ការពិសារកាហ្វេជារឿងពេញនិយមណាស់នៅស្រុកខ្មែរយើង។ មានសំណួរមួយសួរថា តើពិសារកាហ្វេពេលណាល្អសម្រាប់សុខភាពខួរក្បាល? តាមលោក Andrew Huberman ជាសាស្ត្រាចារ្យផ្នែកសរសៃប្រសាទ និងភ្នែកនៅសាលាវេជ្ជសាស្ត្រសាកលវិទ្យាល័យស្ទែនហ្វដបានលើកឡើងថា ការពន្យារពេលទទួលទានជាតិកាហ្វេអ៊ីនជាប្រភេទកាហ្វេក្តៅដែលរយៈពេល ៩០ទៅ១២០នាទីបន្ទាប់ពីអ្នកភ្ញាក់ពីគេងពេលព្រឹកនោះ ជួយដាស់ប្រព័ន្ធសរសៃប្រសាទឱ្យស្វាងពីការគេង ហើយសុខភាពខួរក្បាលរបស់អ្នកពូកែចងចាំ គិតបានលឿន និងបង្កើនថាមពលផ្នែកខួរក្បាលថែមទៀត។
ការរង់ចាំ ៩០ទៅ១២០នាទីបន្ទាប់ពីភ្ញាក់ពីគេង ហើយចាំទទួលទានជាតិកាហ្វេអ៊ីន។ ដូចជាអ្នកអនុញ្ញាតឱ្យអរម៉ូន cortisol (អរម៉ូនស្រ្តេស) នៅក្នុងរបស់រាងកាយអ្នកចុះខ្សោយ ព្រោះតែកាហ្វេជួយបង្កើនឥទ្ធិពលល្អផ្នែកអារម្មណ៍ដោយសារជាតិកាហ្វេអ៊ីននេះ។ ហើយលោក Huberman បានបញ្ជាក់ថា កាហ្វេក៏នាំផលប៉ះពាល់ដល់ដំណេកដែរ។ ចូរអ្នកព្យាយាមជៀសវាងជាតិកាហ្វេអ៊ីនក្នុងរយៈពេល ៨ទៅ១២ម៉ោងមុនពេលចូលគេង។
យោងតាមការស្រាវជ្រាវដែលចុះផ្សាយដោយគេហទំព័រHealthline បញ្ជាក់ពីអត្ថប្រយោជន៍ល្អបំផុតអ្នកផឹកកាហ្វេពេលព្រឹកជួយសុខភាពខួរក្បាលគឺកាត់បន្ថយហានិភ័យនៃជំងឺវងេ្វង ឬជំងឺភ្លេចភ្លាំង រហូតដល់៧០ភាគរយ (ក្នុងវ័យ៧០ឆ្នាំ)។ ហើយជាតិកាហ្វេនេះធ្វើឱ្យអារម្មណ៍របស់អ្នកភ្លឺថ្លាជួយប្រឆាំងនឹងជំងឺបាក់ទឹកចិត្តហើយកាត់បន្ថយហានិភ័យនៃអារម្មណ៍ធ្វើអត្តឃាតផងដែរ៕ អត្ថបទដោយ៖ ទ្រ សុភាព