យោងតាមការចែករំលែក​របស់ អ្នកឧកញ៉ាវេជ្ជបណ្ឌិត គួច​ ម៉េងលី ក្នុងបណ្ដាញសង្គមយូធូប​​បានឱ្យដឹងថា ប្រមាត់ជាភាសាអង់គ្លេសគេហៅថា Gallbladder ដោយប្រមាត់គឺតជាប់ទៅនឹងថ្លើម ហើយជាទូទៅមុននឹងឈានដល់ថ្នាក់ការវះកាត់ប្រមាត់ចេញមានកត្តាជាច្រើន ហើយប្រសិនណាជាមានការវះកាត់ក៏មិនមានបញ្ហាអ្វីខ្លាំងនោះទេ គ្រាន់តែឧស្សាហ៍មានអាការៈរាគ ចុកពោះ ទល់លាមក…ជាដើម។

លោកវេជ្ជបណ្ឌិតបានបន្ថែមទៀតថា ចំពោះរូបរាងរបស់ប្រមាត់គឺ​ ប្រហែលធំជាងមេដៃរបស់យើងបន្តិច តែប្រវែងរបស់វា​ធំល្មមប្រហែលជា៤​ថ្នាំងដៃរបស់យើង។​ តួនាទីរបស់ប្រមាត់ គឺចាំស្តុកទុកទឹកប្រមាត់ដែលផលិតចេញពីថ្លើម ហើយទឹកប្រមាត់នឹងត្រូវបានបញ្ជូនទៅពោះវៀនតូចផ្ទាល់ ដើម្បីជួយក្នុងការរំលាយអាហារ។ ជាពិសេស គឺជួយស្រូបយកជាតិខ្លាញ់ដែលមិនល្អចេញនៅពេលយើងញុំាអាហារ​ ក៏ដូចជាជញ្ជូនខ្លាញ់ល្អ​ និងប្រូតេអ៊ីនទៅក្នុងរាងកាយវិញបានយ៉ាងប្រសើរ។​

រោគសញ្ញាមានបញ្ហាគ្រួសនៅក្នុងប្រមាត់មានដូចជា៖ ឈឺចុកខ្លាំងនៅក្នុងទ្រូង ធ្លាយទៅដល់ឆ្អឹងខ្នងខាងក្រោយ​ រាគ​ ក្អួត អស់កម្លាំង ក្ដៅខ្លួន លាមកមានពណ៌សភ្លឺ ទឹកនោមមានពណ៌ក្រម៉ៅ​ ព្រឺរងា និងជាសញ្ញាគ្រោះថ្នាក់ប្រសិនបើអាការៈមិនបាត់រយៈពេល៥ ម៉ោង គេអាចសន្និដ្ឋានបានថា ​ជាអាចមកពីបញ្ហាប្រមាត់។

នេះបើយោងតាមរយៈគេហទំព័រ healthline បានឱ្យដឹងថា ចំពោះជំងឺនេះទៀតសោតភាគច្រើនតែងកើតលើស្រីៗជាងបុរស មកពីកត្តា ប្រើប្រាស់ថ្នាំពន្យាកំណើតច្រើន ឬក៏ប្រើប្រាស់អរម៉ូនព្យាបាលជំងឺជាដើម។​

-សម្រាប់អ្នកមានបញ្ហាគ្រួសក្នុងប្រមាត់ ឬក៏មិនមានដើម្បីការពារ និងកាត់បន្ថយហានិភ័យគួរតែញុំាអាហារប្រភេទទាំងនេះ៖

-ប្រភេទអាហារដែលមានមានជាតិសរសៃខ្ពស់ដូចជា បន្លែផ្លែឈើ

-អាហារសម្បូរខ្លាញ់ល្អៗដូចជាប្រភេទត្រី សាលម៉ុន ត្រីធូណា សាឌីនជាដើម

-ព្យាយាមញុំាអាហារឱ្យទៀង៖ មានន័យថាបើត្រូវញុំាអាហារពេលព្រឹកម៉ោង៧គួរមានទម្លាប់ញុំាបែបហ្នឹងរាល់ថ្ងៃ​

-កុំផឹកស្រា៖ ហាមអ្នកជំងឺគ្រួសក្នុងប្រមាត់ផឹក ស្រា​ឬក៏ផឹកដែរ​ តែក្នុងកម្រិតមួយតិចតួចបានហើយ ប្រយ័ត្នជំងឺមិនងាយជាសះស្បើយ ប៉ះពាល់ទាំងការងារ ការសិក្សា ជាពិសេសសុខភាពទ្រុឌទ្រោមខ្លាំង។

គូសបញ្ជាក់ផងដែរថា រាល់អាការដែលមានរៀបរាប់ខាងលើនេះគឺជាបញ្ហាជំងឺគ្រួសក្នុងប្រមាត់ កុំចេះតែគិតថាឈឺក្រពះៗ ព្រោះជំងឺនេះបើទុកយូរអាចប្រឈមនឹងធ្វើការវះកាត់យកប្រមាត់ចេញ ហើយប្រសិនបងប្អូនវះកាត់សរីរាង្គនេះចេញ គឺត្រូវប្រយ័ត្នក្នុងការញុំាអាហារខ្លាំងណាស់ ព្រោះងាយ​រាក ក្អួតខុសធម្មតា៕

អត្ថបទដោយ៖ ប៉ែត ធីតា