លោកវេជ្ជបណ្ឌិត ហាក់ ចាន់ភក្ដី ឯកទេស ថ្លើម ក្រពះ ពោះវៀន សព្វថ្ងៃបម្រើការងារនៅមន្ទីរពេទ្យកាល់ម៉ែត ក៏ដូចជាមន្ទីរសំរាកព្យាបាល ឯកទេសអេគីប បានមានប្រសាសន៍ថា ជំងឺថ្លើមប្រភេទបេ គឺជាជំងឺដែលបង្កឡើងដោយពពួកវីរុសថ្លើម ដែលពពួកវីរុសទាំងនោះនឹងចូលទៅក្នុងសាច់ថ្លើមរបស់អ្នក ដែលបង្កឱ្យមានការខូចខាត និងមានការរលាក ដែលនេះជាជំងឺរលាកថ្លើមប្រភេទបេ។

លោកវេជ្ជបណ្ឌិត ហាក់ ចាន់ភក្ដី បានមានប្រសាសន៍ថា ជំងឺរលាកថ្លើមប្រភេទបេ គឺជាជំងឺដែលយើងឧស្សាហ៍ជួបប្រទះញឹកញាប់ ដែលមានអត្រា ៨% នៃប្រជាជនកម្ពុជា។ ជំងឺនេះធ្វើឱ្យរលាកសាច់ថ្លើម និងវិវត្តន៍ទៅរកសភាពក្រិនថ្លើម ជាពិសេសវាអាចវិវត្តន៍ទៅជាមហារីកថ្លើមដែលអាចប៉ះពាល់ដល់អាយុជីវិតហើយវាជាឃាតករដ៏ស្ងៀមស្ងាត់ ព្រោះថាជាទូទៅ ៨០ ទៅ ៨៥ភាគរយនៃអ្នកជំងឺ គ្មានរោគសញ្ញាអាចឲ្យយើងបានដឹងជាមុននោះទេ។

លោកវេជ្ជបណ្ឌិត ហាក់ ចាន់ភក្ដី បានមានប្រសាសន៍ថា ជាទូទៅជំងឺរលាកថ្លើមប្រភេទបេមិនស្ដែងចេញជាសញ្ញាច្បាស់លាស់នោះទេ នៅពេលដែលអ្នកជំងឺឆ្លងក្នុងដំណាក់កាលថ្មីៗ។ ប៉ុន្តែនៅក្នុងដំណាក់កាលថ្មីនេះ អ្នកជំងឺក៏អាចស្ដែងចេញនៅរោគសញ្ញាផងដែររួមមាន គ្រុនផ្ដាសាយ, ឡើងលឿងលើភ្នែក, ឈឺចុកចាប់នៅក្រោមឆ្អឹងជំនីរខាងស្ដាំ, មានអាការក្ដៅខ្លួន(៣៧.៥‑៣៨អង្សាសេ) និងការហេវហត់អស់កំលាំងជាដើម។

លោកវេជ្ជបណ្ឌិត ហាក់ ចាន់ភក្ដី បានមានប្រសាសន៍ថា ប្រសិនបើជំងឺរលាកថ្លើមប្រភេទបេបានវិវត្តទៅជាជំងឺក្រិនថ្លើម និងជំងឺមហារីក នោះអ្នកជំងឺអាចស្ដែងចេញជារោគសញ្ញាដូចជា ឡើងទាចទឹក, ការឡើងជាំលើស្បែក និងការក្អូតធ្លាក់ឈាមជាដើម។

លោកលោកវេជ្ជបណ្ឌិត ហាក់ ចាន់ភក្ដី បានមានប្រសាសន៍បន្ថែមថា ជំងឺថ្លើមប្រភេទបេ គឺជាជំងឺមួយដែលយើងអាចជៀសផុត និងការពារបានតាមរយៈការចាក់វ៉ាក់សាំងការពារមេរោគថ្លើមប្រភេទបេ។ ជាទូទៅការចាក់វ៉ាក់សុំាងនេះមានចំនួន ៣ដង ហើយយើងត្រូវពិនិត្យឈាមដើម្បីបញ្ជាក់ច្បាស់ថា ខ្លួនរបស់យើងមានប្រព័ន្ធការពារមេរោគនេះពីការចម្លង។

គួរបញ្ជាក់ថា លោកវេជ្ជបណ្ឌិត ហាក់ ចាន់ភក្ដី បានបន្ថែមថា បើទោះបីវេជ្ជសាស្ត្រមានការជឿនលឿនយ៉ាងណាក្តី ការព្យាបាលទាមទារការចូលរួមពីសាមីខ្លួនផ្ទាល់ក្នុងការតាមដានពិនិត្យសុខភាពជាប្រចាំ ការលុបបំបាត់កត្តាហានិភ័យ និងការមកទទួលសេវាកម្មព្យាបាលទាន់ពេលវេលា និងក្នុងដំណាក់កាលដំបូង។

ជាចុងក្រោយ លោកវេជ្ជបណ្ឌិត ហាក់ ចាន់ភក្ដី បានផ្ដាំផ្ញើទៅកាន់អ្នកទាំងអស់គ្នាថា យើងត្រូវតែពិនិត្យសុខភាពឱ្យបានយ៉ាងហោចណាស់រៀងរាល់ ៦ខែ ទៅ ១ឆ្នាំម្ដង ព្រោះជំងឺរលាកថ្លើមនេះ គឺជាជំងឺស្ងប់ស្ងាត់ណាស់ វាមិនបង្ករោគសញ្ញាអ្វីទាំងអស់ អញ្ចឹងហើយវាទាមទារឱ្យបងប្អូនប្រជាពលរដ្ឋត្រូវតែពិនិត្យសុខភាពជាប្រចាំ។

អត្ថបទដោយ៖ម៉ាង វិសិដ្ឋារតន៍