តើការបណ្ដោយឱ្យកូនតូចៗមើលទូរទស្សន៍ធ្វើឱ្យប៉ះពាល់អ្វីខ្លះដល់ពួកគេ? នេះជាសំណួរដែលឪពុកម្ដាយគ្រប់គ្នាតែងតែសួរមកកាន់ចាបបៃតង។ អ់ីចឹងថ្ងៃនេះយើងនឹងមកស្រាយចម្ងល់មួយនេះទាំងអស់គ្នា។

ជាការពិតណាស់ បើយោងតាមការបង្ហោះឃ្លីបវីឌីអូនៅលើ TikTok របស់កំពូលតារាចម្រៀងដែលជាបេះដូងរបស់ប្រជាជនកម្ពុជាគឺអ្នកស្រី ឱក សុគន្ធកញ្ញា បានបង្ហើបពីទម្លាប់នៃការមើលថែទាំកូនប្រុសជាទីស្រលាញ់របស់អ្នកស្រីថា អ្នកស្រីតែងទម្លាប់់ឱ្យកូនតូចជាទីស្រលាញ់របស់ខ្លួនមើលទូរទស្សន៍ ហើយនិងមើលទូរស័ព្ទនៅពេលដែលកូនរបស់អ្នកស្រីមានអាយុ ១ខួបជាងតែប៉ុណ្ណោះ។

ជាមួយគ្នានេះដែរ អ្នកស្រី ឱក សុគន្ធកញ្ញា បានបញ្ជាក់នៅក្នុងវីឌីអូរបស់អ្នកស្រីយ៉ាងដូច្នេះថា មូលហេតុដែលអ្នកស្រីអនុញ្ញាតឱ្យកូនជាទីស្រលាញ់របស់ខ្លួនមើលទូរទស្សន៍តាំងពីតូច ក៏ព្រោះតែអ្នកស្រីព្យាយាមបង្រៀនកូនឱ្យចេះស្ដាប់ចម្រៀង ដើម្បីជាការកម្សាន្ត ហើយឱ្យកូនតូចរបស់ខ្លួនមើលវីឌីអូតុកត្តាដូចជា តុកត្តាបង្រៀនរាប់ABC តុកត្តាបង្រៀនច្រៀងចម្រៀងកូនក្មេង និងតុកត្តាបង្រៀនកូននិយាយជាដើម។

ពិតមែនហើយ អ្នកស្រី ឱក សុគន្ធកញ្ញា បានបញ្ជាក់ច្បាស់ៗថា ការដែលអ្នកស្រីធ្វើបែបនេះ គឺដើម្បីឱ្យកូន​ស្គាល់នៅឈ្មោះវត្ថុ ឬក៏សត្វ។ ដែលមានន័យថា សត្វនេះជាសត្វខ្លា សត្វនោះជាសត្វដំរី ឬក៏វត្ថុ នេះគឺជាច្រាស់ដុះធ្មេញគេប្រើដើម្បីសម្អាតធ្មេញនៅពេលកូនធំឡើងជាដើម។

មិនតែប៉ុណ្ណោះទេ អ្នកស្រី ឱក សុគន្ធកញ្ញា បានប្រាប់បន្ថែមថែមផងដែរថា រាល់ពេលដែលកូនមើលទូរទស្សន៍ម្តងៗ អ្នកស្រីជាមួយនឹងស្វាមីមិនបណ្ដោយឱ្យកូនមើលម្នាក់ឯងនោះទេ ផ្ទួយទៅវិញអ្នកស្រីជាមួយនឹងស្វាមីតែងតែកំដរកូនមើល និងប្រាប់កូនអំពីរូបភាពនៃវីឌីអូនោះដូចជា សកម្មភាពនៃការច្រៀង សកម្មភាពនៃការរាំ របៀបការពាររាងកាយ របៀបកក់សក់ របៀបដុសធ្មេញ ឬក៏សកម្មភាពណាខ្លះដែលត្រូវធ្វើមុនចូលគេងជាដើម។

ជារួមមក នៅពេលដែលឪពុកម្ដាយអនុវត្តទម្លាប់បែបនេះ គឺមិនធ្វើឱ្យកូនរបស់អ្នកអាចញៀននឹងឧបករណ៍អេឡិច ត្រូនិចនោះទេ។ ជាក់ស្ដែងដូចដែលអ្នកស្រី ឱក សុគន្ធកញ្ញា បានរៀបរាប់ខាងលើអ៉ីចឹង គឺនៅពេលដែលអង្គុយមើល វីឌីអូ ឪពុកម្ដាយត្រូវព្យាយាមអង្គុយក្បែរកូន ដើម្បីពន្យល់អំពីរូបភាពអ្វីមួយ នោះកូនងាយចងចាំ ងាយស្គាល់ និងងាយយល់ជាដើម។ ដូចដែលអ្នកស្រី ឱក សុគន្ធកញ្ញា បានបង្រៀនឱ្យកូនស្គាល់ថ្នាំដុសធ្មេញអ៉ីចឹង ដែលកូនរបស់អ្នកស្រីស្គាល់ថ្នាំដុះធ្មេញតាំងពីមិនគ្រប់អាយុដុះធ្មេញទៅទៀត។

ជាការពិតណាស់អ្នកស្រី ឱក សុគន្ធកញ្ញា បានបញ្ជាក់បន្ថែមថា របៀបដែលឪពុកម្ដាយបង្រៀនកូនតាមរយៈការមើលទូរទស្សន៍នេះ អ្នកគ្រប់គ្នាត្រូវចាំថា នៅពេលដែលកូនមើលម្តងៗ សូមបងប្អូនចៀសវាងទុកកូនឱ្យមើលម្នាក់ឯងឱ្យ សោះ។ ដូច្នេះនៅពេលដែលកូនជាទីស្រលាញ់របស់ខ្លួនកំពុងមើលទូរទស្សន៍ យើងជាឪពុកម្ដាយត្រូវព្យាយាមពន្យល់កូនមួយៗថា រូបភាពនេះជារូបភាពអ្វីៗ រូបភាពនោះជារូបភាពអ្វី ដែលឪពុកម្ដាយគ្រប់គ្នាត្រូវបង្រៀនកូនឱ្យស្គាល់ពីផ្លែឈើ ស្គាល់ពីសត្វជាដើម។

គួរបញ្ជាក់ផងដែរថា អ្នកស្រី ឱក សុគន្ធកញ្ញា បានសម្រាលកូនបុត្រកាលពីថ្ងៃទី១១ ខែវិច្ឆិកា ឆ្នាំ២០១៩ វេលាម៉ោង ១និង៣០នាទីថ្ងៃត្រង់នៅមន្ទីរពេទ្យបំរ៉ុងរ៉ាត់ ប្រទេសថៃ។ ជាមួយគ្នានេះដែរ អ្នកស្រី និងស្វាមីបានដាក់ឈ្មោះក្រៅឱ្យកូនប្រុសរបស់ពួកគេថា “ឆាលី ឬអូនបុត្រ”។

អត្ថបទដោយ៖ Daddy_Rath