រូបភាព៖ MalaysiaNow

សហរដ្ឋអាមេរិកកាលពីថ្ងៃច័ន្ទមានចំនួនករណីឆ្លងសរុបឡើងដល់លើស ១៨ លានករណី ស្លាប់យ៉ាងហោចណាស់ ៣១៩.១៩០ នាក់ ដែលក្នុងនោះករណីឆ្លងថ្មីមួយថ្ងៃៗយ៉ាងហោចណាស់ ២១៥.៧០០ នាក់ និងស្លាប់យ៉ាងតិច ២,៦០០ នាក់ក្នុងមួយថ្ងៃ ខណៈករណីឆ្លងជាសកលឡើងដល់ជាង ៧៧,២៩ លាន ស្លាប់ជាសកលយ៉ាងហោចណាស់ ១,៧០ លាននាក់ នេះបើយោងតាមទិន្នន័យចុងក្រោយបង្អស់ពីសាកលវិទ្យាល័យ Johns Hopkins។

គួរបញ្ជាក់ថា កាលពីថ្ងៃអាទិត្យសប្តាហ៍មុន សភាអាមេរិកបានឈានដល់កិច្ចព្រមព្រៀងមួយសម្រាប់កញ្ចប់ថវិការជំនួយសង្គ្រោះបន្ទាន់ដែលមានទឹកប្រាក់សរុបចំនួន ៩០០ ពាន់លានដុល្លារដែលនឹងបញ្ជូនទៅដល់គ្រួសារ អាជីវកម្មខ្នាតតូច និងអ្នកផ្តល់សេវាថែទាំសុខភាព។ ក្រុមអ្នកតាក់តែងច្បាប់ត្រូវបានគេរំពឹងថានឹងអនុម័តសំណើនេះរួមជាមួយនឹងវិក័យប័ត្រចំណាយពេញមួយឆ្នាំរបស់រដ្ឋាភិបាលកាលពីថ្ងៃច័ន្ទនេះ។

សូមជម្រាបថា កាលពីចុងសប្តាហ៍មុននេះផងដែរ ប្រទេសជាច្រើនបានប្រកាសពីផែនការបិទព្រំដែនរបស់ខ្លួនទៅចក្រភពអង់គ្លេសដោយសារតែព័ត៌មាននៃការឆ្លងវីរុសកូវីដ ១៩ ដែលបម្លែងខ្លួនថ្មីដែលឆ្លងរាលដាលយ៉ាងខ្លាំង។

យោងតាមប្រភព CNBC ដដែលបានឱ្យដឹងទៀតថា កាលពីថ្ងៃច័ន្ទ សហរដ្ឋអាមេរិកកំពុងសិក្សារកមូលហេតុជុំវិញករណីអ្នកចាក់វ៉ាក់ស៊ាំង រងប្រតិកម្មអាលែហ្សីធ្ងន់ធ្ងរភ្លាមៗ បន្ទាប់ពីចាក់វ៉ាក់ស៊ាំងរបស់ Pfizer។

លោកវេជ្ជបណ្ឌិត Alkis Togias, ប្រធាន National Institute of Allergy and Infectious Diseases’ Allergy, Asthma, and Airway Biology Branch បាននិយាយថាការស្រាវជ្រាវដែលកំពុងស្ថិតក្នុងដំណាក់កាលរៀបចំផែនការដំបូងត្រូវបានគេរំពឹងថានឹងរាប់បញ្ចូលអ្នកចាក់វ៉ាក់ស៊ាំងរាប់រយនាក់ដែលមានប្រវត្តិប្រតិកម្មអាលែហ្សីធ្ងន់ធ្ងរ ដែលគាត់នឹងដឹកនាំការសិក្សានេះ ហើយអ្នកស្រាវជ្រាវសង្ឃឹមថានឹងចាប់ផ្តើមនៅប៉ុន្មានសប្តាហ៍ទៀត។

គួរបញ្ជាក់ផងដែរថា ការសិក្សានេះនឹងពិនិត្យមើលទាំងវ៉ាក់ស៊ាំងរបស់ Pfizer និង Moderna ផងដែរ។ លោក Togias បានប្រាប់ CNBC ថា "យើងមានការព្រួយបារម្ភដែរថាអ្នកដែលមានអ្នកប្រតិកម្មវ៉ាក់ស៊ាំងច្រើន ដែលនេះអាចធ្វើឱ្យមនុស្សម្នាខ្លាចមិនហ៊ានចាក់វ៉ាក់ស៊ាំងក្នុពេលនេះទេ"៕

ដោយ ហៃ សុចិន្តា

ប្រភព CNBC News