មនុស្សភាគច្រើនស្ទើរតែមួយចំណែកធំនៅពេលកំពុងយំតែងតែជួបបញ្ហាអួលដើមកពិបាកក្នុងការនិយាយស្ដី ដែលវានៅតែចោទជាសំណួរថាតើបណ្ដាលមកពីមូលហេតុអ្វីឲ្យប្រាកដទើបធ្វើឲ្យយើងអួលដើមក ដូច្នេះហើយនៅក្នុងថ្ងៃនេះដែរចាបបៃតងនឹងមកស្វែងរកចម្លើយស្រាយចម្ងល់ដើម្បីឲ្យបានយល់ដឹងនូវបញ្ហាមួយនេះដូចខាងក្រោមនេះ៖
មុននឹងឈានដល់ការបកស្រាយពីមូលហេតុទាំងស្រុងយើងសូមលើកយកពីសរីរាង្គគោលដែលមានការពាក់ព័ន្ធគ្នាដូចជាLarynx។ Larynx មកពីពាក្យក្រិកបុរាណ ដែលជាទូទៅគេហៅថា ប្រអប់សំឡេង គឺជាសរីរាង្គមួយនៅផ្នែកខាងលើនៃកញ្ចឹងក ដែលពាក់ព័ន្ធនឹងការដកដង្ហើម បង្កើតសំឡេង និងការពារបំពង់ខ្យល់ប្រឆាំងនឹងការស្រូបអាហារ។ ការបើក Larynx ចូលទៅក្នុង Pharynx ដែលគេស្គាល់ថាជា larynx inlet មានអង្កត់ផ្ចិតប្រហែល ៤ទៅ៥ សង់ទីម៉ែត្រ។ បំពង់កមានខ្សែសំឡេង ហើយរៀបចំកម្រិតសំឡេងចាំបាច់សម្រាប់ការបញ្ចេញសំឡេង។
ដោយផ្អែកលើប្រភពព័ត៌មានYahoo Life បានអះអាងថា មូលហេតុដែលយើងអួលដើមកហើយនិយាយមិនចេញពេលដែលយើងកំពុងយំនោះ គឺដោយសារតែពេលយំបានបង្កឲ្យមានការប្រឹងលេបទឹកមាត់ ខណៈសកម្មភាពនេះបានធ្វើឲ្យសាច់ដុំនៃបំពង់កព្យាយាមបិទខណៈពេល Glottis (ផ្នែកកណ្ដាលនៃបំពង់កហៅថា Larynx) ប្រឹងបើកឲ្យទូលាយដើម្បីស្រូបយកអុកស៊ីសែន ដោយភាពតានតឹងត្រង់សាច់ដុំបំពង់កនេះធ្វើឲ្យអ្នកមានអារម្មណ៍ថា ដូចជាមានដុំមួយក្នុងបំពង់កដែលបណ្ដាលឲ្យអ្នកស្ទះនិយាយមិនចេញ។
បន្ថែមពីនោះទៀតអ្នកជំនាញបានលើកទឹកចិត្តឲ្យយើងយំក្នុងអំឡុងពេលដែលយំចង់យំ ត្រង់ចំនុចនេះបានន័យថាកាលណាដែលយើងព្យាយាមទប់ទឹកភ្នែកមិនឲ្យយំវានឹងធ្វើឲ្យសាច់ដុំបំពង់កតឹងណែននឹងបណ្ដាលឲ្យយើងពិបាកក្នុងដកដង្ហើមតឹងណែនទ្រូងជាដើម។ លើសពីនេះការយំវានឹងធ្វើឱ្យយើងមានអារម្មណ៍ធូរស្រាលផ្លូវចិត្តច្រើន ដូច្នេះហើយយើងកុំមានអារម្មណ៍ខ្មាស់អៀនក្នុងការស្រក់ទឹកភ្នែក ៕
អត្ថបទដោយ៖ ស្រីណុច