កាលពីពេលកន្លងមកនេះ ប្រទេសថៃកំពុងតែជួបស្ថានភាពវឹកវរនៃការឆ្លងវីរុសកូវីដ១៩ ប្រភេទបំប្លែងខ្លួនថ្មីគឺ ដែលតា។ វីរុសដែលតានេះបានធ្វើឱ្យប្រទេសថៃមានអ្នកស្លាប់តាមថ្នល់ ខ្វះពេទ្យព្យាបាល និងបិទខ្ទប់ខេត្តក្រុងមួយចំនួនទៀតផង លុះមកដល់ប៉ុន្មានថ្ងៃចុងក្រោយនេះ ថៃបានរកឃើញនូវរុក្ខជាតិបុរាណម្យ៉ាងដែលគេពិសោធន៏ឃើញថា រុក្ខជាតិមួយប្រភេទនេះអាចព្យាបាលកូវីដជាសះស្បើយបានយ៉ាងមានប្រសិទ្ធភាព រហូតដល់ឧបនាយករដ្ឋមន្រ្តីថៃគ្រោងឱ្យប្រជាជនដាំដុះវាបន្ថែមជាង៨ពាន់រ៉ៃទៀត។

នៅព្រឹកថ្ងៃទី២២ ខែកក្កដា ឆ្នាំ២០២១នេះ បាងកកផុស បានចុះផ្សាយអំពីនាយករដ្ឋមន្រ្តីថៃ លោកប្រាយុទ្ធ ចាន់អូរចា បានដាក់បញ្ជាឱ្យបង្កើតគណៈកម្មាធិការដើម្បីសិក្សាពីការប្រើប្រាស់ថ្នាំរុក្ខជាតិប្រមាត់មនុស្ស (Andrographis paniculata) ដើម្បីព្យាបាលអ្នកជំងឺ កូវីដ១៩ដែលស្ថិតក្នុងដំណាក់កាលដំបូងនិងស្រាល។ ក្នុងនោះ ឧបនាយករដ្ឋមន្រ្តីនិងរដ្ឋមន្រ្តីសុខភាពសាធារណៈ លោក Anutin Charnvirakul ត្រូវបានតែងតាំងជាប្រធានគណៈកម្មាធិការ។ គម្រោងមួយនេះនឹងផ្តោតទៅលើការសិក្សានៃការប្រើឱសថនេះ រួមទាំងចង់លើកស្ទួយឱសថបុរាណរបស់ខ្លួនផងដែរ។

ការដាក់ឱ្យប្រើឱសថបុរាណព្យាបាលកូវីដនេះ ត្រូវបានធ្វើឡើងដើម្បីឆ្លើយតបទៅនឹងសំណើរបស់រដ្ឋមន្ត្រីក្រសួងយុត្តិធម៌ លោកSomsak Thepsutin ដោយសារបញ្ហាផ្ទុះកូវីដនេះកើតឡើងចំពេលកង្វះវ៉ាក់ស៊ាំងដែលនាំឱ្យមានការរិះគន់ដល់រដ្ឋាភិបាល។ រដ្ឋមន្ត្រីក្រសួងយុត្តិធម៌ប្រទេសថៃបានយករបាយការណ៍ពី នាយកដ្ឋានកែតម្រូវបង្ហាញពី ការព្យាបាលអ្នកទោសចំនួន១២.៣៧៦នាក់ដែលបានឆ្លងកូវីដ ជាសះស្បើយ១០០%ដោយប្រើប្រាស់រុក្ខជាតិប្រមាត់មនុស្សនេះ។ ហើយមុននឹងដាក់ថ្នាំនេះព្យាបាលឱ្យអ្នកទោស រដ្ឋមន្ត្រីក្រសួងយុត្តិធម៌រូបនេះក៏បាន សិក្សាព័ត៌មានពីនាយកដ្ឋានឱសថបុរាណនិងវេជ្ជសាស្ត្រថៃដែលបានណែនាំឱ្យប្រើចំនួន ១៨០មីលីក្រាមឱសថប្រមាត់មនុស្សនេះរយៈពេល ៥ ថ្ងៃជាប់ៗគ្នាដល់អ្នកជំងឺដែលមានរោគសញ្ញាស្រាល ហើយក៏ទទួលបានជោគជ័យ។

ក្រោយបានធ្វើការសិក្សាស្រាវជ្រាវបានឱ្យដឹងថា រុក្ខជាតិប្រមាត់មនុស្សមួយនេះនៅក្នុង១រ៉ៃអាចប្រមូលផលបាន៦០០គីឡូក្រាម ហើយអាចចម្រាញ់ចេញជាឱសថព្យាបាលបានចំនួន ៣៧៥,០០០គ្រាប់។ រដ្ឋមន្រ្តីរូបនេះបានបន្ថែមថា “យើងត្រូវការឱសថនេះ ៣,១ពាន់លានគ្រាប់ទើបអាចគ្រប់គ្រាន់សម្រាប់ប្រជាជនថៃគ្រប់គ្នា ដែលនឹងត្រូវដាំបន្ថែមលើដីចំនួន៨៤០០រ៉ៃទៀត”។ ក្នុងរយៈពេល៤ខែខាងមុខ រដ្ឋមន្រ្តីក្រសួងយុត្តិធម៌ក៏បាននឹងគ្រោង ផលិតឱសថប្រមាត់មនុស្សនេះចំនួន៥០លានគ្រាប់ទៀត ដើម្បីបំពេញ៥០%នៃប្រជាជនដែលកំពុងជាប់ពន្ធធនាគារ។

គូសបញ្ជាក់ផងដែរថា ដោយសារតែរុក្ខជាតិប្រមាត់មនុស្សនេះមានប្រសិទ្ធភាពខ្ពស់បែបនេះ វាត្រូវបានគេហៅថាជា ដំណាំលុយ ដែលកំពុងតែជាតម្រូវការក្នុងការនាំចេញទៅក្រៅប្រទេស ចំណែកឯតម្លៃវិញគឺ ៤៥០សិបបាតក្នុងមួយគីឡូក្រាម៕