ភាពឈឺចាប់របស់ស្ត្រីអំឡុងពេលមករដូវ គឺបានកើតឡើងចំពោះស្ត្រីស្ទើរតែគ្រប់គ្នាទៅហើយ គ្រាន់តែអ្នកខ្លះ ស្បូនមានសុខភាពល្អក៏មានអាការឈឺចាប់តិចតួច រីឯអ្នកខ្លះទៀត មានការឈឺចាប់ខ្លាំងដោយសារតែស្បូនសុខភាពមិនសូវល្អ ការបរិភោគអាហារមិនសូវមានវីតាមីន ប្រូតេអ៊ីនគ្រប់គ្រាន់ជាដើម។

បើតាមការចែករំលែកពីវេជ្ជបណ្ឌិត Lasy Parter ដែលជាអ្នកជំនាញផ្នែកសម្ភព និងរោគស្រ្តី​ បានឱ្យដឹងថា ការមករដូវគឺ តែងតែមានភាពឈឺចាប់ខ្លះៗ ដោយសារការកន្ត្រាក់នៃស្បូនរបស់ស្ត្រី ដើម្បីជម្រុះទម្លាក់ឈាមរដូវ ដូច្នេះវាអាចនឹងធ្វើឱ្យមានការឈឺចាប់ជារឿងធម្មតានោះទេ សម្រាប់ស្រ្តីទូទៅ។ យ៉ាងណាមិញ ប្រសិនបើស្ត្រីឈឺចាប់ខ្លាំងក្នុងពេលមករដូវ វេជ្ជបណ្ឌិត មានវិធី៤ ក្នុងការជួយកាត់បន្ថយភាពឈឺចាប់រប់ស្ត្រីបាន ដែលមានដូចជា៖

​១. ការស្នំទឹកក្ដៅលើក្បាលពោះ៖ ប្រសិនបើបងប្អូនមានការចុកពោះខ្លាំងពិបាកទ្រាំ គឺអាចដាំទឹកក្តៅឱ្យក្តៅឧណ្ហៗរួចច្រកចូលក្នុងដប ហើយយកក្រណាត់មករុំដបនោះហើយយកទៅស្អំថ្នមៗនៅលើពោះរយៈពេល៥ទៅនាទី គឺវាជួយសម្រួលចរន្តឈាមនៅខាងក្នុង ជួយឱ្យឈាមរដូវហូរមកស្រួល មិនកកស្ទះ ហើយកាត់បន្ថយការចុកពោះបានយ៉ាងល្អផងដែរ។

២. ការផឹកទឹកក្ដៅឧណ្ហៗ៖ អំឡុងថ្ងៃមករដូវបងប្អូនស្រ្តីយល់ល្អគួរផឹកទឹកក្តៅល្អជាការផឹកទឹកត្រជាក់និងទឹកធម្មតា។ ពីព្រោះថាទឹកក្តៅគឺវាជួយធ្វើឱ្យស្បូនកន្រ្តាក់បានល្អ គ្មានការឈឺចាប់ មិនធ្វើឱ្យចុកពោះផងដែរ។

 ​៣. ការហាត់ប្រាណតិចតួចសម្រួលសាច់ដុំ៖ ចំពោះការហាត់ប្រាណពេលមករដូវក៏សំខាន់ផងដែរ គឺវាជួយធ្វើឱ្យរាងកាយរបស់យើងមានថាមពល សម្រួលសាច់ដុំអាងត្រគាក។ ប៉ុន្តែវេជ្ជណែនាំឱ្យហាត់បែបស្រាលៗ ហាត់យូហ្គា ក្បាច់បែបងាយៗបានហើយ។

 ៤. ការងូតទឹកក្ដៅឧណ្ហៗ៖ ការងូតទឹកក្តៅឧណ្ហៗនៅអំឡុងពេលមករដូវក៏សំខាន់ដែរ គឺវាជួយសម្រួលទៅដល់ចរន្តឈាម ជាពិសេសគឺជួយសម្អាតមេរោគនៅតំបន់ទ្វារមាសកុំឱ្យឆ្លងចូលទៅក្នុងស្បូនផងដែរ។​ ថ្ងៃមករដូវ គួរងូតទឹកក្តៅនៅពេលព្រឹក ឱ្យបាន១ដងក្នុង១ថ្ងៃ។

វេជ្ជបណ្ឌិតបានបញ្ជាក់ថា ប្រសិនបើករណីស្ត្រីមានការឈឺចាប់ខ្លាំង ជារៀងរាល់ខែ នោះស្ត្រីគួរតែទៅពិនិត្យសុខភាពរបស់ខ្លួន ឬជួបពិគ្រោះពិភាក្សាជាមួយនឹងគ្រូពេទ្យជំនាញ ដើម្បីរកដំណោះស្រាយ ជាពិសេសនឹងបានដឹងពីការកង្វះជីវជាតិ សារជាតិចិញ្ចឹមនៃរាងកាយផងដែរ៕