សព្វថ្ងៃនេះ ប្រជាជនខ្មែរមួយចំនួនកំពុងតែជួបបញ្ហាផ្លូវចិត្ត ឬមានជំងឺផ្លូវចិត្តដោយពុំដឹងខ្លួន។ ដោយហេតុពួកគាត់មិនសូវបានយល់ដឹងអំពីសុខភាពផ្លូវចិត្តនៅឡើយ។ តាមវេជ្ជបណ្ឌិត ស៊ុយ សុវឌ្ឍនា ជាអ្នកឯកទេសវិកលវិទ្យាបានមានប្រសាសន៍ថា បញ្ហាផ្លូវចិត្ត និងជំងឺផ្លូវចិត្តគឺអាចកើតមានលើមនុស្សគ្រប់រូប គ្រប់វ័យ ទាំងកុមារ ទាំងយុវវ័យ ទាំងមនុស្សចាស់ និងគ្រប់ជាតិសាស្រ្តទូទាំងសកល។

លោកស្រីក៏បានលើកឡើងដោយយោងទៅតាមការសិក្សាស្រាវជ្រាវរបស់អង្គការសុខភាពពិភពលោក បានបង្ហាញក្តីព្រួយបារម្ភអំពីសុខភាពផ្លូវចិត្តយ៉ាងខ្លាំង ដោយហេតុក្នុងឆ្នាំ២០២១ នឹង២០២៣ ទិន្នន័យដែលបានសិក្សាជាសកលបានឱ្យដឹងថា ការធ្វើអត្តឃាតដែលបណ្តាលមកពីជំងឺផ្លូវចិត្តគឺស្ថិតនៅលំដាប់ថ្នាក់ទី៤ នៃការបាត់បង់ធនធានមនុស្ស ដែលពួកគាត់ភាគច្រើនសុទ្ធសឹងជាយុវវ័យចន្លោះពី១៥-២៩ឆ្នាំ។ 

លោកស្រីក៏បានបញ្ចាក់ផងដែរថាអត្រាយុវវ័យទូទាំងពិភពលោក មានរហូតដល់ 1.2ពាន់លាននាក់ ដែលក្នុងនោះចំនួនយុវវ័យចន្លោះពី 5% ទៅ 13% ដែលប្រឈមនឹងជំងឺផ្លូវចិត្ត។ ហើយជំងឺផ្លូវចិត្តដែលឈានដល់ការធ្វើអត្តឃាតនេះភាគច្រើនគឺជំងឺធ្លាក់ទឹកចិត្ត ។ ដូច្នេះយើងគួរតែដឹងនិងយល់ឱ្យច្បាស់អំពីនិយមន័យនៃសុខភាពផ្លូវចិត្ត នឹងនិយមន័យនៃជំងឺផ្លូវចិត្ត ។

ឧទាហរណ៍ : តើអ្វីទៅជាជំងឺធ្លាក់ទឹកចិត្ត?

ជំងឺបាក់ទឹកចិត្ត ជាជំងឺមួយក្នុងចំនោមជំងឺផ្លូវចិត្តដែលធ្វើអោយមានបម្រែបម្រួលលើការគិត. អារម្មណ៍ អាកប្បកិរិយា ដូចជា ការសោកសៅខ្លាំង បាត់បង់នូវចំណាប់អារម្មណ៍ជុំវិញខ្លួន ការងារថយចុះ ចលនាយឺតយ៉ាវ និងអាចប៉ះពាល់ដល់មុខងាររាង្គកាយផ្សេងទៀតផងដែរ។

សញ្ញានៃការធ្លាក់ទឹកចិត្តគឺចាប់ពី២សប្តាហ៍ឡើងទៅ ហើយសញ្ញាដែលគួរស្វែងយល់ ខ្លីៗ និងខ្លឹម អំពីជំងឺធ្លាក់ទឹកចិត្តនោះគឺ

1. ករគិត អវិជ្ចមាន : បន្ទោសខ្លួនឯង , គិតថាខ្លួនគ្មានតម្លៃ, អស់សង្ឃឹមក្នុងជីវិត………..
2. អារម្មណ៍: សោកសៅខ្លាំង បាត់បង់ចំណាប់អារម្មណ៍ជាមួយរបស់ជុំវិញខ្លួន ( Depressed mood , lose of interest)
3. ពិបាកគេង , ចំណង់ចំណីអាហារប្រែប្រួល ( poor sleep and appétits )
4. ចង់ធ្វើអត្តឃាត ( Suicidal thought)

យ៉ាងណាមិញ ជីវិតមនុស្សគ្រប់រូបគឺមិនអាចគេចអំពីភាពតានតឹងបាននោះ យើងអាចតានតឹងនឹងភាពលំបាក ភាពនឿយហត់នឹងការងារ សំពាធគ្រួសារ វិបត្តិហិរញ្ញវត្ថុ ការជះឥទ្ធិពលពីកត្តាបរិស្ថានដែលយើងរស់នៅ -ល- ភាពសោកសៅជារឿងមួយដែលមនុស្សគ្រប់រូបតែងតែជួបប្រទះ។

មនុស្សគ្រប់រូបអាចនឹងមានអារម្មណ៍សោកសៅ ក្រៀមក្រំ ពិបាកចិត្ត នៅពេលដែលបាត់បង់របស់ជាទីស្រលាញ់ សមាជិកគ្រួសារ ឬ បញ្ហាណាមួយក្នុងជីវិតរស់នៅ ដែលតម្រូវឱ្យពួកគាត់ត្រូវតែជួបនឹងការតទល់ជាមួយស្ថានភាពទាំងនោះ។ ហើយបុគ្គលដែលមានជំងឺផ្លូវចិត្តគឺមិនមែនបណ្តាលមកពីការទន់ជ្រាយ ឬយ៉ាងណានោះទេក៏ប៉ុន្តែកត្តាដែលធ្វើឱ្យបុគ្គលណាម្នាក់មានជំងឺផ្លូវចិត្ត ជំងឺធ្លាក់ទឹកចិត្ត នោះគឺបណ្តាលមកពីកត្តារួមគ្នា ៣ យ៉ាង :

1. កត្តា ជីវសាស្រ្ត ( បំរែបំរួលរចនាសម្ព័ននៃសារធាតុគីមីសាស្រ្តក្នុងប្រព័ន្ធខួរក្បាល បំរែបំរួលរហ័សអរម៉ូន)
2. កត្តាចិត្តសាស្រ្ត ដែលសំដៅលើសម្មត្ថភាពនៃការដោះស្រាយបញ្ហារបស់បុគ្គលម្នាក់ៗ រួមមានបទពិសោធន៍ជីវិត ចំណេះដឹង ឬការយល់ដឹងអំពីសុខភាពផ្លូវចិត្ត , សុខភាពរាងកាយ
3. កត្តាសង្គមសាស្រ្ត គឺសំដៅបរិស្ថានដែលយើងរស់នៅ មាមដូចជា សង្គមគ្រួសារ ,សង្គមការងារ ,សាលារៀន , ការប្រើប្រាស់បណ្ណាញសង្គម ជាដើម ។

-      ចំនែកកត្តាបន្ទាប់បន្សំរួមមាន  ការញ៉ាំស្រា ជាប្រចាំ ឬប្រើដើម្បីអោយសប្បាយ បំបាត់ទុក , ការប្រើសារធាតុញៀន នឹងជំងឺប្រចាំកាយ មួយចំនួនដែលរ៉ាំរ៉ៃ ។

មូលហេតុទាំងបីនេះហើយ ដែលអាចអោយគាត់កើតជំងឺផ្លូវចិត្ត។ ជាដំណោះស្រាយដើម្បីទប់ស្កាត់នៃការវិវត្តន៍ធ្ងន់ធ្ងរនៃជំងឺ៖

- ធ្វើលំហាត់ប្រាណជាប្រចាំ ឬហាត់យូហ្គា និងសម្រាកកាយនិងចិត្តតាមធម្មជាតិ

- ការធ្វើរបបអាហារឲ្យមានតុល្យភាពមានបន្ថែមស្រស់ៗ បន្លែឈើ និងត្រី

-រៀបចំបន្ទប់គេងឱ្យបានល្អ និងព្យាយាមគេងឱ្យទៀងម៉ោង

- កុំញុំាគ្រឿងស្រវឹង ឬគ្រឿងញៀន

-ជជែកកម្សាន្ត ឬបង្កើតបរិយាកាសសប្បាយៗជាមួយមនុស្សជុំវិញ៕

- ស្វែងរកវេជ្ជបណ្ឌិត ឬអ្នកចិត្តសាស្រ្ត ដើម្បីផ្តល់ការប្រឹក្សា

-ការព្យាបាលដោយការនិយាយ ការណែនាំ

-ប្រើឱសថដោយវេជ្ជបណ្ឌិតឯកទេស។

លោកស្រីបានផ្តល់នូវសារដ៏មានសារៈសំខាន់មួយផងដែរ ទៅកាន់ប្រជាជនទាំងអស់គ្នា សូមមេត្តាយកចិត្តទុកដាក់លើការថែទាំសុខភាពផ្លូវចិត្តអោយបានល្អប្រសើរ ព្រោះពិការភាពផ្លូវចិត្តក៏ជាកត្តាគ្រោះថ្នាក់មួយក្នុងការអភិវឌ្ឍន៍ប្រទេសជាតិរបស់យើងទាំងមូល ។ ត្រូវចាំថា សុខភាពផ្លូវចិត្ត និងសុខរាងកាយល្អបរិបូរណ៍ ទើបយើងអាចទទួលបានភាពពេញលេញនៃជីវិត និងរីកចម្រើនទៅបាន៕

អត្ថបទដោយ៖ ទ្រ សុភាព

Link Telegram ចុចខាងក្រោមនេះ ដើម្បីប្រឹក្សា https://t.me/wecarementalclinic

អត្ថបទដោយ៖ ទ្រ សុភាព