ការហាត់ប្រាណល្អដល់សុខភាព។ ប៉ុន្តែការហាត់ប្រាណខុសក្បួនខុសបច្ចេកទេសក៏នាំបញ្ហាឈឺសន្លាក់ បាក់ឆ្អឹង ដាច់សរសៃឈាម និងគាំងបេះដូងបានដែរ។ តាមគេហទំព័រ vnexpress បានចុះផ្សាយថា បុរសម្នាក់មានអាយុ ២០ឆ្នាំបានគាំងបេះដូងអំឡុងពេលធ្វើលំហាត់ប្រាណ ព្រោះតែគាត់លើកលើសកម្រិតរាងកាយពេក ប៉ុន្តែគ្រួពេទ្យបានជួយសង្រ្គោះទានពេល។ តាមវេជ្ជបណ្ឌិត Doan Du Manh សមាជិកនៃសមាគមជំងឺសរសៃឈាមវៀតណាមបានបញ្ជាក់ថា ៣កំហុសនេះនាំបញ្ហាដល់សុខភាពនៅកន្លែងហាត់ប្រាណ៖
១. យុវជនជាច្រើនមានចិត្តគំនិតចង់យកឈ្នះលើដែនកំណត់របស់ខ្លួនពេក ក៏ខំលើកទម្ងន់ធ្ងន់ហើយបន្តធ្វើលំហាត់ប្រាណក្នុងកម្រិតខ្លាំងៗ ដោយមិនអើពើនឹងមូលដ្ឋានសុខភាពរបស់ខ្លួនសោះ។ ការខំលើសកម្រិតបែបនេះ ធ្វើឱ្យបេះដូងសម្ពាធធ្វើការខ្លាំង វាទាមទារអុកស៊ីហ្សែនច្រើនជាងធម្មតា នាំឱ្យចង្វាក់បេះដូងលោតញាប់ សរសៃឈាមរត់កាន់តែលឿនបញ្ចូលទៅរាងកាយ បើរាងកាយអ្នកមានស្ទុះជាតិខ្លាញ់នៅកន្លែងណាមួយនៅសរសៃបេះដូង នាំឱ្យបេះដូងរបស់អ្នគាំងលឿន។ សម្រាប់អ្នកមានជំងឺសរសៃឈាមបេះដូង ការប្រើកម្លាំងខ្លាំងពេកអាចបណ្តាលឱ្យបន្ទះប្រេះ ស្ទះសរសៃឈាម និងនាំឱ្យដាច់សរសៃឈាមខួរក្បាល ឬគាំងបេះដូងផងដែរ។
២. មនុស្សជាច្រើនតែងតែព្រងើយកន្តើយនឹងរោគសញ្ញាដូចជា ឈឺទ្រូងអំឡុងពេលហាត់ប្រាណ មានអារម្មណ៍ញ័រទ្រូង ដកដង្ហើមខ្លីៗ រាងវិលមុខ និងជិតដួលសន្លប់ផង មូលហេតុមកពីពួកគេអស់កម្លាំងលើសពីធម្មតា។ នេះអាចជាសញ្ញាព្រមាននៃបញ្ហាសរសៃឈាមបេះដូង។ បើការឈឺទ្រូងលើសពី ១០នាទី គួរសម្រាកឱ្យលឿន។
៣. អ្នកហាត់ប្រាណជាច្រើនប្រើអាហារបំប៉នមុនពេលហាត់ប្រាណដូចជាម្សៅប្រូតេអ៊ីនWhey លើសកម្រិត ហើយហាត់ប្រាណមិនអាចបញ្ចេញជាតិម្សៅប្រូតេអ៊ីននេះអស់ទេ ក៏ប៉ះពាល់ដល់សុខភាព។ ព្រោះសារធាតុទាំងនេះអាចបណ្តាលឱ្យស្ទះសរសៃឈាម និងប៉ះពាល់ដល់ចង្វាក់បេះដូងថែមទៀត។ មុនប្រើម្សៅប្រូអ៊ីនពង្រឹងសាច់ដុំ អ្នកគួរនិយាយជាមួយអ្នកជំនាញ និងគ្រូពេទ្យ ដើម្បីការពារសុខភាពបេះដូងរបស់អ្នកផងដែរ។
ការហាត់ប្រាណគឺល្អសម្រាប់សុខភាពរបស់អ្នក ប៉ុន្តែបើអ្នកហាត់ហួសកម្រិតអាចធ្វើឱ្យរាងកាយរបស់អ្នកប្រឈមនឹងហានិភ័យជាពិសេសបញ្ហាបេះដូង។ អ្នកហាត់ប្រាណគួរមានគ្រូជំនាញផ្ទាល់ខ្លួន និងទៅពិនិត្យសុខភាព ដើម្បីដឹងពីស្ថានភាពរាងកាយ ដើម្បីការពារជំងឺបេះដូងទុកជាមុន៕ អត្ថបទដោយ៖ ទ្រ សុភាព