និយាយដល់បញ្ហាជំងឺបេះដូងគ្រប់ប្រភេទ ប្រហែលជាមានព័ត៌មានចែករំលែកមិនសូវជាច្រើនប៉ុន្មានទេ ខណៈជំងឺបេះដូងគ្រប់ប្រភេទគឺជាជំងឺសម្ងាត់ស្ងាត់ស្ងៀម សម្លាប់មនុស្សដោយគ្មានសំលេង។ ដោយហេតុនេះហើយទើបក្រុមការងារ Healthy Cambodia បានទៅជួបសម្ភាសផ្ទាល់ជាមួយនឹងវេជ្ជបណ្ឌិតជំនាញ ឯកទេសផ្នែកបេះដូង ដែលមានបទពិសោធន៍ជាង១០ឆ្នាំ គឺលោកវេជ្ជបណ្ឌិត ហុង សុអូន ដែលបច្ចុប្បន្នជាប្រធានមន្ទីរសម្រាកព្យាបាលប៊ែល ឃែរ។ លោកវេជ្ជបណ្ឌិតបានចែករំលែកពីប្រភេទជំងឺដែលលោកឧស្សាហ៍ជួបប្រចាំលើប្រជាជនខ្មែរ និងមូលហេតុដែលជំងឺបេះដូងបានក្លាយជាឃាតកលាក់មុខ សម្លាប់មនុស្សគ្មានដំណឹងទុកមុន។

លោកវេជ្ជបណ្ឌិត ហុង សុអូន បានបញ្ចប់ការសិក្សាថ្នាក់វេជ្ជបណ្ឌិតទូទៅនៅឆ្នាំ២០០៨ ហើយបានបន្តការសិក្សាថ្នាក់ឯកទេសបេះដូង៣ឆ្នាំនៅប្រទេសបារាំងបន្ថែមទៀត ដែលមានជំនាញផ្នែកបេះដូង សរសៃឈាម និងដាក់ថ្មក្នុងបេះដូង។ លោកវេជ្ជបណ្ឌិតបានប្រាប់ថា នៅក្នុងបទពិសោធន៍ជាង១០ឆ្នាំកន្លងមកនេះ លោកសង្កេតឃើញថាចន្លោះខ្វះខាតគឺនៅត្រង់ចំណុចការខ្វះការពិនិត្យសុខភាពជាប្រចាំ ដោយសារតែចំណេះដឹងទូទៅទៅលើការពិនិត្យសុខភាពនៅមិនទាន់ទូលំទូលាយ ទោះបីជាប៉ុន្មានឆ្នាំចុងក្រោយនេះការពិនិត្យសុខភាពហាក់មានភាពប្រសើរឡើងក៏ពិតមែន។

លោកវេជ្ជបណ្ឌិតមានប្រសាសន៍បន្ថែមថា គ្រប់ជំងឺបេះដូងទាំងអស់គឺសុទ្ធសឹងតែជាឃាតកលាក់មុខ។ នៅពេលឈឺតិចៗមិនទាន់ធ្ងន់ធ្ងរ គឺវាមិនបង្ហាញរោគសញ្ញាអ្វីគួរឱ្យកត់សម្គាល់នោះទេ ហើយនៅពេលដែលមានរោគសញ្ញាមានន័យថាស្ថានភាពបេះដូងបានធ្ងន់ធ្ងរបាត់ទៅហើយ។ ហេតុនេះហើយការពិនិត្យសុខភាពជាប្រចាំគឺជារឿងចាំបាច់បំផុតសម្រាប់ការពារជំងឺបេះដូង និងការពារហានិភ័យផ្សេងៗដូចជាការស្លាប់បាត់បង់ជីវិតដោយសារជំងឺបេះដូងនេះផងដែរ។

លោកវេជ្ជបណ្ឌិតបានបញ្ជាក់ថា ជាង១០ឆ្នាំមកនេះលោកសង្កេតឃើញបងប្អូនប្រជាជនខ្មែរយើងមានជំងឺបេះដូងប៉ុន្មានប្រភេទដែលជួបញឹកញាប់ជាងគេ គឺជំងឺសរសៃឈាមបេះដូង, ស្ទះសរសៃឈាមបេះដូង, ជំងឺវិបត្តិចង្វាក់បេះដូង, ជំងឺប្រើសបេះដូង (ត្បៀត, ចំហរ), ជំងឺបេះដូងរីក, ជំងឺបេះដូងខ្សោយនិងជំងឺបេះដូងពីកំណើតជាដើម។

ទោះបីជាយ៉ាងនេះក្តី លោកវេជ្ជបណ្ឌិតប្រាប់បន្ថែមថាជំងឺទាំងនេះភាគច្រើនសុទ្ធតែអាចការពារបាន ប្រសិនបើគាត់យល់ដឹងពីរៀបថែទាំសុខភាព ជាពិសេសគឺពិនិត្យសុខភាពផ្ទាល់តែម្តង។ ខណៈជំងឺខ្លះកើតចេញពីទម្លាប់មិនល្អប្រចាំថ្ងៃដូចជា ផឹកស្រាលើសកម្រិតលើសជាតិពុល មិនហាត់ប្រាណ និងកត្តាផ្សេងៗទៀត។ ជាចុងក្រោយ លោកវេជ្ជបណ្ឌិតលើកទឹកចិត្តឱ្យបងប្អូនប្រជាជនខ្មែរទាំងអស់មានទម្លាប់ការពារប្រសើរជាងព្យាបាល។ ពិនិត្យសុខភាព ចំណាយលុយតិចជាងព្យាបាល ចំណាយពេលតិចជាងព្យាបាល ហើយការពារជីវិតបានល្អជាងការព្យាបាលផងដែរ៕

អត្ថបទដោយ៖ កញ្ញា លីហួយ