បញ្ហារបស់មនុស្សស្រី តែងតែជួបជារៀងរាល់ខែគឺការធ្វើទុក្ខពេលមករដូវ ដូចជាចុកពោះ ឈឺចង្កេះស្ទើរតែដាច់ចេញពីគ្នា ចុកដៃចុកជើង អស់កម្លាំង រមួលក្រពើ អ្នកខ្លះអាចរាគ ក្អួតបង្អោរថែមទៀតផង។ ខាងក្រោមនេះជាស្តេចអាហារដែលអាចជួយសម្រាលការឈឺចាប់ទាំងអស់ខាងលើ និងរបៀបក្នុងការញ៉ាំ ដែលដកស្រង់ចេញពីគេហទំព័រសុខភាពHeathline អាចសាកល្បងទាំងអស់គ្នាបាន៖

១ ខ្ញី៖ យកខ្ញីស្រស់ហាន់ជាចំណិតស្តើងៗក្នុងបរិមាណសមល្មង ដាំទឹកឱ្យពុះ ធ្វើជាតែខ្ញីសម្រាប់ទទួលទានពេលនៅក្ដៅឧណ្ហៗ ឬអាចរកទិញប្រភេទតែខ្ញីតែមានលក់ស្រាប់ក្នុងទីផ្សារនានា មកឆុងក៏បាន។ ទទួលទានតែខ្ញីក្ដៅឧណ្ហៗ ១កែវ អាចសម្រាលការឈឺចាប់ដោយការមករដូវរបស់អ្នកបានមួយកម្រិតធំ ព្រោះខ្ញី​មាន​ឥទ្ធិពល​ប្រឆាំង​នឹង​ការ​រលាក ដែល​អាច​បន្ធូរ​សាច់ដុំ​។ ប៉ុន្តែចូលកុំទទួលទានខ្ញីសុទ្ធ លើសពី៤ខាំក្នុង១ថ្ងៃ ព្រោះអាចបណ្តាលឱ្យក្រហាយទ្រូង និងឈឺពោះ។

២ សណ្ដែក៖ សណ្តែកសៀង និងសណ្តែកក្រហម សម្បូរទៅដោយប្រូតេអ៊ីន សម្រាប់ញ៉ាំអាហារបួសតែងតែប្រើវាជំនួសឱ្យសាច់។ នៅពេលមករដូវធ្លាក់ឈាម ធ្វើឱ្យជាតិដែកក្នុងរាងកាយធ្លាក់ចុះ ហេតុនេះសណ្ដែកក៏សម្បូរជាតិដែកជំនួយដល់រាងកាយបាន។ អ្នកអាចយកសណ្ដែកមកស្ងោរ ដាក់លាយអំបិលនិងស្ករ ក្នុងបរិមាណតិចបំផុត ទទួលទានក្ដៅជួយឱ្យរដូវមកបានល្អ កាត់បន្ថយការឈឺចាប់។ ម្យ៉ាងទៀតអាចទទួលទានសណ្ដែកស្ងោរជាមួយលាយជាមួយទឹកដោះគោស្រស់កាន់តែល្អ ប៉ុន្តែមិនលើកទឹកចិត្តឱ្យបន្ថែមទឹកកក ឬខ្ទិះដូងឡើយ។

៣ បន្លែបៃតង ៖ រាងកាយបាត់បង់ជាតិដែកច្រើនពេលមករដូវ ហេតុនេះបន្លែបៃតងល្អបំផុតសម្រាប់បង្គ្រប់ជាតិដែកដល់រាងកាយ គួរជ្រើសញ៉ាំស្ពៃក្ដោប ត្រកួន ខាត់ណា និងបន្លែបៃតងជាច្រើនទៀតផងដែរ។

៤ ប្រភេទសាច់៖ គួរជ្រើសរើសសាច់ដែលសម្បូរជាតិដែក និងប្រូតេអ៊ីនដូចជា សាច់មាន់ សាច់ត្រី។ ក្នុងសាច់ត្រី ក៏មានអូមេហ្គា៣ អាចជួយកាត់បន្ថយការឈឺចាប់ពេលមករដូវបាន។ មិនតែប៉ុណ្ណោះសាច់២ប្រភេទនេះ អាចជួយឱ្យឆ្អែតបានយូរ មិនឃ្លានផ្ដេសផ្ដាស ល្អបំផុតសម្រាប់អ្នកចង់សម្រកគីឡូ។

ក្រៅពីការជ្រើសញ៉ាំអាហារខាងលើនេះ ក៏នៅអាចបន្ថែមអាហារណាដែលសម្បូរជាតិដែក ផ្លែឈើ គ្រាប់ធញ្ញជាតិ Quinoa ជាដើម។ ម្យ៉ាងវិញទៀត ដើម្បីបំបាត់ការឈឺចាប់ លោកអ្នកអាចស្អំទឹកក្ដៅបន្ថែម ហាត់ប្រាណ ធ្វើការម៉ាហ្សាត្រង់ពោះនិងឆ្អឹងខ្នងបន្ថែមផងដែរ៕

អត្ថបទដោយ៖ Senghong