មានមនុស្សជាច្រើនពេលព្រឹកឡើង ងូតទឹកហើយទៅធ្វើការ នាំឱ្យពួកគេមានបញ្ហាតម្រងនោមដោយអត់ដឹងខ្លួនសោះ។ ព្រោះពេលអ្នកគេងពេញមួយយប់ធ្វើឱ្យរាងកាយបាត់ជាតិទឹកអស់ច្រើនណាស់។ បើអ្នកបន្តទម្លាប់បែបនេះ យូរៗ ឈាមអ្នកក៏សម្បូរជាតិពុល និងឈឺក្បាល គ្មានជាតិទឹកគ្រប់គ្រាន់ ហើយបន្តប៉ះពាល់ដល់តម្រងនោមថែមទៀត។ ទម្លាប់ ១ពេលព្រឹកអ្នកកុំរំលងនោះគឺទម្លាប់ផឹកទឹកធម្មតា ២ទៅ ៤កែវដើម្បីឱ្យតម្រងនោម និងក្រពះរបស់អ្នកមានសុខភាពល្អមានភាពរីករាយ។
ព្រោះតែការផឹកទឹកពេលព្រឹកមានសារៈសំខាន់ជួយរក្សាលំនឹងជាតិទឹកក្នុងរាងកាយបានល្អណាស់។ នៅពេលអ្នក ផឹកទឹកពេលពោះទទេអាចជួយរក្សាប្រព័ន្ធ lymphatic ដើម្បីកម្ចាត់ជាតិពុលចេញពីរាងកាយ។ នេះអាចពង្រឹងប្រព័ន្ធភាពស៊ាំបាន ហើយនៅពេលប្រព័ន្ធភាពស៊ាំខ្លាំងអាចប្រឆាំងនឹងជំងឺច្រើនមុខជាពិសេសតម្រងនោមតែម្តង។តាមលោកវេជ្ជបណ្ឌិត សុខ សុធា ជាអ្នកជំនាញរបបអាហារនៅគ្លីនិកព្យាបាលជំងឺមហារីកចក្រាបានលើកឡើងថា ការផឹកទឹកពេលព្រឹកជួយការពារគ្រួសក្នុងតំរងនោម និងការពារពោះវៀនធំ និងប្លោកនោមពីការបង្ករោគផងដែរ។
ហើយលោកវេជ្ជបណ្ឌិតបានបន្តថា ការផឹកពេលព្រឹកទឹកដោយពោះទទេ ជួយបង្កើនប្រសិទ្ធភាពរាងកាយក្នុងការប្រយុទ្ធប្រឆាំងនឹងការបង្កមេរោគក្នុងក្រពះ និងជួយបណ្តេញជាតិពុលចេញឱ្យតម្រងនោមរបស់អ្នកមានសុខភាពរឹងមាំ។ ព្រោះជាតិទឹកធ្វើឱ្យរាងកាយរបស់អ្នកមានដំណើរការត្រឹមត្រូវនៃសរីរាង្គខាងក្នុង។ នេះជាមូលហេតុអ្នកត្រូវតែផឹកទឹកពេលព្រឹក វាជួយរំលាយអាស៊ីតដែលនាំឱ្យមានគ្រួសក្នុងតម្រងនោម។ អ្នកផឹកទឹកកាន់តែច្រើនពេលព្រឹកនោះ អ្នកនឹងត្រូវបានការពារពីការឆ្លងមេរោគប្លោកនោមផ្សេងៗ កាន់តែល្អដល់សុខភាពតម្រងនោមរបស់អ្នក។
តាមគេហទំព័រ Healthline បានចុះផ្សាយថា ពេលភ្ញាក់ពីគេងនៅពេលព្រឹក មិនត្រឹមតែពង្រឹងសុខភាពតម្រងនោមនោះទេ ជួយដល់ក្រពះថែមទៀត។ ការមានទម្លាប់ញ៉ាំទឹកពេលព្រឹកបែបនេះ វាជួយព្យាបាលបញ្ហាជាច្រើនរបស់អ្នក។ ជាពិសេសពេលអ្នកញ៉ាំទឹកដោយពោះទទេ ឬគ្មានអាហារក្នុងក្រពះ វាជាវិធីធ្វើឱ្យក្រពះមានដំណើរស្រួល។ វិធីសាស្ត្រញ៉ាំ ទឹកពេលពោះគ្មានអាហារ វាមានដើមកំណើតចេញពីប្រជាជនជប៉ុន ព្រោះពួកគេតែងមានទម្លាប់ផឹកទឹកប្រហែល ៤កែវជារៀងរាល់ព្រឹក មុនពេលពួកគេញ៉ាំអាហារចូលក្នុងពោះ។ នេះជាវិធីថែទាំក្រពះកុំឱ្យមានបញ្ហាផងដែរ៕ អត្ថបទដោយ៖ ទ្រ សុភាព