១. អ្នកគួរទៅពិនិត្យសុខភាពជាមុនសិន៖ ប្រសិនបើអ្នកតែងសុបិន្តច្រើន ធ្វើឱ្យអ្នកឧស្សាហ៍ភ្ញាក់ឡើងកណ្ដាលយប់ញឹកញាប់ នេះអាចជាសញ្ញាបង្ហាញពីបញ្ហាផ្លូវចិត្ត ឬបញ្ហានៃរាងកាយណាមួយ។ ក្នុងករណីនេះ ជម្រើសដែលល្អបំផុតអ្នកគួរទៅពិគ្រោះជាមួយគ្រូពេទ្យ ដើម្បីរកមូលហេតុពិតប្រាដក ព្រោះគ្រូពេទ្យអាចជួយណែនាំពីវិធីសាស្ត្របែបធម្មជាតិ ឬការព្យាបាលបែបសុខភាពផ្លូវចិត្ត ដោយមិនបាច់ប្រើថ្នាំ។

២. ផ្លាស់ប្ដូរទម្លាប់រស់នៅប្រចាំថ្ងៃ៖ ពេលខ្លះទម្លាប់តូចៗប្រចាំថ្ងៃរបស់យើងធ្វើឱ្យប៉ះពាល់ដល់ការគេង។ ការផ្លាស់ប្ដូរទម្លាប់ប្រចាំថ្ងៃគឺចាប់ផ្ដើមពី ការញុំាអាហារដែលល្អសម្រាប់សុខភាព ផឹកទឹកឱ្យបានគ្រប់គ្រាន់ ធ្វើលំហាត់ប្រាណ ចូលគេងឱ្យបានទៀងទាត់ ទាំងនេះគឺជាគន្លឹះសំខាន់ក្នុងការជួយឱ្យខួរក្បាលនិងរាងកាយអាចសម្រាកបានពេញលេញ។ ព្យាយាមគេងឱ្យទៀងម៉ោងហើយកុំប្រើទូរស័ព្ទ ឬមើលអេក្រង់ភ្លើងខ្លាំងៗមុនគេង ព្រោះវាធ្វើឱ្យខួរក្បាលសកម្ម ហើយបណ្តាលឱ្យសុបិន្តច្រើន។

៣. មើលថែផ្លូវចិត្តខ្លូនឯងឱ្យបានល្អ៖ មនុស្សមួយចំនួនអាចយល់សុបិន្តច្រើនដោយសារតែបញ្ហាស្ត្រេស ភាពតានតឹង ពិបាកចិត្ត ធ្វើឱ្យខួរក្បាលរបស់អ្នកមិនអាចស្ងប់ស្ងាត់នៅពេលគេង។ ដូច្នេះ សូមព្យាយាមបន្ថយស្ត្រេសដោយធ្វើអ្វីដែលធ្វើឱ្យផ្លូវចិត្តរបស់អ្នកស្ងប់ដូចជា ការធ្វើសមាធិ ឬហាត់ប្រាណបន្តិចមុនចូលគេង។ វិធីសាស្ត្រសាមញ្ញទាំងនេះអាចជួយឱ្យខួរក្បាលរបស់អ្នកស្ងប់ ហើយគេងលក់ស្កប់ល្អ។

ចង់ឱ្យមានទម្លាប់គេងលក់ស្កប់ល្អ ហើយមិនសុបិន្តច្រើនគឺចាប់ផ្ដើមពីខ្លួនឯង ។ វាត្រូវការការផ្លាស់ប្តូរទម្លាប់ប្រចាំថ្ងៃ មើលថែសុខភាពផ្លូវចិត្តខ្លួនឯងឱ្យបានល្អ  មិនផឹកកាហ្វេ ឬស្រា ពេលម៉ោងជិតចូលគេង និងគេងក្នុងបរិយាកាសស្ងប់ស្ងាត់ មានអាកាសធាតុល្អ ទៀតនោះការគេងរបស់អ្នកនឹងកាន់តែមានគុណភាព ហើយក៏មិនធ្វើឱ្យអ្នកមានសុបិន្តច្រើនដូចមុនដែរ៕

អត្ថបទដោយ៖ សារួ