ទម្លាប់រស់នៅប្រចាំថ្ងៃ​ មានទំនាក់ទំនងយ៉ាងជិតស្និទ្ធ ជាមួយស្ថានភាពសុខភាពរបស់មនុស្សយើង ។ មានជំងឺជាច្រើន បានកើតឡើងតាមរយៈទម្លាប់មិនល្អប្រចាំថ្ងៃ ដែលមនុស្សភាពច្រើនគិតថាមិនអីៗ តែតាមពិតវាបានបង្កឲ្យប៉ះពាល់ដល់សុខភាពយ៉ាងធ្ងន់ធ្ងរ ។ ខាងក្រោមជាទម្លាប់ទាំង៥ ដែលបានបំផ្លាញសុខភាពខួរក្បាល ដោយមិនដឹងខ្លួនបាន ។

១. វិបត្តិដំណេក៖ អ្នកដែលមានទម្លាប់គេងមិនបានទៀងទាត់ និងមិនបានគ្រប់គ្រាន់ បានបង្កឲ្យមានផលអវិជ្ជមានយ៉ាងច្រើនដល់សុខភាព ជាពិសេសសុខភាពខួរក្បាល​ ។ ក្នុងករណីលោកអ្នកមានវិបត្តិដំណេក សូមកាត់បន្ថយការញ៉ាំស្រា ភេសជ្ជៈមានជាតិ caffeine និងកាត់បន្ថយការមើលទូរស័ព្ទ ជាពិសេសនៅពេលយប់​​។​

២. ទម្លាប់នៅម្នាក់ឯងច្រើនពេក៖ ការដែលមានទម្លាប់នៅម្នាក់ឯងរយៈពេលយូរ វាអាចធ្វើឲ្យខួរក្បាលមិនសូវមានសកម្មភាពបានល្អ ដែលជាហេតុនាំឲ្យចុះខ្សោយការចងចាំ ។ លោកអ្នកអាចស្វែងរកមិត្តភ័ក្រ្តជិតស្និទ្ធ ដើម្បីជជែក កម្សាន្ត រឿងសប្បាយរីករាយ ឬហាត់ប្រាណ និងលេងកីឡា សកម្មភាពទាំងនេះជួយឲ្យខួរក្បាលមានដំណើរការល្អប្រសើរ ។

៣.  របបចំណីអាហារមិនត្រឹមត្រូវ៖ សុខភាពខួរក្បាលមានទំនាក់ទំនង ជាមួយរបបចំណីអាហារប្រចាំថ្ងៃ ។ ទម្លាប់ញ៉ាំអាហារដែលសម្បូរដោយជាតិស្ករ និងជាតិខ្លាញ់ខ្ពស់ វាបានបង្កខួរក្បាលចុះខ្សោយមុខងារក្នុងការចងចាំ និងប៉ះពាល់ដល់កោសិការបស់ខួរក្បាល ។

៤. ទម្លាប់ស្ដាប់កាសលឺៗពេក៖ ទម្លាប់ប្រើកាសស្ដាប់ ដោយបើកសម្លេងលឺៗខ្លាំងពេក វាមិនត្រឹមតែបង្កឲ្យមានផលប៉ះពាល់ដល់ត្រចៀកប៉ុណ្ណោះទេ តែវាបានបង្កឲ្យមានផលប៉ះពាល់យ៉ាងធ្ងន់ធ្ងរដល់សុខភាពខួរក្បាលផងដែរ ។ លោកអ្នកគួរស្ដាប់ក្នុងកម្រិតសម្លេង តិចជាង៦០ភាគរយ និងមិនឲ្យលើសពី២ម៉ោងទើបជាការប្រសើរ ។

៥. កង្វះលំហាត់ប្រាណ៖ ការហាត់ប្រាណបានទៀងទាត់ អាចជួយកាត់បន្ថយហានិភ័យ នៃជំងឺច្រើនប្រភេទ ដូចជាជំងឺទឹកនោមផ្អែម ជំងឺបេះដូង ជំងឺលើសសម្ពាធឈាម និងជួយឲ្យខួរក្បាលបំពេញាការងារបានល្អប្រសើរ ៕

អត្ថបទដោយ៖ ហួ ភារ៉ា ប្រភព៖ www.webmd.com