ជំងឺសិរមាន់ជាជំងឺកាមរោគមួយដែល បង្កឡើងពីវីរុស HPV6 និង HPV11 ហើយជំងឺនេះកើតឡើងច្រើនសម្រាប់យុវវ័យ ដោយសារគាត់ឆាប់ប្រឡូកក្នុងការរួមភេទ ឬមានការផ្លាស់ប្តូរដៃគូរច្រើន ព្រមទាំងងាយកើតឡើងលើមនុស្សដែលមានទំនាក់ទំនងផ្លូវភេទ។ ជំងឺនេះផ្ដល់ជាផលវិបាកដល់ទាំងបុរសនិងស្ត្រីគ្រប់វ័យទាំងអស់ ជាពិសេសភាគច្រើនកើតចំពោះមនុស្សវ័យក្រោម៣០ឆ្នាំ ។ ប្រសិនបើឆ្លងហើយ វាមិនអាចជាដាច់វិញ១០០ភាគរយទេ មានន័យថាវាងាយនឹងកើតឡើងវិញម្ដងហើយម្ដងទៀត នេះបើផ្អែកតាមការចែករំលែករបស់អ្នកគ្រូពេទ្យ យន់ សូដា ឯកទេសឆ្មបនិងរោគស្ត្រី។

ជាមួយគ្នានេះ មេរោគHPV6 HPV11 នេះ អាចកើតលើទាំងបុរសនិងស្រ្តី នៅប្រដាប់បន្តពូជ។ សម្រាប់ស្ត្រី អាចកើតទ្វារមាសខាងក្នុងនិងខាងក្រៅ ជញ្ជាំងទ្វារមាស រន្ធគូទ និងស្បូនជាដើម។ ករណីកើតឡើងនៅលើស្បូន ងាយនឹងបង្កជាមហារីក។ សម្រាប់បុរសវិញ អាចនៅលើលិង្គ ពងស្វាស ​រន្ធគូទជាដើម។ ចំពោះរោគសញ្ញា នឹងបង្ហាញ ព្រមទាំងបង្កជាផលវិបាកផ្សេងៗគ្នា តាមកន្លែងដែលកើតមាន និងដុះសាច់សិរមាន់ នេះបើផ្អែកតាមការចែករំលែកពីប្រភពHealtline។

រោគសញ្ញានៃជំងឺសិរមាន់ជាទូទៅ មានដូចជា៖

 • ក្រហាយ ឬឈឺទ្វារមាស

 • ធ្លាក់ស

 • រមាស់ទ្វារមាស

 • ហូរឈាមពេលរួមភេទ

 • ចេញដូចឫសតូចៗនៅទ្វារមាស ឬជុះវិញរន្ធគូទ

 • ចេញដូចឫសនៅបំពងក

កត្តាដែលបង្កហានិភ័យ នាំឱ្យកើតជំងឺសិរមាន់មានដូចជា៖

-  ប្រព័ន្ធភាពស៊ាំខ្សោយ

- ឆ្លងតាមការរួមភេទជាមួយអ្នកមានជំងឺសិរមាន់ ឫ ផ្ទុកមេរោគ HPV ដោយមិនបានការពារ 

- ឆ្លងតាមការប៉ះពាល់ផ្លូវភេទ

- ឆ្លងពីម្តាយទៅកូនក្នុងពេលសំរាល

- ឆ្លងតាមការប៉ះពាល់ផ្ទាល់ ( ប្រើបន្ទប់ទឹករួមគ្នា កំរាលពូក កន្សែងពោះគោ សំលៀកបំពាក់ដែលមានមេរោគ HPV ) -ល- ។

ជំងឺនេះទាមទារឱ្យមានការពិនិត្យនិងព្យាបាលពីគ្រូពេទ្យជំនាញ តាមរយៈការ ការប្រើថ្នាំ ការដុតដោយកាំបិតអគ្គិសនី ការបាញ់កាំរស្មី ប្រើវិធីបង្កក់ រួចកាត់ ចេញ និងការវះកាត់ចេញ។

ដើម្បីបង្ការ ត្រូវធ្វើការចាក់វ៉ាក់សាំងដើម្បីការពារជំងឺសិរមាន់។ សម្រាប់មនុស្សដែលមិនទាន់កើត អាចចាក់វ៉ាក់សាំងការពារមានប្រសិទ្ធភាពពី៨០ទៅ៩០ភាគរយ សម្រាប់អ្នកដែលកើតហើយអាចចាក់វ៉ាក់សាំងការពារបានដូចគ្នា ប៉ុន្តែមានប្រសិទ្ធភាពទាបជាង។ សូមធ្វើការពិនិត្យនិងប្រឹក្សាជាមួយគ្រូពេទ្យជំនាញជាមុន ប្រសិនបើអ្នកចង់ធ្វើការចាក់វ៉ាក់សាំងការពារ៕