ទម្លាប់ទី១. ចេះរីករាយ សម្រស់កាន់តែស្រស់។ អ្នកនឹងឃើញមនុស្សមានទម្លាប់ខឹងច្រើន ស្អប់ច្រើន ច្រើនតែបង្ហាញសម្រស់ចាស់ជាងវ័យ។ ចូរអ្នករីករាយជាមួយជីវិតនេះ រីករាយជាមួយកិច្ចការតាមលទ្ធភាព និងជាមួយគ្រួសារ ទើបផ្លូវចិត្តអ្នកគ្មានសម្ពាធ គ្មានអារម្មណ៍រុំទុក្ខលំបាក ពេលចិត្តបែបនេះ ធ្វើឱ្យសម្រស់របស់អ្នកបង្ហាញលើផ្ទៃមុខស្រស់ស្អាតណាស់។ តាមព្រះពុទ្ធបានសម្តែងថា បុគ្គលមានចិត្តរីករាយជាមួយពេលសព្វថ្ងៃនេះ តែងមានស្បែកស្រស់ថ្លា និងមានក្តីសុខក្នុងជីវិត។

ទម្លាប់ទី២. ការពារស្បែកពីកម្តៅព្រះអាទិត្យជាវិធីសាស្រ្តថែទាំសុខភាពស្បែក។ ពេលស្បែកត្រូវកម្តៅក្រោមពន្លឺព្រះអាទិត្យជាប្រចាំវាបង្ករទៅជាស្នាមជ្រាវជ្រួញ អាចម៍រុយ និងបញ្ហាស្បែកមួយចំនួនទៀត ហើយវាក៏អាចបង្កើនហានិភ័យក្នុងការកើតជម្ងឺមហារីកស្បែកផងដែរ។ គ្រាន់តែអ្នកលាបឡេការពារកម្តៅពន្លឺព្រះអាទិត្យ និងពាក់អាវក្រាស់ៗ ស្បែកអ្នកកាន់តែសុខភាពល្អ។

ទម្លាប់ទី៣. ការលាបទឹកឃ្មុំលើផ្ទៃមុខជួយកម្ចាត់មុន និងកាត់បន្ថយការរោលរលាកលើផ្ទៃមុខរបស់អ្នកបានល្អបំផុត។ អ្នកត្រូវលាបទឹកឃ្មុំចំនួនសមល្មមទៅលើមុន រួចទុកចោលសម្រាប់រយៈពេល ១០នាទីចាំអ្នកទៅលាងសម្អាតចេញជាមួយនឹងទឹកក្ដៅឧណ្ហៗ ដើម្បីសម្រស់អ្នកកាន់តែក្មេងជាងវ័យ។

 ទម្លាប់ទី៤. ហូប​អាហារធម្មជាតិដូចជាបន្លែនិងផ្លែឈើភាគច្រើន ស្បែករបស់អ្នកកាន់ក្មេងជាងវ័យ។​ ព្រោះរបប​អាហារ​​មាន​តុល្យភាព វា​សម្បូរ​ទៅ​ដោយ​សារធាតុ​ចិញ្ចឹម​​សំខាន់​ៗ មានជាតិវីតាមីន​ និង​សារធាតុ​ប្រឆាំង​នឹង​អុកស៊ីតកម្ម​ ដែល​អាច​ជួយ​ជំរុញ​​ដល់​ការ​ផលិត​ជាតិ​ខូឡាជែនដើម្បី​ជួយ​​ស្បែក​កម្រចាស់ណាស់។ មានអាហារដូចជា​បន្លែ និង​ផ្លែឈើ ប្រូតេអ៊ីន​គ្មាន​ខ្លាញ់ និងផឹកទឹក​ឱ្យបាន​គ្រប់គ្រាន់​បានឈាម និងស្បែកអ្នកមានរសជាតិក្មេងជាងវ័យ។

ទម្លាប់ទី៥. គេងគ្រប់ សម្រស់ក្មេង។ តាមលោក Héctor García និងលោក Francesc Miralles ជាអ្នកនិពន្ធសៀវភៅ Ikigai: The Japanese secret to a long and happy life បានលើកឡើងពីការថែសម្រស់របស់អ្នកបង្ហាញម៉ូតថា អ្នកបង្ហាញម៉ូតអាជីពអាចរក្សាសម្រស់នៅតែស្រស់ស្អាត មកពីពួកគេគេងចន្លោះពី ៩ទៅ១០ម៉ោងក្នុងមួយយប់មុនពេលគេដើរបង្ហាញម៉ូត។ ការគេងបែបនេះផ្តល់ឱ្យស្បែករបស់គេតឹងគ្មានស្នាមជ្រួញ សម្រស់មានពន្លឺថ្លា ហើយមានស្មារតីល្អក្នុងការដើរផងដែរ៕ អត្ថបទដោយ៖ ទ្រ សុភាព