ហើយលោកគ្រូពន្យាល់ថា ចំពោះរាងកាយគ្មានសាច់ដុំ ហើយមិនហាត់ប្រាណបន្តនោះ ពេលគាត់ហូបអាហារមិនសុខភាព មានអាហារមានខ្លាញ់ច្រើន និងផឹកភេសជ្ជៈមានជាតិផ្អែមលើសកម្រិត ហើយពេលយប់បន្ថែមស្រាបន្ថែមសាច់ក្លែមបើមិនឡើងគីឡូទើបចម្លែក។ ការហូបបែបនេះ រាងកាយស្រូបសារធាតុខ្លាញ់ ជាតិផ្អែមមកផ្ទុកក្នុងរាងកាយលើសកម្រិត មិនដឹងបញ្ចេញទៅណា វាបង្កឱ្យកើតជាតិខ្លាញ់នៅក្នុងខ្លួនហ្នឹង។ មានរាងកាយមួយបែបទៀត គឺរាងកាយមានសាច់ដុំ ហូបអាហារលើសកម្រិត មិនងាយធាត់ទេ ព្រោះគេមានសាច់ដុំជួយទប់ ប៉ុន្តែបើគេមិនបន្តហាត់ប្រាណទេ យូរៗ ទៅ សាច់ដុំអស់គ្មានអ្វីជួយទប់គេក៏ធាត់ដូចតែគ្នាដែរ”។ បន្តហាត់ប្រាណ បន្តរាងស្លីម។

ការហាត់ប្រាណនិងរបរអាហារសុខភាពមិនអាចកាត់ចេញពីគ្នានោះទេ។ លោកគ្រូ សំបូរ នន់បានលើកឡើងថា គោលដៅហាត់ប្រាណ សម្រកខ្លាញ់ បង្កើនសាច់ដុំ។ ការហាត់ប្រាណបែបជិះកង់ រត់ និងដើរ ដើម្បីសម្រកខ្លាញ់ ប៉ុន្តែសាច់ដុំរបស់អ្នកក៏ស្រកតាមដែរ។ ចឹងហើយការហាត់ប្រាណ គេឱ្យលេងលើកដុំដែកឬរបស់រាងធ្ងន់ៗ ខ្លះដើម្បីបង្កើនសាច់ដុំ អស់ជាតិខ្លាញ់។ សម្រាប់អាហារល្អដល់សុខភាពនិងសាច់ដុំជាអាហារសាមញ្ញៗ ទេមានដូចជាស៊ុត មានត្រី មានសាច់គោ មានបន្លែការ៉ុត ស្ពៃខៀវ សាឡាត់ និងត្រសក់។ សម្រាប់ផ្លែឈើមានផ្លែប័រ ផ្លែប៉ោម ផ្លែចេក និងផ្លែល្ហុងទុំ...។ ទម្លាប់ហូបអាហារសុខភាពបែបនេះ មុនដំបូងរាងកាយអស់កម្លាំងបន្តិចព្រោះមិនទាន់សុំាជាមួយទម្លាប់បែបនេះ។ ពេលយើងព្យាយាមបន្តិច ទម្លាប់អាក្រក់ពីមុន យើងលែងមានហើយ មានតែទម្លាប់ល្អៗ ក្នុងជីវិត។

ការពិត! ការហាត់ប្រាណមានអត្ថប្រយោជន៍ចំពោះសុខភាពល្អណាស់។ លោកគ្រូ សំ បូនន់ បានលើកឡើងថា ខ្ញុំបានណែនាំសិស្សរបស់ខ្ញុំ មិនមែនហាត់ប្រាណមួយខែ មួយឆ្នាំឈប់ទេ ហាត់ប្រាណឱ្យក្លាយជាទម្លាប់។ ពេលយើងមានទម្លាប់ល្អ សុខភាពក៏ល្អដែរ”។ បើអ្នកចង់ស្រកគីឡូមិនមែនហាត់ប្រាណ ១០ទៅ២០នាទីទេ គឺតាំងចិត្តមុនដំបូងហាត់ចាប់ពី៤០នាទីដែរ។ វាត្រូវការអ្នករត់លើម៉ាស៊ីនផង ដើរផង និងហាត់ប្រាណលើកដុំដែកផង ទើបការសម្រកគីឡូរបស់អ្នកសម្រេចបាន។ មានរឿងមួយទៀត ហាត់ប្រាណមានគុណភាពក្នុងការសម្រកគីឡូគឺហាត់មានគ្រូបង្រៀនចាំណែនាំ។ ទោះបីយើងចាយលុយមួយរយៈពេលមែន តែយើងបានសុខភាពល្អ ហើយចេះក្បូនហាត់ប្រាណបានត្រឹមត្រូវ ហើយបានហាត់អស់មួយជីវិតផងដែរ។ សុខភាពជាទ្រព្យដ៏តម្លៃបំផុតក្នុងជីវិតមនុស្សយើង៕ អត្ថបទដោយ៖ ទ្រ សុភាព