តាមរយៈ CNBC Make It បានណែនាំរបបអាហារប្រចាំថ្ងៃដែលអាចជួយដល់ថាមពលខួរក្បាល សុខភាពពោះវៀន និងគុណភាពដំណេក។ អាហារខ្លះជួយឱ្យផ្តោតអារម្មណ៍បានល្អ អាហារខ្លះផ្តល់ថាមពល និងអាហារខ្លះជួយឱ្យគេងបានលក់ស្រួល។

១. ពេលព្រឹក៖ គ្រូពេទ្យជំនាញបានណែនាំ ស៊ុត ជាអាហារពេលព្រឹកដ៏ល្អបំផុត ព្រោះវាជាប្រភពប្រូតេអ៊ីន យើងអាចញុំាស៊ុតអមជាមួយផ្លែឈើ និងគ្រាប់ល្ពៅ។ ការចាប់ផ្តើមពេលព្រឹកជាមួយអាហារដែលមានតុល្យភាពនឹងជួយឱ្យថាមពលស្ថិតស្ថេរ និងខួរក្បាលមានភាពផ្តោតបានល្អ។ ក្រៅពី ស៊ុត នៅពេលព្រឹកយើងអាចញុំាជា ផ្លែបឺរ ព្រោះវាសម្បូរទៅដោយខ្លាញ់ល្អ និងម៉ាញេស្យូម ជួយរក្សាជាតិស្ករក្នុងឈាមឱ្យមានស្ថេរភាព។ គ្រាប់អាល់ម៉ុន ឬគ្រាប់ល្ពៅ ជាប្រភពម៉ាញេស្យូមល្អ សម្រាប់ការបន្ថយភាពតានតឹង និងជំរុញដល់ការផលិតមេឡាតូនីន។ ទឹកដោះគោជូរ ជាអាហារបំប៉នពោះវៀន ដោយជួយពង្រឹងទំនាក់ទំនងរវាងពោះវៀន និងខួរក្បាល។

២. ពេលថ្ងៃត្រង់៖ ត្រូវជ្រើសរើសអាហារដែលមានសមត្ថភាពជួយចិញ្ចឹមដល់ខួរក្បាល និងកាត់បន្ថយការរលាកដូចជា ត្រីមានជាតិខ្លាញ់ និងបន្លែស្រស់។ ត្រីសាម៉ុង ឬត្រីសាឌីន សំបូរទៅដោយអូមេហ្គា 3 និងវីតាមីន D ជួយឱ្យគេងលក់បានស្រួល។ សណ្ដែកដី ផ្តល់ជាតិសរសៃ វីតាមីន B និងម៉ាញេស្យូម ជួយឱ្យដំណេកមានគុណភាពប្រសើរ។ ប៉េងប៉ោះ មាន Lycopene ជាសារធាតុប្រឆាំងអុកស៊ីតកម្ម ដែលជួយការពារសរសៃឈាមបេះដូង និងជំរុញរយៈពេលគេង។

៣. ពេលល្ងាច៖ ពេលល្ងាច គឺពេលសំខាន់បំផុតក្នុងការជ្រើសរើសអាហារដែលជំនួយដល់ការគេង។ អាហារដែលគួរញុំានៅពេលល្ងាចគឺត្រូវតែជាអាហារដែលមានប្រូតេអ៊ីនជាមួយ legumes និងចាប់ផ្តើមដោយម្ហូបផ្អែកលើប៉េងប៉ោះ ដូចជា ស៊ុបក្តៅ ឬ gazpacho ត្រជាក់។ បន្ទាប់មកញ៉ាំផ្លែគីវី ឬផ្លែឈើទុំផ្សេងៗ។ អាហារដែលជួយរាងកាយ និងធ្វើឱ្យគេងលក់ស្រួល៖ ស្លឹកបៃតងងងឹត (spinach, Swiss chard)  ព្រោះវាមានម៉ាញេស្យូម និងជាតិដែក។ គ្រាប់ធញ្ញជាតិ ជួយស្រូបយក tryptophan ដើម្បីផលិត serotonin។ ផ្លែស្ត្របឺរី និងផ្លែគីវី មាន melatonin និងសារធាតុប្រឆាំងអុកស៊ីតកម្ម។ ទឹកដោះគោ ជាជម្រើសបន្ថែមដែលមាន tryptophan និង alpha-lactalbumin។

យ៉ាងណាក៏ដោយ យើងមិនត្រូវធ្វើការផ្លាស់ប្ដូររបបអាហារភ្លាមៗបានទេ មុនពេលផ្លាស់ប្តូររបបអាហារ បើអាចនោះគួរពិគ្រោះជាមួយគ្រូពេទ្យ។ ព្រោះថារាងកាយនីមួយៗមានតម្រូវការផ្សេងៗពីគ្នា ដូច្នេះការទៅទទួលដំបូន្មានពីអ្នកជំនាញពិតជាសំខាន់។ អាហារមិនត្រឹមតែជាថាមពលសម្រាប់ពេលថ្ងៃប៉ុណ្ណោះទេ ប៉ុន្តែវាជួយកំណត់របៀបដែលយើងគេងនៅពេលយប់ផងដែរ។ ដោយជ្រើសរើសអាហារដែលមានតុល្យភាពក្នុងពេលព្រឹក ថ្ងៃត្រង់ និងល្ងាច យើងអាចបង្កើនថាមពល ជួយដល់សុខភាពខួរក្បាល និងគុណភាពដំណេកបានល្អ៕

អត្ថបទដោយ៖ សារួ