បច្ចុប្បន្នមានស្រ្តីច្រើនណាស់ដែលកំពុងតែជួបបញ្ហារាំងរដូវ រដូវមកមិនទៀង អ្នកខ្លះមកមួយខែខាន៣ ទៅ ៤ខែក៏មាន។ ជាទូទៅការមករដូវទៀងទាត់របស់ស្រ្តីគឺ គិតចាប់ពីចន្លោះ២៨ថ្ងៃ ទៅ៣៥ថ្ងៃម្តង ប៉ុន្តែបើករណីឈានដល់រយៈពេល ២ ឬ ៣ ខែឡើងទៅមិនមករដូវម្តងសោះនោះ ស្រ្តីត្រូវប្រញាប់ដោះស្រាយ ព្រោះកំពុងមានបញ្ហាសុខភាពខាងក្នុងហើយ ជាពិសេសគឺស្បូន។

ជាការពិតណាស់ យោងតាមការបញ្ជាក់ពីវេជ្ជបណ្ឌិត Dr Nikita Trehan ឯកទេសផ្នែករោគស្រ្តីដលមានបទពិសោធន៍ជាច្រើនឆ្នាំបានប្រាប់ថា កត្តាធំៗដែលបណ្តាលឱ្យមនុស្សស្រីមួយចំនួនជួបបញ្ហារាំងរដូវ រដូវមកមិនទៀងគឺដោយសារតែ អរម៉ូនប្រែប្រួលខុសធម្មតា ធាត់លើសគីឡូ របបអាហារមិនត្រឹមត្រូវ មានបញ្ហាផ្លូវចិត្ត ស្រ្តេស...។ ដូច្នេះ ចំណុចសំខាន់ដែលមនុស្សស្រីត្រូវដោះស្រាយគឺ ត្រូវរក្សាកម្រិតអរម៉ូនឱ្យនៅថេរ កុំឱ្យឡើងចុះ។ ខាងក្រោមនេះជាវិធីរក្សាកម្រិតអរម៉ូន និងណាត់ឱ្យរដូវមកទៀងទាត់រាល់ខែ៖

១. ញ៉ាំផ្លែល្ហុងស្ទើទុំ(ល្ហុងចាស់)៖ ផ្លែល្ហុងចាស់ដែលមានសភាពសាច់ស្រឈាលៗ ត្រូវបានគេឃើញថា វាមាននាទីជួយកន្រ្តាក់ស្បូនឱ្យឆាប់មករដូវ។ វេជ្ជបណ្ឌិតណែនាំឱ្យដល់ស្រ្តីដែលកំពុងជួបបញ្ហារដូវមកទៀងទាត់ គួរញ៉ាំផ្លែល្ហុងចាស់នេះឱ្យបានរាល់ថ្ងៃរយៈពេល១ទៅ២ខែរដូវនឹងត្រឡប់មកទៀងទាត់វិញដូចដើម ហើយមិនឈឺចាប់ទៀតផង។ របៀបញ៉ាំ៖ អ្នកអាចញ៉ាំឆៅក៏បាន យកទៅក្រឡុកធ្វើជាភេសជ្ជៈក៏បាន ឬចម្អិនធ្វើជាស៊ុបក៏បាន។

២. តែខ្ញី៖ ខ្ញីមានប្រយោជន៍សម្រាប់ជំងឺ និងរោគសញ្ញាផ្សេងៗ រួមទាំងមករដូវមិនទៀងទាត់។ ការទទួលទានខ្ញីឆៅជាប្រចាំ អាចជួយគ្រប់គ្រងរដូវរបស់អ្នក។ ខ្ញីមានផ្ទុកសារធាតុ gingerol ដែលជួយកាត់បន្ថយការរលាកក្នុងរាងកាយ។ វាជួយក្នុងការកន្ត្រាក់សាច់ដុំស្បូន និងសម្រួលដល់តុល្យភាពអ័រម៉ូន។ ការផឹកតែខ្ញីក្តៅមួយកែវជាមួយនឹងទឹកក្រូចឆ្មារ និងទឹកឃ្មុំមួយស្លាបព្រា នៅពេលព្រឹកឬពេលល្ងាច ជួយឱ្យវដ្តរដូវមកទៀងទាត់ដូចណាត់ទុក។

៣. ហាត់ប្រាណរក្សាកម្រិតអរម៉ូន

·   ក្បាច់ Vajrasana៖ ក្បាច់នេះជួយសម្រួលចលនាស្បូន អាងត្រគាករបស់ស្រ្តី និងជួយជម្រុញឈាមរដូវឱ្យមកបានទៀងទាត់។ របៀបហាត់៖ អង្គុយឱ្យត្រង់ខ្លួន បត់ជើងទាំងពីរទៅក្រោយ(ដូចរូប) ដាក់ដៃទាំង២នៅលើជើង រួចបិទភ្នែក រាប់ពី១ដល់៣០ សឹមសម្រួលឥរិយាបថមកធម្មតាវិញ។

·   ក្បាច់ Squat Jump៖ ក្បាច់នេះគេហាត់ដើម្បីសម្រួលសរសៃឈាម ជាក្បាច់ចុងក្រោយបន្ទាប់ពីហាត់២ក្បាច់ខាងលើរួច វាមាននាទីជួយជម្រុញកំណកឈាមអាក្រក់ឱ្យចេញមកតាមរយៈរដូវ ជួយឱ្យការមករដូវរបស់ស្រ្តីរលូន ទៀងទាត់ គ្មានការឈឺចាប់។ របៀបហាត់៖ ស្រ្តីត្រូវ ដាក់់ជើងឱ្យឃ្លាតពីគ្នា(ដូចរូប) រួមលោតចុះឡើង ចំនួន២០ដង។

៤. រក្សាជាតិទឹកក្នុងខ្លួន៖ ស្រ្តីពេញវ័យមករដូវដាច់ខាតត្រូវតែញ៉ាំទឹកឱ្យបាន២លីត្រក្នុងមួយថ្ងៃដើម្បីបំពេញជាតិទឹកដល់រាងកាយកុំឱ្យខ្សោះ។ ប្រសិនបើរាងកាយខ្វះជាតិទឹក នោះរាងកាយអ្នកនឹងខ្សោះ​ ធ្វើឱ្យលំហូរឈាមរដូវរបស់អ្នកក៏រអាក់រអួល ការកន្រ្តាក់នៃស្បូនក៏ខ្សោយ បណ្តាលឱ្យវដ្តរដូវមកមិនទៀងនោះទេ។

លើសពីនេះទៀត ត្រូវថែរក្សាសុខភាពផ្លូវចិត្តឱ្យបានល្អ កាត់បន្ថយស្រ្តេស ញ៉ាំអាហារជំនួយ ញ៉ាំផ្លែឈើ ញ៉ាំបន្លែបៃតងឱ្យបានច្រើន។ ព្រោះចំណុចទាំងអស់នេះគឺមានឥទ្ធិពលខ្លាំងណាស់ចំពោះវដ្តរដូវ ប្រសិនបើអ្នករក្សាវាបានល្អនឹងត្រឹមត្រូវ រដូវរបស់អ្នកនឹងមកទៀងទាត់រាល់ខែ ហើយមិនឈឺចាប់នោះទេ៕

អត្ថបទដោយ៖ គន្ធា