បញ្ហាពងបែក ឬដំបៅរលាកក្នុងមាត់ គឺជាដំបៅរាក់តូចៗកើតនៅលើអណ្តាត អញ្ចាញធ្មេញ សាច់ថ្ពាល់ខាងក្នុង បបូរមាត់ខាងក្នុង ឬក្រោមអណ្តាត។ ជាទូទៅដំបៅនេះមានទម្រង់​ពណ៌​ស លឿង ​ឬ​ក្រហម ទំហំ តិចជាង១មីលីម៉ែត្រ) ប៉ុន្តែអាចកើនឡើងដល់ ១/២អ៊ីញ ទៅ ១អ៊ីញនៅក្នុងអង្កត់ផ្ចិត។ ចំពោះបញ្ហានៃដំបៅក្នុងមាត់អាចបង្កឱ្យអ្នកជំងឺឈឺចាប់ខ្លាំងនៅក្នុងតំបន់ដែលបានកើត ពិបាកក្នុងការញុំាអាហារ ឬអាចបណ្ដាលឱ្យក្តៅខ្លួនឡើងកូនកណ្តុរនៅក...ជាដើម។

តួយ៉ាង ផ្អែកទៅតាមប្រភព clevelandclinic បានពន្យល់ឱ្យដឹងថា ចំពោះប្រភេទដំបៅដែលកើតមាននេះ ភាគច្រើនគឺកើតមានឡើងលើមនុស្សវ័យជំទង់ និងមនុស្សក្នុងវ័យ ២០ឆ្នាំ ដោយស្ត្រីមានអត្រាប្រឈមនឹងការងាយកើតជាងបុរស ប្រសិនបើផ្អែកទៅលើការផ្លាស់ប្តូរអ័រម៉ូន។ ដំបៅដែលកើតមាននេះដែរ អ្នកជំនាញពុំទាន់រកឃើញមូលហេតុជាក់លាក់ណាមួយមកបង្ហាញនូវឡើងទេ ក៏ប៉ុន្តែក្នុងលក្ខខណ្ឌដំបៅមួយចំនួនធំ អ្នកជំនាញវេជ្ជសាស្ត្រក៏បានរកឃើញកត្តាគួបផ្សំចម្បងៗ៥ ដែលបង្កឱ្យងាយកើតដំបៅក្នុងមាត់ញឹកញាប់៖

១. ភាពតានតឹងខ្លាំង

២. របួសខាងក្នុងមាត់ មកពីការទំពាអាហារខាំចំផ្នែកណាមួយនៅក្នុងមាត់បណ្ដាលឱ្យក្លាយជាដំបៅ

៣. ញុំាអាហារដែលមានជាតិអាស៊ីត ដូចជាផ្លែក្រូច ភេសជ្ជៈមានជាតិហ្គាស ស្រា...ជាដើម

៤. ប្រើថ្នាំប្រឆាំងនឹងការរលាកញឹកញាប់

៥. ប្រើប្រាស់ឧបករណ៍សម្អាតមាត់មិនល្អដូចជា ច្រាសដុសធ្មេញ ទឹកខ្ពុរមាត់ ថ្នាំដុសធ្មេញ...។

ដោយឡែក ក្នុងករណីខ្លះបញ្ហាដំបៅមាត់នេះ អាចផ្សារភ្ជាប់ទាក់ទងនឹងបញ្ហាសុខភាពមួយចំនួនរួមមាន៖ អ្នកជំងឺលុយពីស ជំងឺអេដស៍ ជំងឺរលាកពោះវៀនធំ កង្វះសារជាតិចិញ្ចឹមដូច វីតាមីនB12 ស័ង្កសី អាស៊ីតហ្វូលិក ឬជាតិដែក...ជាដើម។

ចំពោះដំណោះស្រាយព្យាបាលរោគបំបៅកម្រិតស្រាល គឺអាចធ្វើនៅផ្ទះដោយខ្លួនឯងបានដោយគ្រាន់តែអនុវត្តន៍វិធីសាស្ត្រជាប្រចាំមួយចំនួនដូចជា៖

-ខ្ពុរមាត់ជាមួយនឹងទឹកអំបិលឱ្យបានញឹកញាប់

-ប្រើថ្នាំដែលបានណែនាំពីវេជ្ជសាស្ត្រឱ្យបានត្រឹម

-ចៀសវាងអាហារ ដែលមានជាតិអាស៊ីត ឬហឹរ ដែលអាចបណ្តាលឱ្យរលាក និងឈឺចាប់ថែមទៀត

-លាបទឹកកកលើដំបៅ ដោយអនុញ្ញាតឱ្យទឹកកករលាយបន្តិចម្តងៗលើដំបៅ ដើម្បីជួយកាត់បន្ថយភាពឈឺចាប់នៅពេលដែលវាស្ពឹក

-ដុសធ្មេញថ្នមៗ ដោយច្រាសប្រភេទទន់ស្តើង និងថ្នាំដុសធ្មេញដែលគ្មានសារធាតុពពុះ

-ផឹកទឹកឱ្យបានច្រើន និងញុំាអាហារដែលសម្បូរទៅដោយសារធាតុវីតាមីន B12 ស័ង្កសី និងជាតិដែកឱ្យបានគ្រប់គ្រាន់។

គូសបញ្ជាក់បន្ថែមផងដែរថា បញ្ហាដំបៅមាត់នេះ វានឹងបាត់ទៅវិញដោយឯកឯងក្នុងរយៈពេល២សប្តាហ៍ បើទោះបីជាពុំទទួលការព្យាបាលអ្វីក៏ដោយ ក៏ប៉ុន្តែក្នុងអំឡុងពេលដែលវាកើតនេះ នឹងបង្កជាបញ្ហាឈឺចាប់អ្នកជំងឺពិបាក ជាពិសេសក្នុងការទទួលទានអាហារ៕

ប្រភពបន្ថែម៖ mayoclinic

អត្ថបទដោយ៖ ប៉ាវ ភក្តី