យោងតាមបណ្ឌិត្យសភាសម្ភពអាមេរិក (ACOG) មានប្រហែល ១៤–២៣% នៃស្ត្រីអំឡុងពេលមានផ្ទៃពោះ ត្រូវប្រឈមមុខនឹងរោគសញ្ញាដែលទាក់ទងនឹងជំងឺបាក់ទឹកចិត្ត។ យ៉ាងហោចណាស់មានស្ត្រី ១ នាក់ក្នុងចំណោម ៤ នាក់អាចប្រឈមជាមួយនឹងជំងឺបាក់ទឹកចិត្ត ដោយសារតែអតុល្យភាពអ័រម៉ូន និងបញ្ហាផ្សេងៗ។ នេះបើផ្អែកតាមការឱ្យដឹងពីប្រភព Americanpregnancy-org ។

ប្រសិនបើជំងឺបាក់ទឹកចិត្តមិនត្រូវបានព្យាបាលទេ វាអាចនាំឱ្យមានបញ្ហាផ្សេងៗដូចជា៖ ការទទួលទានអាហាររូបត្ថម្ភមិនគ្រប់គ្រាន់ ស្ត្រីអាចទៅជាផឹកស្រា ជក់បារី និងគិតខ្លីចង់បញ្ចប់ជីវិតខ្លួនឯង ឬចាប់ផ្ដើមមានទម្លាប់មិនល្អផ្សេងៗ។ វាអាចប៉ះពាល់ដល់ទារក ដោយធ្វើឱ្យកើតមិនគ្រប់ខែ ទម្ងន់ទាប និងបញ្ហាក្នុងការអភិវឌ្ឍន៍។

ចំពោះរោគសញ្ញាដែលគួរឱ្យប្រុងប្រយ័ត្នរួមមាន៖

1.    ស្ត្រីកើតមានទុក្ខព្រួយឥតឈប់ឈរ

2.    ពិបាកផ្តោតអារម្មណ៍

3.    គេងតិចពេក ឬច្រើនពេក

4.    បាត់ចំណាប់អារម្មណ៍លើសកម្មភាពដែលធ្លាប់ចូលចិត្ត

5.    គិតអវិជ្ជមាន ចង់ធ្វើអត្តឃាត

6.    មានអារម្មណ៍ថប់បារម្ភ

7.    មានអារម្មណ៍ថាមានកំហុស ឬគ្មានតម្លៃ

8.    ផ្លាស់ប្តូរទម្លាប់ក្នុងការញ៉ាំ។

ជំងឺបាក់ទឹកចិត្តអំឡុងពេលពពោះ ឬក្រោយសម្រាល អាចព្យាបាលបាន។ អ្វីដែលសំខាន់គឺការយកចិត្តទុកដាក់ពីស្ត្រីផ្ទាល់ ក្រុមគ្រួសារ និងមនុស្សជិតខាង ជាពិសេសគឺបុរសជាស្វាមី។

ហើយអ្វីដែលអាចជួយបានដើម្បីជៀសវាងពីការកើតជំងឺបាក់ទឹកចិត្តទាំងនៅក្នុងអំឡុងពេលពពោះ និងក្រោយសម្រាលអ្នកម្ដាយគ្រប់រូបគួរតែធ្វើ៖

1.    ធ្វើលំហាត់ប្រាណឱ្យបានសមរម្យ

2.    គេងឱ្យបានគ្រប់គ្រាន់

3.    ទទួលទានអាហារដែលមានសារធាតុចិញ្ចឹម និងអូមេហ្គា-៣

 ស្វែងរកជំនួយពីវេជ្ជបណ្ឌិតពាក់ព័ន្ធ៕