ការគេងតិចធ្វើឱ្យខួរក្បាលឆាប់ភ្លេច និងរាងកាយងាយទ្រុឌទ្រោម។ ជាពិសេសអ្នកគេងមួយយប់ត្រឹម ២ទៅ៣ម៉ោង រហូមានជំងឺមួយគឺ ជំងឺខ្លាចយប់។ បើខ្ញុំប្រាប់អ្នកថា មានទម្លាប់ងាយៗ ជួយអ្នកយកឈ្នះជំងឺខ្លាចយប់ ឱ្យអ្នកឆាប់ចូលគេង តើអ្នកហ៊ានធ្វើតាមទេ? ទម្លាប់ទីមួយ កាត់ផ្តាច់ទូរស័ព្ទមុនចូលគេងរយៈពេល ១ម៉ោង។ យោងតាមគេហទំព័រ Clevelandclinic បានចុះផ្សាយថា ទូរស័ព្ទមានសមត្ថភាពទាញកែវភ្នែករបស់អ្នកឱ្យសម្លឹងលើអេក្រង់រហូតរំខានដល់អារម្មណ៍និងខួរក្បាលឡើងស្មុគ។ ទម្លាប់នេះជម្រុញអារម្មណ៍អ្នកឱ្យលេងបន្តដោយអត់ដឹងខ្លួនទេ។
ទម្លាប់លេងទូរស័ព្ទបែបនេះជាទម្លាប់ពន្យាពេលក្នុងការគេងធ្វើឱ្យអ្នកបើកភ្នែកដល់យប់ជ្រៅ ១ឬម៉ោង២ឯណោះ។ ទម្លាប់បែបនេះជាអ្នកដឹកនាំខួរក្បាល និងអារម្មណ៍របស់អ្នកឱ្យបន្តលេងទូសព្ទពីមួយថ្ងៃទៅមួយ វាជះឥទ្ធិពលដល់ការគេងរបស់អ្នក ហៅថា ទម្លាប់ញៀនបណ្តាញសង្គមកាត់បន្ថយគុណភាពនៃការគេង។ គ្រាន់តែអ្នកដកភ្នែកចេញពីទូរស័ព្ទរយៈពេល១ម៉ោង អ្នកនឹងមានអារម្មណ៍ឆាប់គេង។ បើអ្នកជម្នះទម្លាប់ទី១បាន ជំងឺខ្លាចយប់នឹងសុំចាញ់។
ពេលអ្នកមានទម្លាប់ល្អទីមួយ ដកកែវភ្នែកចេញពីទូរស័ព្ទហើយ បន្តទៅទម្លាប់ទីពីរ គឺរៀនសមាធិ ១០នាទីមុនចូលគេងដើម្បីប្រព័ន្ធសរសៃប្រសាទខួរក្បាលរៀបចំតាមសម្រួលហើយធ្វើឱ្យខួរក្បាលរបស់អ្នកស្ងប់ ឆាប់គេងលក់លឿន។ បើអ្នកនិយាយថា ខ្ញុំមិនចូលចិត្តវិធីនេះទេ... ខ្ញុំគ្មានពេលទេ... ខ្ញុំចង់គេងឱ្យឆាប់បំផុត...។
បើអ្នកមានទម្លាប់បែបខាងលើនេះ អ្នកមានបញ្ហាគេងមិនលក់ គ្មានអ្វីចម្លែកទេ។ ព្រោះអ្នកនាំទម្លាប់មិនល្អដាក់ចូលក្នុងជីវិត ទម្លាប់អាក្រក់ ផលក៏នាំឱ្យប៉ះពាល់ការគេងរបស់អ្នកដូចគ្នាដែរ។ ពេលអ្នកអង្គុយសមាធិ ១០នាទីគ្រាន់តែដកដង្ហើមចេញចូលតាមរន្ធច្រមុះដោយមានសតិដឹង អ្នកនឹងមានអារម្មណ៍ថា ចិត្តខ្ញុំស្ងប់! ខួរក្បាលខ្ញុំត្រជាក់! Wow! ខ្ញុំមានអារម្មណ៍ងងុយគេងហើយ។ ឈប់សិន! នៅមានទម្លាប់កំពូលមួយទៀតគឺទម្លាប់អានសៀវភៅ។ បើអ្នកមិនចូលចិត្តអានសៀវភៅទេ វាជាឱកាសល្អបំផុត ជួយអ្នកឆាប់ងងុយគេងបានលឿន។ មនុស្សភាគច្រើនគ្មានទម្លាប់អានសៀវភៅ ពេលអានសៀវភៅភ្នែកបើកមិនរួចទេ គឺឆាប់ងងុយគេងយកសៀវភៅគ្រាបមុខណាស់។ អ្នកសាកអានសៀវភៅលេងៗ គេងលក់មែនទែនមិនខាន។ នេះជាវិធីសាមញ្ញៗ ជួយជម្រុញខួរក្បាលរបស់អ្នកស្ងប់មុនចូលគេងលឿនបំផុត៕ អត្ថបទដោយ៖ ទ្រ សុភាព