ភាពរអាករអួលនៃប្រព័ន្ធរំលាយអាហារ បង្កជាបញ្ហាពិបាកបត់ជើង បត់ជើងមិនទៀងទាត់  បត់ជើងម្ដងៗចំណាយពេលរាប់ម៉ោង ពេលខ្លះឈឺចាប់ រមាស់ ថែមទាំងមានឈាមទៀតផង។ យោងតាម អ្នកឧកញ៉ាវិជ្ជបណ្ឌិត គួច ម៉េងលី ធ្លាប់បានពន្យល់ថា ប្រសិនបើមានបញ្ហាក្ដៀនលាមកញឹកញាប់ ប្រឹងខ្លាំងនៅពេលបត់ជើង ធ្វើឱ្យសរសៃវែនហើមប៉ោង ឬអាចដាច់រលាត់ រហែករន្ធគូថ ដែលជាហេតុធ្វើឱ្យមានហូរឈាម យូរៗទៅអាចបង្ករឱ្យក្លាយជាជំងឺឫសដូងបាត ថែមទៀត។

ជាតិកាកសរសៃជាសារធាតុចាំបាច់មួយដែលរាងកាយមិនអាចខ្វះបាន តាមការណែនាំពីmayoclinic បានណែនាំថា ស្រ្តីគួរតែព្យាយាមញ៉ាំជាតិសរសៃយ៉ាងហោចណាស់ ២១ទៅ២៥ ក្រាមក្នុងមួយថ្ងៃ ចំណែកបុរសគួរតែកំណត់ពី ៣០ទៅ៣៨ ក្រាមក្នុងមួយថ្ងៃ។ ខាងក្រោមនេះជាអាហារមួយចំនួន ដែលមានផ្ទុកជាតិកាកសរសៃច្រើន អ្នកគួរបន្ថែមវាចូលក្នុងរបបអាហារប្រចាំថ្ងៃរបស់អ្នកឱ្យបានច្រើនជាងសាច់ និងអាហារវិចខ្ចប់ ជាពិសេសអ្នកមានបញ្ហាខ្សោយប្រព័ន្ធរំលាយអាហារគួរគិតគូរឡើងវិញ៖

ក្រុមផ្លែឈើ៖ ផ្លែឈើទាំងអស់នេះ ត្រូវបានគេប៉ានស្មានឃើញថាក្នុងបរិមាណមធ្យមរបស់វា មានជាតិកាកសរសៃពី៣ទៅ៨ក្រាម។ ផ្លែឈើទាំងនោះមានដូចជាផ្លែប័រ ផ្លែចេក ផ្លែប៉ោម ផ្លែក្រុច ផ្លែសារី ស្ត្រូបបឺរី និងពពួកផ្លែបឺរីជាដើម។

ក្រុមបន្លែ៖ ក្នុងបរិមាណមធ្យមនៃបន្លែទាំងនេះអាចមានជាតិកាកសរសៃពី៤ទៅ៩ក្រាម។ បន្លែដែលអ្នកមិនគួររំលង មានដូចជា ប្រូខូលី សណ្ដែកជប៉ុន ពោត ការ៉ុត ផ្កាខាត់ណា ដើមខាត់ណា និងពពួកបន្លៃស្លឹកបៃតងជាច្រើនទៀត។

ក្រុមធញ្ញជាតិ៖ គ្រាប់ជី គ្រាប់អាល់ម៉ុន សណ្ដែកខ្មៅ គ្រាប់ផ្កាឈូករ័ត្ន គ្រាប់ Pistachios។ល។

អ្នកអាចបន្ថែមអាហារទាំងនេះ ដោយទទួលទានផ្លែឈើលាយជាមួយគ្រាប់ធញ្ញជាតិ យ៉ាអ៊ួរ ឬទឹកដោះគោធ្វើឱ្យអាហារពេលព្រឹកឬពេលល្ងាច។ ឬអាចយកវាបញ្ជូលគ្នាធ្វើជាទឹកក្រឡុកបាន ដោយមិនចាំបាច់បន្ថែមជាតិផ្អែមឬស្ករពីលើទេ។ សម្រាប់អាហារថ្ងៃត្រង់អ្នកគួរតែព្យាយាមទទួលទានម្ហូបអាហារដែលមានបន្លែ និងត្រី ឱ្យច្រើនជាសាច់។ ផ្លាស់ប្តូររបបអាហាររបស់នេះ ឡើងវិញឱ្យបានពី២សប្ដាហ៍ឡើងទៅ អ្នកនឹងសង្កេតឃើញថាប្រព័ន្ធរំលាយអាហារសរបស់អ្នកដំណើរការល្អជាងមុន លាហើយបញ្ហាពិបាកបត់ជើង ៕ 

អត្ថបទដោយ៖ Senghong