នៅថ្ងៃទី៨ ខែកញ្ញា ឆ្នាំ២០២៥នេះ ក្រុមហ៊ុន ខនហ្វីរេលបានដាក់ «សម្ពោធសិប្បកម្មផលិត និងកែច្នៃផលិតផលជលផល ខនហ្វីរេល ក្រោមកម្មវិធីទស្សនកិច្ចសិក្សា និងផ្សព្វផ្សាយរបស់គម្រោងអភិវឌ្ឍន៍ជលផលក្រោយប្រមូលផល» ក្រោមអធិបតីភាព ឯកឧត្តម ហាស់ សារ៉េត រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងឯកឧត្តម អ៊ីហ្គ័រ ឌ្រីសម៉ាន់ អគ្គរដ្ឋទូតសហភាពអឺរ៉ុបប្រចាំនៅកម្ពុជា រួមទាំងឯកឧត្តម-លោកជំទាវ លោក-លោកស្រី និងអ្នកសារព័ត៌មានគ្រប់ស្ថាប័ន។
ឯកឧត្តម អ៊ីហ្គ័រ ឌ្រីសមេន ឯកអគ្គរដ្ឋទូត ប្រតិភូសហ ប្រតិភូសហភាពអឺរ៉ុបប្រចាំកម្ពុជា បានមានប្រសាសន៍ថាគម្រោង EU CAPFISH បានផ្តល់លទ្ធផលដ៏មានអត្ថន័យ និងមានសុពលភាពយូរអង្វែង។ ជាជំនួយពីរជាតិធំជាងគេដែលផ្តល់ថវិកាដោយសហភាពអឺរ៉ុប ដើម្បីគាំទ្រកម្ពុជានិងសហគ្រាសរបស់ខ្លួនក្នុងការផលិតផលិតផលនេសាទ EU CAPFISH បានជួយឲ្យកម្ពុជាបំពេញតាមស្តង់ដារជាតិទាក់ទងនឹងសុវត្ថិភាពម្ហូបអាហារ។
ឯកឧត្តមតំណាងសហគមន៍អឺរ៉ុប បានកើតសរសើរដល់ក្រុមហ៊ុន Confirel ចំពោះសមិទ្ធផលនៅថ្ងៃនេះ និងការពង្រីកអាជីវកម្ម គឺជាគំរូល្អឥតខ្ចោះនៃគំរូអាជីវកម្មរួមបញ្ចូល ដែលមានការចូលរួមពីអ្នកផ្គត់ផ្គង់តូចៗនៅតំបន់សញ្ញាសម្គាល់ភូមិសាស្ត្រ សៀមរាប ប្រហុក (GI)។ ការណែនាំនៃ ម្សៅប្រហុក គឺជាការបកស្រាយទំនើបនៃផលិតផលប្រពៃណីដ៏ល្បីមួយរបស់កម្ពុជា។ ប្រហុក ដូចដែលយើងស្គាល់ គឺជាសញ្ញានៃទំនៀមទំលាប់ជាតិ និងអត្តសញ្ញាណម្ហូបអាហារកម្ពុជា។
ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងអំណរគុណដល់សហភាពអឺរ៉ុបនិងអង្គការ UNIDO ចំពោះការគាំទ្រនិងបន្តការគាំទ្រទាំងហិរញ្ញវត្ថុនិងទាំងបច្ចេកទេស តាមរយៈកម្មវិធី CAPFISH និងគម្រោងអភិវឌ្ឍន៍វិស័យកសិកម្មផ្សេងទៀត សម្រាប់ចូលរួមអភិវឌ្ឍន៍វិស័យកសិកម្មនៅកម្ពុជា។
ឯកឧត្តមរដ្ឋលេខាធិការបានថ្លែងបន្តថា រាជរដ្ឋាភិបាលកម្ពុជា បានខិតខំនិងយកចិត្តទុកដាក់ក្នុងការធ្វើពិពិធកម្មផលិតផលនិងពង្រីកទីផ្សារនាំចេញ ព្រមទាំងជំរុញផលិតផលកសិកម្មកម្ពុជាទៅកាន់ទីផ្សារអន្តរជាតិកាន់តែទូលំទូលាយ។ ដោយមានការគាំទ្រពីដៃគូអភិវឌ្ឍន៍ផ្សេងៗ ដូចជាគម្រោង CAPFISH ដែលបានជួយដល់សិប្បកម្មកែច្នៃម្សៅប្រហុកទទួលបាននូវវិញ្ញាបនបត្រហាសឹប (HACCP) ដែលជាស្តង់ដារសុវត្ថិភាពម្ហូបអាហារអន្តរជាតិ។
ក្នុងពិធីសម្ពោធនេះដែរ ឧកញ៉ា ឱសថបណ្ឌិត ហៃ លីអ៊ាង ប្រធានអគ្គនាយកក្រុមហ៊ុន ខនហ្វីរេល បានថ្លែងក្នុងពិធីសម្ភោធ សិប្បកម្មផលិត និងកែច្នៃផលិតផលជលផល ថា គម្រោងនៃការកែច្នៃប្រហុកម្សៅរបស់ក្រុមហ៊ុនខនហ្វីរេល ត្រូវបានបង្កើតឡើងនៅឆ្នាំ ២០២៣ ហើយសិប្បកម្មនេះ គឺជាសិប្បកម្មកែច្នៃប្រហុកម្សៅលើកដំបូង ដែលបានសាងសង់លើផ្ទៃដីទំហំ ២៤០០ ម៉ែត្រការេ និងមានសមត្ថភាពផលិតប្រហុកម្សៅបាន ៥០០០ កែវ ឬស្មើនឹង ១តោន ប្រហុកស្រស់ក្នុងមួយថ្ងៃ។ ហើយក្រុមហ៊ុន ខនហ្វីរេលទទួលវិញ្ញាបនប័ត្រ HACCP ដែលជាប្រព័ន្ធគ្រប់គ្រងសុវត្ថិភាពចំណីអាហារ ប្រកបដោយគុណភាព និងសុវត្ថភាពផងដែរ។
ចំណែកលោក សុខ ណារិន តំណាងអង្គការសហប្រជាជាតិដើម្បីអភិវឌ្ឍន៍ឧស្សាហកម្មប្រចាំប្រទេសកម្ពុជា ឬហៅកាត់ថា UNIDO បានបញ្ជាកថ់ា ពិធីសម្ពោធនាថ្ងៃនេះ គឺជាផ្នែកមួយយ៉ាងសំខាន់នៅក្នុងការចាប់ផ្តើមនៃកម្មវិធីទស្សនកិច្ចសិក្សា និង ផ្សព្វផ្សាយសមិទ្ធផលរបស់គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) លើកទីបី។
ដោយសារគម្រោង (CAPFISH-Capture) នឹងត្រូវបញ្ចប់នាខែធ្នូ ឆ្នាំ២០២៥ខាងមុខនេះ កម្មវិធីទស្សនកិច្ចសិក្សា និងផ្សព្វផ្សាយលើកទី៣នេះ គឺជាវេទិកាយុទ្ធសាស្រ្ត ដើម្បីធ្វើការផ្សព្វផ្សាយ និងបង្ហាញពីផលជះវិជ្ជមានរបស់គម្រោង ជាពិសេសទាក់ទិននឹងហេដ្ឋារចនាសម្ព័ន្ធគុណភាពជលផលក្រោយប្រមូលផល ការពង្រីកទីផ្សារ ការជម្រុញនាំចេញ ការសិក្សាស្រាវជ្រាវអភិវឌ្ឍផលិតផល ការពង្រឹងអំណាចសេដ្ឋកិច្ចរបស់ស្ត្រី ព្រមទាំងការបង្កើតទីផ្សារការងារសម្រាប់ប្រជាជនកម្ពុជា។
សូមបញ្ជាក់ថាផងដែរថា ក្រុមហ៊ុនខនហ្វីរេល បានកែច្នៃម្សៅប្រហុកចំនួន៥ប្រភេទផ្សេងគ្នា ហើយគម្រោងនាំចេញទៅទីផ្សារបរទេស ជាពិសេសសហគមអឺរ៉ុបផងដែរ។ សម្រាប់គម្រោង CAPFISH-Capture ដែលជាកម្មវិធីមានការគាំទ្រពីអង្គការ UNIDO នៅកម្ពុជា បានផ្ដល់ទាំងជំនួយបច្ចេកទេស និងគ្រឿងម៉ាស៊ីនមួយចំនួន ក្នុងការបង្កើនសមត្ថភាពផលិត និងកែលម្អគុណភាពផលិតផលរបស់ក្រុមហ៊ុនដល់ខនហ្វីរេល៕
