ដុះសាច់ច្រមុះ ឬក៏ដុំសាច់នៅក្នុងច្រមុះ គឺបង្កមកពីកត្តារលាកច្រមុះរុំារ៉ៃ ច្រមុះអាឡែហ្ស៊ី។ អ្នកដែលមានបញ្ហាដុំសាច់នៅក្នុងច្រមុះនេះ គឺងាយមានរងប្រតិកម្មខ្លាំងណាស់ពេលនៅក្នុងកន្លែងដែលមានមេរោគងាយធ្វើឱ្យឆ្លងចូលច្រមុះ។ កត្តាដុះសាច់ច្រមុះនេះ អាចបង្កឱ្យមានការហូរឈាមជាប្រចាំ ឈឺក្បាលឈឺមុខញឹកញាប់ ហៀរសំបោរបាត់បង់ក្លិនរសជាតិខ្លាំងហើយបើដល់ដំណាក់កាលធ្ងន់អាចឈានដល់ការវះកាត់ក៏មាន។
ជាការពិតណាស់ដោយយោងតាមរយៈគេហទំព័រmayoclinicនិងhealthlineបានបញ្ជាក់ឱ្យដឹងដុំសាច់ ច្រមុះគឺដុះនៅក្នុងស្រទាប់របស់ច្រមុះនិងប្រហោងឆ្អឹងដែលហៅថាmucosa។ mucosaគឺមាននាទីជួយទៅការពារច្រមុះនិងប្រហោងរបស់ច្រមុះធ្វើឱ្យមានសំណើមការពារមេរោគឆ្លង។
អ្នកដែលមានបញ្ហារលាកច្រមុះ ដុំសាច់នៅក្នុងច្រមុះគឺតែងមានផលវិបាកដូចជាពិបាកដកដង្ហើមហូរឈាមញឹកញាប់ខ្លាំង អាចឈានដល់ការហើមរលាកខ្លាំងជាពិសេសងាយនឹងឆ្លងមេរោគចូលទៅក្នុងច្រមុះយ៉ាងឆាប់រហ័ស។តួយ៉ាងកត្តាដែលនាំឱ្យមានជំងឺដុំសាច់ក្នុងច្រមុះនេះគឺមានច្រើន អាចមពីកត្តា ហ្សែន របបនៃការញុំាអាហារជាប្រចាំថ្ងៃ ការរស់នៅជាមួយបរិយាកាសមួយដែលមានមេរោគបាក់តេរីឬក៏កន្លែងមានក្លិនមិនសូវជាល្អ ការឆ្លងមេរោគ Sinus កើតមានជំងឺហឺត ជំងឺសរសៃប្រសាទ ការរស់នៅខ្វះអនាម័យជាដើម ។
មួយវិញទៀតតាមរយៈការចែករំលែករបស់អ្នកឱកញ្ញាវេជ្ជបណ្ឌិត គួច ម៉េងលីបានឱ្យដឹងថា ចំពោះបញ្ហាអ្នកជំងឺរាល់ថ្ងៃនេះ មិនមែនមកពីមើលមិនជាទេ គឺមកពីមិនធ្វើតាមវេជ្ជបញ្ជាវេជ្ជបណ្ឌិត។ ហើយបញ្ហាអត់ធ្វើតាមនេះ ធ្វើឱ្យបង្កជាជំងឺរុំារ៉ៃ ស៊ាំថ្នាំ អាចនឹងធ្វើឱ្យវាលែងជា នៅពេលទៅពេទ្យម្តងទៀត គឺគេតម្រូវឱ្យចៀរចេញ ប៉ុន្តែក្នុងករណីចៀរចេញត្រូវប្រយ័ត្ន ប្រសិនបើប៉ះពេទ្យមិនជំនាញកោសសាច់មកទាំងដុំ វាគឺធ្វើឱ្យយើងហួលច្រមុះវិញ។
ជាគន្លឹះថែសុខភាពផ្លូវដង្ហើម អ្នកឧកញ៉ាវេជ្ជបណ្ឌិត គួច ម៉េងលី បានលើកបង្ហាញដែរថា នៅពេលដែលយើងផ្តាសាយ មានបញ្ហាសុខភាពផ្លូវដង្ហើម ការខ្ពុរទឹកអំបិលក៏អាចរួមចំណែកដោះស្រាយបញ្ហាបំពង់ក មាត់ អណ្តាត ច្រមុះ ដែរ ដោយគ្រាន់តែយកអំបិលលាយជាមួយទឹកក្តៅឧណ្ហៗ ខ្ពុរ១ថ្ងៃឱ្យបាន៤-៥ដង ជាពិសេសនៅពេលញុំាបាយហើយ។ ចំពោះអ្នកដែលមានសុខភាពទូទៅក៏អាចធ្វើបានដែរ ព្រោះវាជួយឱ្យយើងមិនសូវដំបៅមាត់ ពងបែក អត់សូវក្លិន ឬប្រឈមបញ្ហារលាកផ្លូវដង្ហើម។ មួយវិញទៀត បើអាចនាពេលព្រឹកព្រលឹមឡើងពេលងូតទឹកហើយសូមឱ្យយកក្រកាសទន់ ត្បាល់ច្រមុះតិចៗ ដើម្បីសម្អាតក្នុងច្រមុះ កុំឆ្កឹះ ទើបកោសិកានៅក្នុងច្រមុះយើងមិនងាយរលាកដែលងាយបង្កជាដុំសាច់គឺរលាកច្រមុះឡើងមក។
ដោយឡែកចំពោះរបបអាហារជាប្រចាំថ្ងៃព្យាយាមកាត់បន្ថយម្ហូបផ្អាប់ គ្រឿងផ្អាប់អាហារខ្លាញ់ ប្រៃជាដើមព្រោះអាចប៉ះពាល់សុខភាពរបស់ច្រមុះបើកំពុងតែមានដុះសាច់ ឬក៏រលាកទៀតញុំាអាហារទាំងអស់នេះអាចនឹងធ្ងន់ធ្ងរជាងមុនមិនខានឡើយ៕
អត្ថបទដោយ៖ប៉ែត ធីតា