មនុស្សជាច្រើនដែលមានជំងឺទឹកនោមផ្អែម ក៏មានបញ្ហាបេះដូងផងដែរ។ ជំងឺទឹកនោមផ្អែម គឺជាការមានជាតិស្ករច្រើនពេកនៅក្នុងឈាម។ នៅពេលមានជំងឺទឹកនោមផ្អែម ជាតិស្ករកកើតកាន់តែច្រើនឡើងនៅក្នុងឈាមធ្វើឱ្យអសមត្ថភាពក្នុងការផលិត ឬប្រើអាំងស៊ុយលីន ដែលជាប្រភេទនៃអ័រម៉ូនក្នុងការបំលែងសារជាតិគ្លុយកូស (សារជាតិស្ករ) ទៅជាថាមពល ប្រសិនបើមិនធ្វើការព្យាបាលនោះទេធ្វើឱ្យមានការបំផ្លាញដល់សរីរាង្គសរសៃប្រសាទ សរសៃឈាម និងមានបញ្ហាធ្ងន់ធ្ងរដល់រាងកាយដែលបង្កគ្រោះថ្នាក់ជាអចិន្ត្រៃយ៍ ឬស្លាប់បាន។
ខាងក្រោមនេះជារោគសញ្ញាដែលអាចកើតឡើងចំពោះរាងកាយរបស់អ្នកនៅពេលមានជំងឺទឹកនោមផ្អែម៖
- ដាច់សរសៃឈាមខួរក្បាល (Stroke)៖ អ្នកដែលមានជំងឺទឹកនោមផ្អែមអាចបណ្តាលឱ្យមាន ការប្រឈមមុខនឹងដាច់សរសៃឈាមខួរក្បាលខ្ពស់ជាងអ្នកដែលមិនមានជំងឺ។
- ប៉ះពាក់ដល់ការមើល (visual disturbances)៖ ធ្វើឱ្យសរសៃឈាមនៅក្នុងភ្នែកខូច ដែលបណ្តាលឱ្យមានការរំខានដល់ការមើល ប្រសិនបើមិនមានការព្យាបាលទេអាចបណ្តាលឱ្យងងឹតភ្នែក។
- ស្រេកទឹកខ្លាំង (extreme thirst)៖ រោគសញ្ញានៃការស្រេកទឹកអាចលេចចេញឡើងក្នុងដំណាក់កាលដំបូងនៃជំងឺទឹកនោមផ្អែម។
- ប្រឈមុខនឹងជំងឺបេះដូង(risk of heart disease)៖ ជំងឺលើសឈាម និងសរសៃឈាមដែលរងការខូចខាត បានដាក់សម្ពាធបន្ថែមលើបេះដូង បង្កើនឱ្យមានហានិភ័យនៃជំងឺសរសៃឈាមបេះដូង។
- អស់កម្លាំង (fatigue and lack of energy)៖ ការដែលមានបញ្ហាលើតម្រងនោម និងលំពែង បណ្តាលឱ្យអ្នកអស់កម្លាំងកាន់តែខ្លាំង រួមជាមួយនឹងបាតើបង់ចំណង់ផ្លូវភេទ។
- ការបង្ករោគលើស្បែក (skin infection)៖ ការមិនអាចគ្រប់គ្រង ការកកើតឡើងសារជាតិស្ករក្នុងឈាម ធ្វើឱ្យរាងកាយបាត់បង់សារជាតិទឹកក្នុងអាត្រាលឿន ធ្វើឱ្យស្បែកមានសភាពស្ងួត និងប្រេះ ជាពិសេសនៅលើប្រអប់ជើង។
- ប៉ះពាល់ដល់សរសៃប្រសាទ (Never damage)៖ ការបំផ្លាញសរសៃប្រសាទដែលធ្វើឱ្យខូច ដល់សរសៃប្រសាទដែលជារឿយៗមានអារម្មណ៍ថាដូចជាមានម្ជុលចាក់ និងមានសភាពស្ពឹក ឬឈឺចាប់។
តើនរណាខ្លះដែលគួរធ្វើតេស្ត៍?
យើងអាចធ្វើតេស្ត៍មើលកម្រិតជាតិស្ករក្នុងឈាមបាន ដោយតាមរយៈការធ្វើតេស្ត៍ឈាម ឬទឹកនោម។ ការធ្វើតេស្ត៍ឈាមគឺ មានភាពសុក្រិតជាង។ មនុស្សម្នាក់គួរធ្វើតេស្ត៍ជំងឺទឹកនោមផ្អែម ប្រសិនបើគាត់៖ អ្នកដែលមានរោគសញ្ញានៃជំងឺទឹកនោមផ្អែម មានសមាជិកគ្រួសារដែលមានជំងឺទឹកនោមផ្អែម អ្នកដែលមានអាយុលើស៤០ឆ្នាំ មានប្រវត្តិជំងឺលើសឈាម ធ្លាប់កើតកូនដែលមានមាឌធំ និងមានវ័យក្មេងដែលមានសញ្ញានៃជំងឺទឹកនោមផ្អែមប្រភេទទី១ ។
បញ្ជាក់៖ សូមធ្វើការពិនិត្យសុខភាពឱ្យបានទៀងទាត់ និងធ្វើការប្រឹក្សាជាមួយពេទ្យជំនាញដើម្បីអ្នកយល់កាន់តែច្បាស់ពីស្ថានភាពជំងឺរបស់អ្នក។
ប្រភព៖ hesperian health Guides
កែសម្រួលដោយ៖ Ms. Sem Sotheay