ប្រេងដូង ត្រូវបានមនុស្សជាច្រើនមិនថានៅប៉ែកអាស៊ី ឬអឺរ៉ុបនោះទេ តែងជ្រើសយកមកប្រើយ៉ាងទូលំទូលាយសម្រាប់ជំនួយសុខភាព និងសម្រស់របស់ខ្លួនទៅតាមតម្រូវការផ្សេងៗ។ ទន្ទឹមនឹងនេះដែរ សមត្ថភាពប្រេងដូង បានធ្វើឱ្យគេជឿថា អាចជួយបំប៉នដល់សុខភាពបេះដូង ពង្រឹងកោសិកាស្បែក និងបង្ការបញ្ហាឆ្លងរោគបាក់តេរីជាដើម។

ទាក់ទិននឹងលក្ខណៈពិសេសខាងលើ ថ្ងៃនេះ​ Healthy Cambodia នឹងលើកយកនូវអត្ថប្រយោជន៍នៃការប្រើប្រេងដូងតាម២របៀប ដែលដកស្រង់ចេញប្រភព healthline.com ៖

១. ជំនួយសុខភាពផ្នែកខាងក្នុង៖ អាស៊ីតខ្លាញ់នៅក្នុងប្រេងដូងអាចជម្រុញឱ្យរាងកាយដុតបំផ្លាញជាតិខ្លាញ់ ផ្តល់ថាមពលរហ័សដល់រាងកាយ និងខួរក្បាល បង្កើនកូលេស្តេរ៉ុល HDL (ល្អ) នៅក្នុងឈាមដែលអាចជួយកាត់បន្ថយហានិភ័យនៃជំងឺបេះដូង។ ការទទួលទានប្រេងដូង ជំនួសឱ្យប្រេងដទៃទៀតសម្រាប់ម្ហូបអាហារប្រចាំថ្ងៃ ជួយជម្រុញសុខភាពបេះដូង និងខួរក្បាលឱ្យដើរបានល្អ បង្ការហានិភ័យជំងឺគាំងបេះដូង និងសរសៃប្រសាទនាពេលអនាគត។

២. ជំនួយសុខភាពខាងក្រៅ៖ ការសិក្សាមួយបានបង្ហាញថា ប្រេងដូងអាចដោះស្រាយបញ្ហាស្បែកស្ងួតគ្មានសំណើម បន្តឹងស្បែកមុខ កម្ចាត់ស្នាម និងភាពជ្រីញជ្រួញបានដោយប្រសិទ្ធភាព។ ម្យ៉ាងវិញទៀតប្រេងដូងក៏អាចការពារការខូចខាតសក់ផងដែរ។ ជាងនេះទៅទៀត ប្រសិទ្ធភាពរបស់ប្រេងដូង​ ត្រូវបានចាត់ដូចជាឡេការពារកម្តៅថ្ងៃដែលរារាំងប្រហែល ២០% នៃកាំរស្មីអ៊ុលត្រាវីយូ (ព្រះអាទិត្យ) និងបំបាត់បញ្ហាបបូរមាត់ខ្មៅ ឬប្រេះ។

បន្ថែមជាមួយគ្នានេះ ដើម្បីកាត់បន្ថយការចំណាយប្រាក់កាក់ច្រើនលើការជាវផលិតផលប្រេងដូងពីទីផ្សារមក Healthy Cambodia ក៏បានស្រាវជ្រាវបន្ថែមនូវរបៀបធ្វើប្រេងដូងនៅផ្ទះដោយខ្លួនឯងតាម២វិធីដូចខាងក្រោម៖

១. របៀបធ្វើប្រេងដូងតាមវិធីត្រជាក់៖ យកសាច់ដូងកន្លះគីឡូ ពូតយកទឹកជាមួយនឹងទឹកក្តៅឧណ្ឌៗ១លីត្រកន្លះ យកខ្ទិះដូងដែលពូតបាននោះ ច្រកដាក់ដបទុកចោល១យប់។ នៅពេលព្រឹកអ្នកនឹងឃើញខ្ទិះដូងដែលទុកចោលនោះញែកល្បាយចេញជា៣ ដោយផ្នែកខាងលើបំផុតជាក្បាលខ្ទិះខាប់ ផ្នែកកណ្ដាលជាប្រេងដូង និងផ្នែកខាងក្រោមជាល្បាយទឹកជូរផ្អូម។ ហេតុដូច្នេះហើយ អ្នកត្រូវដួសល្បាយទី១ចេញ បន្ទាប់មកដួសយកតែល្បាយទី២ដែលជាប្រេងដូង ចំណែកឯល្បាយទី៣ក៏ត្រូវចោលដូចគ្នា។ គូសបញ្ជាក់ឱ្យដឹងបន្ថែមទៀតថា ប្រេងដូងដែលអ្នកដួសនោះ ប្រាកដជានៅមានលាយជាមួយនឹងល្បាយទី១ និងទី៣ អាស្រ័យហេតុនេះអ្នកត្រូវយកវាទៅច្រោះជាមួយនឹងស្បៃ ហើយប្រសិនបើវានៅមានលាយជានឹងល្បាយទឹក អ្នកអាចយកទៅរម្ងាស់ដាក់ភ្លើងតិចៗរយៈពេល៥នាទី រួចយកទៅច្រោះជានឹងស្បៃម្តងទៀត ដើម្បីទទួលបានប្រេងដូងសុទ្ធ។

២. របៀបធ្វើប្រេងដូងតាមវិធីក្តៅ៖ យកសាច់ដូងកន្លះគីឡូ ពូតយកទឹកជាមួយនឹងទឹក១លីត្រកន្លះ យកខ្ទិះដូងនោះទៅដាក់រំងាស់ចោលរហូតរីងសល់តែសមាសធាតុប្រេងដូង បន្ទាប់មកត្រងយកតែសមាសធាតុប្រេងដូងសុទ្ធជាការស្រេច។ គួរបន្ថែមឱ្យដឹងដែរថា អំឡុងពេលរំងាស់ដំបូងអ្នកអាចប្រើភ្លើងខ្លាំងរហូតដល់ខះទឹក ក្រោយពីនោះអ្នកគួរបន្ថយភ្លើងឱ្យមកតិចរម្ងាស់ទាល់តែប្រេងដូងឡើងពណ៌លឿងស្រាល ព្រោះថា ពេលដែលប្រេងដូងឡើងបានពណ៌ល្អបែបនេះ អាចរក្សាទុកបានយូរ និងមិនមានក្លិនផ្តុស។

គុណវិបត្តិ គុណសម្បត្តិនៃការធ្វើប្រេងដូងតាមវិធីត្រជាក់ និងវិធីក្តៅ មានលក្ខណៈខុសៗគ្នា ដោយប្រេងដូងធ្វើតាមវិធីត្រជាក់សម្បូរទៅដោយវីតាមីនជាង ពីព្រោះថា អំឡុងពេលដែលយើងរម្ងាស់សារធាតុវីតាមីនមួយចំនួនអាចនឹងបាត់បង់ ក៏ប៉ុន្តែប្រេងដូងតាមវិធីត្រជាក់ អាចនឹងមានក្លិនផ្តុស៕