តាមរយៈការស្រាវជ្រាវមួយទៀតបានលើកឡើងថា ស្រាអាចជាមូលហេតុសំខាន់នៃការស្លាប់ចំពោះអ្នកជំងឺទឹកនោមផ្អែមប្រភេទទី 1។ អ្នកស្រាវជ្រាវមកពីប្រទេសហ្វាំងឡង់បានពិនិត្យមើលនិន្នាការរយៈពេលខ្លី និងរយៈពេលវែងនៃអត្រាមរណសម្រាប់អ្នកជំងឺ 17,306 នាក់ចន្លោះឆ្នាំ 1970 និង 1999។ អ្នកជំងឺទាំងអស់មានជំងឺទឹកនោមផ្អែមប្រភេទទី 1 និងមានអាយុក្រោម 30 ឆ្នាំ។ អ្នកស្រាវជ្រាវទាំងនេះបាននិយាយថា ការកើនឡើងនៃអត្រាមរណគឺទាក់ទងនឹងគ្រឿងស្រវឹង គ្រឿងញៀន និងផលវិបាកយ៉ាងធ្ងន់ធ្ងរនៃជំងឺទឹកនោមផ្អែម។ 

យ៉ាងណាកដ៏ដោយ ការផឹកស្រាម្ដងម្កាល វាមិនមានបញ្ហាធ្ងន់ធ្ងរទេ ប្រសិនបើអ្នកមានជំងឺទឹកនោមផ្អែម ហើយពិតជាចូលចិត្តភេសជ្ជៈ ឬចូលចិត្តផឹកស្រាខ្លាំង ពិបាកក្នុងការផ្ដាច់ភ្លាមៗ មានវិធីដ៏ល្អមួយគឺអ្នកត្រូវតែទៅពិគ្រោះជាមួយវេជ្ជបណ្ឌិតដើម្បីទទួលបានការណែនាំមួយដែលអាចទុកចិត្តបានមុនពេលផឹក ។ សូមចាំថា ពេលខ្លះ ការផឹកស្រាអាចធ្វើឱ្យកម្រិតជាតិស្ករក្នុងឈាមរបស់អ្នកធ្លាក់ចុះក្រោមកម្រិតធម្មតា។ វាកើតឡើងដោយសារតែថ្លើមរបស់អ្នកផ្តោតការយកចិត្តទុកដាក់លើការដកជាតិអាល់កុលចេញពីចរន្តឈាម ជំនួសឱ្យការគ្រប់គ្រងកម្រិតជាតិស្កររបស់អ្នក។ ហើយនេះគឺជាស្ថានភាពដ៏គ្រោះថ្នាក់មួយ ដែលធ្វើឱ្យអ្នកប្រហែលជាមិនដឹងថាកម្រិតជាតិស្ករ បានធ្លាក់ចុះ។ 

មួយវិញទៀតការផឹកស្រាច្រើន អាចធ្វើឱ្យអ្នកកើតនូវជំងឺ hypoglycemic ហើយរោគសញ្ញារបស់វាមានដូចជា៖ ស្រវាំងភ្នែក វិលមុខ ឈឺក្បាល ងងុយគេង ។ ជួនកាល ជាតិអាល់កុលអាចមានប្រតិកម្មជាមួយនឹងថ្នាំជំងឺទឹកនោមផ្អែមមួយចំនួន។ ដូច្នេះហើយទើបបានថាអ្នកត្រូវគួរតែទៅជួបពិគ្រោះជាមួយគ្រូពេទ្យដែលមានជំនាញ ប្រសិនបើអ្នកពិបាកក្នុងការផ្ដាច់ស្រា។ ផលវិបាកមួយនៃជំងឺទឹកនោមផ្អែមគឺការខូចខាតប្រព័ន្ធសរសៃប្រសាទ ជាតិអាល់កុលអាចធ្វើឱ្យស្ថានភាពនេះកាន់តែធ្ងន់ធ្ងរឡើង និងធ្វើឱ្យការឈឺចាប់កាន់តែខ្លាំងដូចជា ស្ពឹកស្រពន់ និងរោគសញ្ញាផ្សេងទៀតនៃការខូចខាតសរសៃប្រសាទ។ វាក៏អាចបង្កើនកម្រិតសម្ពាធឈាមរបស់អ្នក និងបង្កជាជំងឺបេះដូងបានដែរ៕  

អត្ថបទដោយ៖ សារួ