អំឡុងពេលកូវីដ១៩បិទខ្ទប់នេះប្រជាជនចេញក្រៅផ្ទះមិនបាន ធ្វើឱ្យអ្នកចូលចិត្តទទួលទានកាហ្វេពិបាកក្នុងការរកកាហ្វេល្អញ៉ាំ ទើបបែរមកញ៉ាំាកាហ្វេកញ្ចប់ដែលងាយស្រួលក្នុងការស្វែងរកនិងធ្វើដោយខ្លួនឯង ហើយវាក៏ជាជម្រើសដែលសុវត្ថិភាពសម្រាប់អំឡុងពេលកូវីដ១៩រាតត្បាតនេះផងដែរ ប៉ុន្តែចម្ងល់នៅត្រង់ថា តើកាហ្វេកញ្ចប់ខុសពីកាហ្វេគ្រាប់ដូចម្តេចខ្លះ? “តើការញ៉ាំកាហ្វេកញ្ចប់ច្រើនក្នុង១ថ្ងៃមានផលប៉ះពាល់ដល់សុខភាពឬទេ?”

កាហ្វេបន្ទាន់ ឬនៅកម្ពុជាតែងហៅថាកាហ្វេកញ្ចប់គឺជាពពួកកាហ្វេទាំងឡាយណា ដែលវេចខ្ចប់ជាល្បាយរួចស្រេចនៅក្នុងដប កែវ ឬកញ្ចប់ហើយអតិថិជនអាចទិញទៅបន្ថែមទឹកក្តៅគឺអាចទទួលទានបាន ខុសពីកាហ្វេគ្រាន់ដែលត្រូវឆ្លងកាត់ច្រើនដំណាក់កាលមុនពេលបានជាកាហ្វេមួយកែវ។ បើយោងតាមគេហទំព័រសុខភាពដ៏ល្បីHealthlineបានឱ្យដឹងថា កាហ្វេកញ្ចប់ទោះបីជាលឿនជាង ស្រួលជាង និងថោកជាង ប៉ុន្តែអត្ថប្រយោជន៏ចំពោះសុខភាពដែលបានមកពីកាហ្វេក៏មិនសូវខុសគ្នាពីកាហ្វេគ្រាប់ដែរ។

១.កាហ្វេកញ្ចប់មានផ្ទុកសារធាតុប្រឆាំងអុកស៊ីតកម្មនិងសារធាតុចិញ្ចឹម

ដូចកាហ្វេទូទៅដែរ កាហ្វេកញ្ចប់គឺជាប្រភពដ៏ធំបំផុតនៃសារធាតុប្រឆាំងអុកស៊ីតកម្មដែលជួយយ៉ាងខ្លាំងទៅដល់សុខភាព។ លើសពីនេះកាហ្វេកញ្ចប់ក្នុង១មួយពែងស្តង់ដារមានត្រឹមតែ ៧ កាឡូរីប៉ុណ្ណោះ និងមានបរិមាណប៉ូតាស្យូម ម៉ាញ៉េស្យូម និងនីណូទីនផងដែរ។

២.កាហ្វេកញ្ចប់ផ្ទុកសារធាតុកាហ្វេអ៊ីនតិចជាង

កាហ្វេកញ្ចប់មានផ្ទុកជាតិកាហ្វេអ៊ីនតិចជាងកាហ្វេធម្មតាបន្តិច។ ជាតិកាហ្វេអ៊ីនគឺជាភ្នាក់ងាររំញោចដែលត្រូវបានគេប្រើប្រាស់យ៉ាងទូលំទូលាយបំផុតនៅលើពិភពលោកហើយ កាហ្វេកញ្ចប់មួយពែងឬស្មើរនឹងម្សៅកាហ្វេមួយស្លាបព្រាកាហ្វេអាចផ្ទុកជាតិកាហ្វេអ៊ីន ៣០-៩០ មីលីក្រាមចំណែកកាហ្វេធម្មតាមួយពែងមាន ៧០–១៤០ មីលីក្រាម។ ជាតិកាហ្វេអ៊ីនច្រើនពេកក៏អាចបណ្តាលឱ្យមានការថប់បារម្ភ រំខានដល់ដំណេក មិនស្រួលខ្លួន ឈឺក្រពះ ញ័រនិងចង្វាក់បេះដូងលោតលឿន ដូចនេះការជ្រើសរើសយកកាហ្វេកញ្ចប់ក៏ជាការល្អមួយផងដែរ។

លើសពីនេះ កាហ្វេកញ្ចប់ក៏មាននូវមុខងារជាជំនួយជាច្រើនទៀតទៅដល់សុខភាពដូចជា បង្កើនមុខងារខួរក្បាល, ជំរុញការរំលាយអាហារបានល្អ, កាត់បន្ថយហានិភ័យនៃជំងឺសរសៃប្រសាទ, បន្ថយហានិភ័យជំងឺទឹកនោមផ្អែម អាចជួយកាត់បន្ថយហានិភ័យនៃការវិវត្តទៅជាជំងឺទឹកនោមផ្អែមប្រភេទទី ២, កាត់បន្ថយហានិភ័យនៃជំងឺថ្លើមដូចជាជម្ងឺក្រិនថ្លើមនិងមហារីកថ្លើម, ជួយដល់សុខភាពផ្លូវចិត្ត និងបន្ថយការធ្វើអត្តឃាត ហើយព្រមទាំងអាចជួយឱ្យអ្នកមានអាយុវែង ផងដែរ។

សូមរម្លឹកផងដែរថា លោក ឧកញ៉ា វេជ្ជបណ្ឌិត គួច ម៉េងលី ក៏ធ្លាប់បានមានប្រសាសន៍ដែរថា កាហ្វេមានអត្ថប្រយយោជន៍ច្រើនណាស់ចំពោះសុខភាពបើយើងផឹកបានត្រឹមត្រូវ។ សូម្បីតែក្លិនដែលហៅថាអារ៉ូមា ភាគច្រើនយើងចូលចិត្តហិតមុនពេលផឹកកាហ្វេនោះក៏អាចមានលទ្ធភាពជួយទប់ស្កាត់រោគមហារីកផងដែរ, ហើយកាហ្វេដដែលនោះអាចជួយឱ្យខួរក្បាល ការគិត រាងកាយរបស់យើងភ្លឺស្វាង ស្រលះល្អ។​ អ្វីដែលកាន់តែពិសេសកាហ្វេ អាចជួយកាហ្វេរោគញ័រដៃញ័រជើងនៅពេលដែលយើងចាស់ទៅ ថែមទាំងអាចជួយព្យាបាលរោគភ្លេចច្រើន និងមុខងារច្រើនផ្សេងទៀត៕

អត្ថបទដោយ៖ កញ្ញា​ លីហួយ