ការឈឺក្បាល ប្រៀបដូចជាកន្ដឹងផ្ដល់ព័ម៌មួយសម្រាប់មនុស្សគ្រប់គ្នា ព្រោះមនុស្សស្ទើរតែគ្រប់វ័យតែងតែជួបប្រទះបញ្ហាឈឺក្បាល គ្រាន់តែវាកើតឡើងពីមូលហេតុផ្សេងៗគ្នា។ ការឈឺក្បាលធម្មតា អាចកើតឡើងមួយភ្លេចងាយបាត់ទៅវិញ តែក៏មានលក្ខខណ្ឌឈឺក្បាលមួយចំនួន អាចជាសញ្ញានៃជំងឺធ្ងន់ធ្ងរណាមួយផងដែរ។ ផ្អែមតាមការឱ្យដឹងពី Timeofindia ខាងក្រោមនេះ ជាសញ្ញាខុសៗគ្នា ដែលអ្នកគួរតែកត់សម្គាល់ថាជាការឈឺក្បាលដែលបណ្ដាលមកពីអ្វី ងាយស្រួលឆាប់ស្វែងរកការព្យាបាល។

១ ឈឺក្បាលប្រកាំង៖ ឈឺក្បាលប្រកាំង ជាសញ្ញាមួយដែលបង្កឱ្យមានការឈឺក្បាលរយៈពេលយូរ ឈឺនៅផ្នែកខាងមុខ មួយចំហៀងឬអាចនិយាយថាម្ដុំសៀតផ្កា។ ការឈឺក្បាលនេះ អាចកើតឡើងនៅពេលដែលអាកាសធាតុប្រែប្រួលឬក្ដៅ ឈឺពេលនៅកន្លែងមានសម្លេងរំខាន ឈឺពេលមានពន្លឺខ្លាំង ហើយពេលខ្លះអាចនឹងមានការក្អូត ចង្អោរផងដែរ។ បើក្នុង១ខែ មានការឈឺបែបនេះ លើសពី៧ទៅ៨ដង គួរតែឆាប់ទៅជួបក្រុមគ្រូពេទ្យ។ តាមការចែករំលែករបស់អ្នកឧកញ៉ាវេជ្ជបណ្ឌិត គួច ម៉េងលី បានឱ្យដឹងថា ឈឺក្បាលប្រកាំងមិនមែនកើតតែលើមនុស្សចាស់ទេ សូម្បីក្មេងតូចៗក៏អាចកើតដែរ អាចសួរកូនប្រសិន បើឈឺទៅពេលមានសម្លេងអូរអរ ឈឺពេលមានក្លិនអ្វីមួយឈួល ឈឺពេលនៅកន្លែងក្ដៅឬមានពន្លឺភ្លឺខ្លាំង ទាំងនេះសុទ្ធតែអាចការសញ្ញាឈឺក្បាលប្រកាំង។

២ ឈឺក្បាលដោយសារភាពតានតឹង៖ ឈឺនៅផ្នែកខាងមុខ ឬអាចនិយាយថាឈឺជុំវិញថ្ងាស់។ ឈឺក្បាលបែបនេះ អាចកើតឡើងដោយសារមានភាពតានតឹង ឬរងសម្ពាធ គេអាចបំបាត់បាន តាមរយៈការលេបថ្នាំបំបាត់ការឈឺចាប់ប្រភេទOTC( សូមប្រឹក្សាជាមួយពេទ្យជាមុន)។ ប៉ុន្តែប្រសិនបើវាមិននៅមិនធូរស្បើយសោះ សូមប្រញាប់ទៅជួបក្រុមគ្រូពេទ្យចៀសវាងក្លាយជាជំងឺរ៉ាំរ៉ៃណាមួយ។

៣ ឈឺក្បាល sinus៖ មានអារម្មណ៍ឈឺចាប់ និងមានសម្ពាធនៅម្ដុំត្របកភ្នែក និងថ្កាល់។ ឈឺក្បាលរបៀបនេះ គេអាចព្យាបាលដោយការយកទឹកថ្នាំបាញ់ចូលទៅក្នុងច្រមុះ។ អ្នកដែលមានអាការនៅផ្នែកខាងលើនេះ ក៏ត្រូវបានគេដឹងថា៩០% ជាសញ្ញានៃឈឺក្បាលប្រកាំងផងដែរ។

៤ ឈឺក្បាល THUNDERCLAP៖ អាចឈឺភ្លាមៗ ឈឺខ្លាំងដូចជាផ្គរលាន់ពេញទាំងក្បាល ការឈឺក្បាលទាំងនេះអាចធ្ងន់ធ្ងរក្នុងរយៈពេលត្រឹមតែ ៦០វិនាទីប៉ុណ្ណោះ។ ទោះបីជាការឈឺក្បាលទាំងនេះអាចកើតឡើងមានរយៈពេលត្រឹមតែ៥នាទីក៏ដោយ វាអាចជាសញ្ញានៃភាពអាសន្ន និងសូម្បីតែស្ថានភាពដែលគំរាមកំហែងដល់អាយុជីវិត។ វាអាចបណ្តាលមកពីស្ថានភាពគំរាមកំហែងដល់អាយុជីវិតមួយចំនួនដូចជា ជំងឺដាច់សរសៃឈាមខួរក្បាល ការហូរឈាមក្នុងខួរក្បាល ការឆ្លងមេរោគក្នុងខួរក្បាល ការស្ទះសរសៃឈាមវ៉ែននៅក្នុងខួរក្បាល និងការលេចធ្លាយសារធាតុរាវឆ្អឹងខ្នង។ ប្រសិនបើអ្នកឈឺក្បាលបែបនេះ សូមទៅជួបគ្រូពេទ្យជាបន្ទាន់។

៥ ឈឺក្បាលអាឡែកហ្ស៊ី៖ រោគសញ្ញាទូទៅនៃការឈឺក្បាលអាឡែហ្ស៊ី អមជាមួយហៀរសំបោរ កណ្តាស់ និងហៀរទឹកភ្នែកជាដើម។ ជាមួយគ្នានេះ វាអាចឈឺចាប់ប្រែប្រួលតាមរដូវកាល។ អ្នក​ត្រូវ​យកចិត្តទុកដាក់​លើ​អ្វី​ដែល ​បង្ក​ឱ្យ​មានការ​ឈឺក្បាល​ ឬមានប្រតិកម្មជាមួយវត្ថុអ្វីមួយ ដើម្បីងាយកត់សម្គាល់ពីការឈឺក្បាលអាឡែកហ្ស៊ី។

ជារួមមកវិញ ខាងឈឺក្បាលវាងាចកើតឡើង ដោយស្ថានភាព ឬមជ្ឈដ្ឋានជាក់ស្ដែង ការប្រែប្រួលអាកាសធាតុជាដើម។ ចូរចាំថា ការឈឺក្បាលមួយចំនួន វាក៏អាចជាសញ្ញាបញ្ជូនដំណឹងពីភាពមិនប្រក្រតីណា មួយក្នុងរាងកាយ ប្រសិនបើមានការឈឺក្បាលញឹកញាប់ ជាប្រចាំ សូមកុំមើលរំលង គួរតែឆាប់ស្វែងរកដំណោះស្រាយពីក្រុមគ្រូពេទ្យជំនាញ៕