សព្វថ្ងៃនេះ មនុស្សជាច្រើបាក់ទឹកចិត្ត ហើយប្រែជាទៅជាកើតជំងឺផ្លូវចិត្តខ្លាំងឡើង។ នៅរស់មានតែស្នាមញញឹមសំបកខាងក្រៅ និយាយលេងសើចជាមួយអ្នកដទៃដូចជាធម្មតា ប៉ុន្តែនៅក្នុងខ្លួនវិញ មានការឈឺចាប់ អារម្មណ៍តានតឹង និងស្រ្តេសខ្លាំង...។ បញ្ហាទាំងអស់នេះ អាចដោះស្រាយបាន បើតាមលោក Héctor García និងលោក Francesc Miralles មានរបៀបរស់នៅបែបថ្មី ជួយជីវិតជៀសវាងអារម្មណ៍អវិជ្ជមានបានល្អបំផុត៖
មនុស្សមានបញ្ហាផ្លូវចិត្តមូលហេតុមកពីរងសម្ពាធបញ្ហាច្រើនជាន់លើគ្នា បញ្ហាមួយហើយ ជាន់មួយទៀត នាំឱ្យអារម្មណ៍ចុះខ្សោយ។ តាមលោក Héctor García និង Francesc Miralles បានបញ្ជាក់ថា បើអ្នករស់នៅចេះប្រកាន់យកភាពសុទិដ្ឋិនិយម ឬគំនិតវិជ្ជមាន ជីវិតអ្នកនឹងរស់នៅមានសុភមង្គល។ ពួកលោកបានបញ្ជាក់ឱ្យដឹងពីការរស់នៅឱ្យមានអារម្មណ៍រីករាយពេលព្រឹកថា ពេលខ្ញុំក្រោកពីដេកប្រាប់ខ្លួនឯងថា ថ្ងៃនេះ ជាថ្ងៃធ្វើឱ្យខ្ញុំមានអារម្មណ៍ជាថាមពល មានសុខភាព និងមានក្តីសុខ។ ដូច្នេះហើយ ការរស់នៅបែបនេះ នាំឱ្យខ្ញុំចាត់ទុកថា ខ្លួនឯងនៅក្មេង ជាមនុស្សមានថាមពល។ ទោះបីខ្ញុំមានការងារជាច្រើនត្រូវធ្វើក៏ដោយ ក៏ខ្ញុំសប្បាយចិត្តដែរ។”
ខ្ញុំនឹងលើកគំនិតវិជ្ជមានជាច្រើនពីសៀវភៅ ikiga ពីការរស់នៅរបស់ជនជាតិជប៉ុននៅកោះអូគីណាវ៉ាបានណែនាំឱ្យលោកអ្នកដឹងពីសិល្បៈប្រើជីវិតរស់នៅក្នុងភាពវិជ្ជមាន នេះជាគំនិតលោកអ្នកគួរប្រកាន់ខ្ជាប់ សម្រាប់ជីវិតខ្លួនឯង៖
១. ខ្ញុំចូលចិត្តសើច វាជារឿងសំខាន់ក្នុងជីវិតខ្ញុំ។ ហើយខ្ញុំសើចគ្រប់ទីកន្លែងដែលខ្ញុំអាចធ្វើទៅបាន។
២. ខ្ញុំមានគំនិតវិជ្ជមានថា ខ្ញុំនឹងរស់នៅបានអាយុ ១០០ឆ្នាំ។ ហើយខ្ញុំរស់នៅដល់ពេលនេះ ខ្ញុំមានអាយុ១០០ឆ្នាំជាងហើយ។ នេះជាថាមពលលើកទឹកចិត្តពីគំនិតវិជ្ជមានរបស់ខ្ញុំ។
៣. ខ្ញុំចូលចិត្តរាំ ការច្រៀង លេងជាមួយចៅៗ និងរស់នៅជុំគ្រួសារ វាជារឿងរីករាយបំផុតក្នុងជីវិតរបស់ខ្ញុំ។”
៤. ខ្ញុំមានភ័ព្វសំណាងខ្លាំងណាស់ បានកើតមកនៅទីនេះ។ ហើយខ្ញុំនឹងធ្វើការងារស្ម័គ្រចិត្ត ដើម្បីតបស្នងឱ្យភូមិរបស់ខ្ញុំវិញ។
៥. ខ្ញុំគ្មានអាថ៌កំបាំងអ្វីទេ អ្វីដែលសំខាន់សម្រាប់ខ្ញុំនោះ គឺមានជីវិតរស់នៅគ្រប់គ្រាន់ទៅហើយ។
លោកអ្នកច្បាស់ជាឃើញថា ទោះបីជាជីវិតពួកគេរស់នៅបែបណា ក៏ពួកគាត់គិតថា ជីវិតនេះជាសំណាងដែរ នេះជាគំនិតវិជ្ជមានរបស់ពួកគេ។ បើអ្នកគិតថា ជីវិតខ្ញុំកើតក្នុងគ្រួសារក្រីក្រ ខ្ញុំគ្មានសមត្ថភាពពូកែ ខ្ញុំរៀនអន់ណាស់ ខ្ញុំមានបញ្ហាច្រើណាស់ និងខ្ញុំគ្មានលុយច្រើនដូចគេ... បើលោកអ្នកគិតបែបនេះ វាធ្វើឱ្យជីវិតកាន់តែអាក្រក់។ ព្រោះគំនិតអាក្រក់ មិនដែលនាំឱ្យជីវិតល្អនោះទេ។ មនុស្សមានសំណាង រស់នៅមានក្តីសុខ និងរកលុយបានច្រើន មិនមែនពួកគេគ្មានបញ្ហាទេ គឺមានបញ្ហាច្រើនដូចអ្នក និងច្រើនជាងអ្នកផងដែរ ប៉ុន្តែពួកគេព្យាយាមជម្នះបញ្ហានឹង ដើម្បីឈានជើងទៅរកអនាគតល្អប្រសើរឡើង៕
អត្ថបទដោយ៖ ទ្រ សុភាព