លោកយាយ Joyce Johnson និងលោកយាយ Rosa Facciuto ជាភស្តុតាងបញ្ជាក់ថា មនុស្សរស់នៅមានអាយុវែងព្រោះតែអារម្មណ៍។ អារម្មណ៍នេះមានឥទ្ធិពលអាចធ្វើឱ្យមនុស្សប្រែប្រួលរូបរាងកាយ និងអាយុវែង ឬអាយុខ្លីផងដែរ។ នេះជាអាថ៌កំបាំងធ្វើឱ្យលោកយាយទាំង ២នាក់ មានអាយុវែង រស់នៅមានក្តីសុខផ្លូវចិត្តបំផុត។

លោកយាយទាំងពីរនាក់នៅក្នុងរដ្ឋ Washington ថ្មីៗនេះ បានប្រារព្ធខួបកំណើតអាយុ ១០៥ ឆ្នាំរបស់ពួកគាត់ថ្មីៗនេះដែរ។ លោកយាយ Joyce Johnson ប្តីបានស្លាប់អស់រយៈពេល ៤២ឆ្នាំមកហើយ។ បច្ចុប្បន្ននេះ គាត់បន្តធ្វើការងារជាអ្នកគ្រប់គ្រងការិយាល័យនៅក្នុងស្ថានីយ៍វិទ្យុក្នុងស្រុកមួយ ការចាប់ផ្តើមអាជីពមួយនេះមានរយៈពេល ៣០ឆ្នាំ។ លោកយាយមានកូនបីនាក់ និងចៅទួត៨នាក់។ លោកយាយប្រាប់ថា ខ្ញុំអាយុវែងព្រោះតែមានកូនរបស់ខ្ញុំ។ ហើយខ្ញុំមានគ្រួសារជាអ្នកផ្តល់កម្លាំងចិត្តដល់ខ្ញុំរស់នៅមានក្តីសុខបំផុត។

នៅក្នុង​ចំណោមសេចក្តីសុខនោះដែរ លោកយាយមាន​សមាជិកជាច្រើនទៀតគ្រាន់កំដរអារម្មណ៍ គឺសត្វចិញ្ចឹមលោកយាយមានច្រើនណាស់។ ជាពិសេសកូនឆ្កែតូចមានឈ្មោះថា Lola។ មានរឿងមួយទៀត ឱ្យគាត់អាយុវែងគឺគាត់ចូលចិត្តតែងកំណាព្យ ហើយគាត់បានបោះពុម្ភកម្រស្នាដៃកំណាព្យនៅអាយុ ៨០ឆ្នាំផងដែរ។

ចំណែកលោកយាយ Rosa Facciuto បាននិយាយថា ជីវិតខ្ញុំរស់នៅមានក្តីសុខបំផុត ព្រោះតែខ្ញុំជាប់រវល់ធ្វើដំណើរ មិនមែនអង្គុយលេងនោះទេ។ លោកយាយ Facciuto តែងតែបើកឡាន និងមួយខែគាត់បើកឡាន ១០៥ម៉ោង។ ព្រោះគាត់សប្បាយពេលគាត់បានធ្វើដំណើរទៅតំបន់ផ្សេងៗជាច្រើន។ ហើយគាត់ចូលដើរលឿនដូចជាអ្នករត់ហាត់ប្រាណ។ គាត់ថា គាត់គ្មានអារម្មណ៍អត់ធ្មត់ច្រើនដើរមួយៗ យឺតនោះទេ វាមិនមែនជាទម្លាប់ខ្ញុំទេ។

លោកយាយបានបញ្ចប់ការសិក្សានៅឆ្នាំ ១៩៣៦ ហើយគាត់រស់នៅជាមួយប្តីរបស់គាត់ដោយមានអារម្មណ៍ថាមានសុភមង្គលណាស់។ លោកយាយទាំងពីរនេះ ប្រាប់ថា ការរក្សាអារម្មណ៍ឱ្យរីករាយចំពោះពេលបច្ចុប្បន្ននេះ ជីវិតយើងនឹងរស់នៅមានអាយុវែង។ លោកយាយ Facciuto បាននិយាយថា គ្រាន់តែសន្សំសេចក្តីល្អដាក់ចូលក្នុងជីវិត ជីវិតអ្នកនឹងមានក្តីសុខកាន់តែច្រើនឡើង៕

អត្ថបទដោយ៖ ទ្រ សុភាព