហ៊ុននេះឡើងគឺដើម្បីបង្ហាញឱ្យប្រជាជនខ្មែរយើងបានដឹងថា ខ្មែរពិតជាអាចធ្វើបាន។ យើងអាចផលិតគីមឈី ដែលមានរសជាតិឆ្ញាញ់ តម្លៃសមរម្យ ហើយអាចបំពេញតម្រូវការប្រជាជនពេញប្រទេសកម្ពុជាដោយមិនចាំបាច់នាំចូលពីក្រៅប្រទេសនោះទេ។ ម្យ៉ាងវិញទៀត ម្ហូបអាហារសំខាន់ណាស់សម្រាប់ជីវិតរបស់នៅប្រចាំថ្ងៃក្នុងការមានសុខភាពល្អ មិនមានជំងឺដង្កាត់ ហេតុនេះគីមឈី ខេមបូឌានឹងចូលទៅបម្រើតម្រូវការអ្នកញ៉ាំកុំឱ្យបារម្ភពីបញ្ហាផ្សេងៗឡើយ សម្រាប់គីមឈី ខេមបូឌា សុខភាព និងអាយុជីវិតអ្នកញ៉ាំគឺជារឿងដែលសំខាន់ និងចាំបាច់បំផុត៕

អត្ថបទដោយ៖ កញ្ញា លីហួយ