មនុស្សបងប្អូនមួយចំនួនពុំសូវជាចាប់អារម្មណ៍រឿងស្រ្តេសនេះខ្លាំងពេកទេ។ តាមសៀវភៅ Ikigai និពន្ធដោយលោក Héctor García បានសរសេរថា “ស្រ្តេសតិចតួចជួយសុខភាពផ្លូវចិត្ត និងរាងកាយរឹងមាំ”។ បើអ្នកស្រ្តេសខ្លាំងហើយមានអារម្មណ៍តានតឹងមួយកម្រិតទៀត វាសនាជីវិតអាចបង្កគ្រោះថ្នាក់គិតស្មានមិនដល់នោះទេ។ ការសិក្សាពីគេហទំព័រWebmd បានឱ្យដឹងថា ការស្រ្ដេសខ្លាំងហើយញឹកញាប់អាចបង្កឱ្យមានបញ្ហាសុខភាពដូចខាងក្រោមនេះ៖
១. ភាពធាត់៖ បញ្ហាខ្លាញ់លើសនៅលើក្បាលពោះវាបង្កគ្រោះថ្នាក់ដល់សុខភាពច្រើនជាងខ្លាញ់នៅលើជើងឬត្រគាក ហើយទាំងនេះជាបញ្ហាដែលជាប់ពាក់ព័ន្ធទៅនឹងការស្រ្ដេសរុំារ៉ៃជាប្រចាំថ្ងៃនេះឯង។បញ្ហាស្ត្រេសបង្កឱ្យមានកម្រិតអរម៉ូន cortisol ខ្ពស់ដែលធ្វើឱ្យកើនឡើងនូវបរិមាណខ្លាញ់ក្បាលពោះដែលបង្កជាបញ្ហាធាត់នេះឡើង។
២. ប៉ះពាល់ប្រព័ន្ធក្រពះ និងពោះវៀន៖ ពេលដែលយើងស្រ្តេសខ្លាំង អាចប៉ះពាល់ដល់ចំណង់អាហារ ឬអាចទទួលទានច្រើនពេកខុសធម្មតា នេះជាហេតុធ្វើឱ្យមានការច្រាលអាស៊ីតធ្វើឱ្យប្រព័ន្ធក្រពះពោះវៀនរលាក ហើយចាប់ផ្តើមហើមពោះ ក្អួតចង្អោរ និងរមួលក្រពើ។ ឥទ្ធិពលស្រ្តេសធ្វើឱ្យរាងកាយយើងចុះខ្សោយលឿនណាស់។
៣. ជំងឺបេះដូង៖ ពេលអ្នកធ្វើការងារច្រើនប្រកបដោយការប្រកួតប្រជែង និងចង់បានលទ្ធផលជាធំ វាធ្វើឱ្យមនុស្សកាន់តែខំធ្វើការងារលើសដើម ជាមូលហេតុឱ្យមនុស្សចាប់ផ្តើមគិតច្រើន ហើយវាក៏ជះឥទ្ធិពលអាក្រក់លើប្រព័ន្ធសរសៃឈាមបេះដូង។ តាមសិក្សាការស្រាវជ្រាវរបស់ប្រទេសហ្វាំងឡង់បញ្ជាក់ថា អត្រាការស្លាប់ដោយជំងឺបេះដូង កើនឡើងដល់ទៅ ២ដង ចំពោះអ្នកធ្វើការក្រោមសម្ពាធខ្លាំង បើប្រៀបធៀបនឹងអ្នកធ្វើការធម្មតា។ អត្រានេះកើនកាន់តែខ្ពស់រហូតដល់ ២,៤ដង ចំពោះអ្នកប៉ុនប៉ងចង់តួនាទីកាន់តែធំ ឬប្រាក់ខែកាន់តែច្រើន តែមិនបានសម្រេច។
៤. ជំងឺទឹកនោមផ្អែម៖ ស្ត្រេសអាចធ្វើអោយជំងឺទឹកនោមផ្អែមកាន់តែអាក្រក់ទៅៗតាមវិធីពីរយ៉ាង ទីមួយវាបង្កើនលទ្ធភាពនៃអាកប្បកិរិយាមិនល្អដូចជាការញ៉ាំចំណីអាហារមិនល្អ និងការផឹកគ្រឿងស្រវឹងកាន់តែច្រើន។ ទីពីរភាពតានតឹងនាំឱ្យមានកើនឡើងកម្រិតជាតិគ្លុយកូសកាន់តែច្រើនដែលនាំមានកើតទឹកនោមផ្អែមប្រភេទទី ២៕អត្ថបទដោយ៖ ទ្រ សុភាព