១. របៀបលាងសម្អាតត្រឹមត្រូវ៖ វេជ្ជបណ្ឌិត រួម វ៉ារី បានបញ្ជាក់ថា នៅពេលលាងសម្អាតត្រូវធ្វើតាមលំដាប់លំដោយដោយលាងពីផ្នែកខាងមុខទៅក្រោយ ដើម្បីកុំឱ្យមេរោគពីរន្ធលាមកឆ្លងចូលទៅទ្វាមាស។ លើសពីនេះ កុំប្រើទឹកដែលមានក្លិនក្រអូប ឬទឹកអនាម័យខ្លាំងពេក ព្រោះវាអាចធ្វើឱ្យមានការរលាក និងបំបាត់បាត់តេរីដែលល្អ។ ហើយពេលជូតត្រូវធ្វើថ្នមៗ តែផ្នែកខាងក្រៅប៉ុណ្ណោះ មិនត្រូវប្រើកម្លាំងលូកទៅតំបន់ដែលជ្រៅទេ។

២. ការជ្រើសរើសខោក្នុង៖ ជ្រើសរើសខោក្នុងក៏ជារឿងសំខាន់ផងដែរ អ្នកត្រូវជ្រើសរើសខោក្នុងដែលមានសាច់ក្រណាត់ទន់ និងមានខ្យល់អាចចេញចូលបាន មិនត្រូវរើសខោដែលស្លៀកទៅតឹងខ្លាំងពេកនោះទេ។ ជាពិសេស បន្ទាប់ពីចូលបង្គន់គួរតែលាងឱ្យបានស្អាត​ មុនពេលស្លៀកខោវិញ។ ខោត្រូវតែសម្អាតឱ្យបានស្អាតជាប្រចាំ ប្រសិនបើមិនមានការសម្អាតវាអាចនាំឱ្យមានមេរោគឆ្លងបាន។

៣. ការប្រើប្រាស់ផលិតផលសម្អាត៖ ទឹកអនាម័យអាចប្រើបាននៅពេលមានអារម្មណ៍ស្អុះស្អាប់ ប៉ុន្តែមិនគួរប្រើរៀងរាល់ថ្ងៃ ឬច្រើនដងក្នុងមួយថ្ងៃទេ។ ប្រើច្រើនពេកអាចបណ្ដាលឱ្យស្ងួតមាត់ស្បូន និងបាត់បាក់តេរីល្អ ដែលធម្មតាការពារតំបន់ទ្វារមាស។

៤. ការលាងសម្អាតជាប្រចាំ៖ ការលាងសម្អាតត្រូវតែធ្វើជាមួយទឹកស្អាត ឬទឹកក្ដៅឧណ្ហៗ គ្រប់គ្រាន់ មិនចាំបាច់ប្រើទឹកអនាម័យញឹកញាប់ទេ។ ពេលរួមភេទ គួរប្រើស្រោមអនាម័យ ដើម្បីការពារការឆ្លងជំងឺ។

ក្រៅពីការថែទាំប្រចាំថ្ងៃ ការរក្សាវិធីរស់នៅល្អក៏ជួយបានយ៉ាងច្រើនផងដែរ។ យោងតាម Healthline និង New Indian Express មានវិធីផ្សេងទៀតដែលស្ត្រីគួរតែយកចិត្តទុកដាក់ដូចជា៖ ពេលមករដូវ មិនគួរផឹកទឹកត្រជាក់ ឬលើករបស់ធ្ងន់។ មិនគួរញ៉ាំអាហារផ្អាប់ ឬងូតទឹកយូរជាង ១៥ នាទី។ ផ្លាស់សំឡី ឬក្រណាត់ទ្រាប់រៀងរាល់ ២ ម៉ោងម្ដង។ ផឹកទឹកក្តៅ ឧណ្ហៗ និងញ៉ាំបន្លែផ្លែឈើ។​ ជាមួយគ្នានេះ អ្នកក៏ត្រូវការរៀបចំរបបអារហារឱ្យបានត្រឹមត្រូវផងដែរ ចំពោះអាហារដែលអ្នកគួរតែកាត់បន្ថយរួមមានដូចជា៖ កាហ្វេអ៊ីន, អាហារកែច្នៃ ឬវេចខ្ចប់, ស្រា, បារី, ភេសជ្ជៈផ្អែមៗ។ ព្រោះអាហារទាំងនេះសុទ្ធអាចធ្វើឱ្យប៉ះពាល់សុខភាពបន្តពូជ បង្កឱ្យមានបញ្ហាពេលមានកូន ឬជំងឺមហារីកស្បូន ជាដើម។

ផ្ទុយទៅវិញ អាហារដែលនាំឱ្យមានសុខភាពល្អ ហើយអ្នកគួរតែញាំជាប្រចាំនោះគឺ៖ បន្លែ ផ្លែឈើស្រស់ ព្រោះវាសម្បូរទៅដោយវីតាមីន C, ទឹកដោះគោ, ស៊ុត, ត្រី, ថ្លើម សម្បូរទៅដោយវីតាមីន D, គ្រាប់ធញ្ញជាតិ, ប្រេងអូលីវ, ត្រីសាម៉ុន មានផ្ទុក អូមេហ្គា-៣ និងពពួកអាហារមានជាតិសរសៃ និងប្រូបាយអូទិច។ អាហារទាំងនេះជួយពង្រឹងសុខភាពមាត់ស្បូន និងជួយឱ្យប្រព័ន្ធបន្តពូជមានសមត្ថភាពល្អ។