សាស្ត្រាចារ្យនៅសាកលវិទ្យាល័យ Harvard និងស្ថាប័នអន្តរជាតិបាននិយាយនៅក្នុងការស្រាវជ្រាវដែលបានចេញផ្សាយនាពេលថ្មីៗនេះនៅក្នុងទស្សនាវដ្តី Clinical Nutrition ថា អ្នកផឹកតែបៃតងដែលសម្បូរសារធាតុប្រឆាំងអុកស៊ីតកម្ម 3 ទៅ 4 ពែងរាល់ថ្ងៃ ជួយរក្សារបបអាហារមេឌីទែរ៉ាណេ ហើយអាចកាត់បន្ថយហានិភ័យនៃភាពចាស់របស់ខួរក្បាល។ អ្នកស្រាវជ្រាវលើកឡើងបន្តថា អត្ថប្រយោជន៍នេះកើតឡើងពីលក្ខណៈប្រឆាំងនឹងការរលាកក្នុងតែបៃតង Walnut និងរុក្ខជាតិ Mankai ជាផ្នែកមួយនៃ smoothie ហើយបង្ហាញថាវាមានសមត្ថភាពអាចជួយកាត់បន្ថយជាតិស្ករនៅក្នុងឈាម។

ការរលាកជាការឆ្លើយតបតាមប្រព័ន្ធភាពស៊ាំ ប៉ុន្តែបើវាកើតមានជាបន្តបន្ទាប់ វាអាចបង្កគ្រោះថ្នាក់ និងបង្កើនហានិភ័យនៃជំងឺវង្វេង បេះដូង និងមហារីកនៅក្នុងខួរក្បាល។ ការរលាកកើនឡើងតាមអាយុ ហើយត្រូវបានភ្ជាប់ទៅនឹងបញ្ហាចងចាំថែមទៀត។ អាហារ និងភេសជ្ជៈមួយចំនួនត្រូវបានគេរកឃើញថាវាមានសមត្ថភាពពិសេសអាចការពារប្រឆាំងនឹងការគំរាមកំហែងពីបញ្ហាទាំងអស់នេះ។ ជាពិសេស តែបៃតង វាអាចជួយបន្ថយហានិភ័យនៃជំងឺមហារីកមួយចំនួន ជួយប្រឆាំងនឹងការបាត់បង់ការចងចាំ ក៏ដូចជាការផ្ដោតអារម្មណ៍ផងដែរ។ នេះបើយោងតាមគ្លីនិក Cleveland។

តាមលោក Anat Meir ជាអ្នកស្រាវជ្រាវនៅសកលវិទ្យាល័យ Harvard Chan បានសហការដឹកនាំការសិក្សាបាននិយាយថា ការសិក្សាអំពីប្រូតេអ៊ីនដែលកំពុងចរាចរនៅក្នុងឈាម វាធ្វើឱ្យឃើញពីដំណើរនៃភាពចាស់របស់ខួរក្បាលអាចកែខៃបានតាមរយៈការផ្លាស់ប្ដូររបៀបរស់នៅ និងការផ្លាស់ប្តូររបបអាហារ។ វិធីសាស្រ្តនេះផ្តល់ឱ្យយើងនូវបង្អួចដ៏រឹងមាំមួយចំពោះសុខភាពខួរក្បាល ដែលជួយបង្ហាញពីការផ្លាស់ប្តូរជីវសាស្រ្តមុនពេលរោគសញ្ញាអាចលេចឡើង។

សូមបញ្ជាក់ថា តែបៃតង គឺជាតែដែលបានចម្រាញ់ពីស្លឹកតែដោយមិនឱ្យវាឆ្អិនពេក ដើម្បីរក្សាក្លិនក្រអូបធម្មជាតិ និងសារធាតុចិញ្ចឹម។ ក្រៅពីមានរសជាតិឈ្ងុយឆ្ងាញ់ វាក៏មានអត្ថប្រយោជន៍ច្រើនដូចជា៖ ជួយបំផ្លាញជាតិអុកស៊ីតកម្ម ជួយបង្កើនថាមពល និងការផ្តោតអារម្មណ៍ ជួយថែរក្សាសុខភាពបេះដូង ជួយបន្ថយជាតិខ្លាញ់ និងការគ្រប់គ្រងទំងន់ ជាពិសេសវាជំនួយដល់ខួរក្បាល បង្កើនការចងចាំ កាត់បន្ថយភាពចាស់នៃខួរក្បាលបានផងដែរ។ ផឹកតែបៃតងរាល់ថ្ងៃបានទាំងរសជាតិឆ្ញាញ់ បានទាំងសុខភាពល្អ៕

អត្ថបទដោយ៖ សារួ