តម្រងនោមឬក្រលៀនជាសរីរាង្គសំខាន់មួយដែលមិនអាចខ្វះបានឡើយ អ្វីដែលជាបញ្ហាកាលណាប្រហែសបណ្ដោយឱ្យតម្រងនោមមានជំងឺហើយនោះ វានឹងបង្កផលវិបាកជាច្រើន។ ពីព្រោះថាជំងឺតម្រងនោមត្រូវចំណាយលុយច្រើនក្នុងការព្យាបាល ប្រសិនបើព្យាបាលមិនទាន់ពេលវេលា ឬមិនបានត្រឹមត្រូវ តម្រងនោមមានបញ្ហាស្រាប់ទៀត បូកថែមជាមួយទម្លាប់ល្អទៀតនោះ អាចវិវត្តទៅជា ខូចតម្រងនោម កាន់តែធ្ងន់ធ្ងរអាចតម្រូវឱ្យមានការលាងឈាម​ឬប្តូរក្រលៀនជាដើម។

ហេតុដូចនេះ ជារឿងចាំបាច់បំផុតដែលត្រូវរក្សាតម្រងនោមរបស់ខ្លួនឯងឱ្យបានល្អកុំឱ្យឈឺ ជាពិសេសគួរចៀសទម្លាប់ទូទៅប្រចាំថ្ងៃដែលអាចធ្វើឱ្យប៉ះពាល់ដល់សុខភាពតម្រងនោម។ ផ្អែកតាមប្រភព freemanhealth បានឱ្យដឹងពីទម្លាប់ប្រចាំថ្ងៃដែលអ្នកមិនគួររំលងព្រោះវាអាចធ្វើឱ្យក្រលៀនរបស់អ្នកមានបញ្ហាបាន។

១ ទទួលទានប្រៃពេក៖ ទទួលទានប្រៃ ឬអំបិលច្រើនពេកងាយធ្វើឱ្យសម្ពាធឈាមឡើងខ្ពស់ គឺជាកត្តាហានិភ័យមួយទៀតសម្រាប់ជំងឺខ្សោយតម្រងនោម។ ជាធម្មតា មនុស្សវ័យជំទង់ត្រូវការជាតិអំបិល ចន្លោះពី ៤៦០ទៅ ៩២០មីលីក្រាម ក្នុងមួយថ្ងៃ ចំណែកឯកូនក្មេងត្រូវការជាតិអំបិលចន្លោះពី ៣០០ ទៅ ៦០០មីលីក្រាមក្នុងមួយថ្ងៃ ។

២ ទទួលទានទឹកមិនគ្រប់៖ ការទទួលទានទឹកមិនគ្រប់គ្រាន់អាចបង្កហានិភ័យជំងឺរ៉ាំរ៉ៃក្នុងខ្លួន រួមទាំងជំងឺតម្រងនោមផងដែរ។ វេជ្ជបណ្ឌិត អ៊ឹង ម៉េងលាង ឯកទេស ផ្នែកវះកាត់ជំងឺក្រួសតម្រងនោម នៅមន្ទីរពេទ្យព្រះអង្គឌួង ធ្លាប់បានលើកឡើងថា ចាប់ពីវ័យមនុស្សចេះញុំាអាហារចេះផឹកទឹក​គឺអាចនឹងបង្កជាជំងឺក្រួសតម្រងនោមបាន បើមិនប្រយ័ត្ន ពិសេសគឺអ្នកដែលមានទម្លាប់ផឹកទឹកតិចៗ។ ហេតុនេះមនុស្សពេញវ័យក្នុងមួយថ្ងៃគួរទទួលទានទឹកយ៉ាងហោចណាស់២លីត្រដែរ។

៣ រស់នៅរបៀបស៊ីអារម្មណ៍៖ ទម្លាប់ឱ្យខ្លួនឯងខ្ជិលទទួលទានអាហារមិនល្អច្រើន អាហារកែច្នៃ អាហារលឿនៗ រកតែឆ្ងាញ់ ខ្លាញ់ ផ្អែម ប្រៃ ផ្អាប់ គ្មានគុណប្រយោជន៍ដល់សុខភាពហើយអាចបំផ្លាញ់សុខភាពទៀត។ ទម្លាប់បែបនេះ ងាយធ្វើឱ្យលើសគីឡូ ឬធាត់ជាដើម ដែលបង្កហានិភ័យនៃជំងឺតម្រងនោមផងដែរ។

៤ គេងមិនគ្រប់គ្រាន់៖ មិនមានជារឿងថ្មី តែជាអ្វីដែលមនុស្សភាគច្រើនមិនបានកែឱ្យល្អឡើងវិញ មានទម្លាប់ចូលគេងយប់ជ្រៅ គេងមិនគ្រប់ម៉ោង ជាហេតុបង្កគ្រោះថ្នាក់ដល់សុខភាព។ គួរតែគេងឱ្យបានពី៧ទៅ៨ម៉ោង ដើម្បីថែរក្សាសុខភាពរបស់អ្នក។

៥  ជក់បារី និងទទួលទានស្រា៖ សារធាតុក្នុងបារី ធ្វើឱ្យសរសៃឈាមដំណើរការមិនធម្មតា​ងាយនឹងសម្ពាធឈាមឡើងខ្ពស់ ជាហេតុនាំគ្រោះថ្នាក់ដល់តម្រងនោមផងដែរ។ ជាតិអាល់កុលទៅក្នុងស្រា ក៏បង្កហានិភ័យដល់តម្រងនោមផងដែរ ជាពិសេសបើទទួលទានស្រាលើសពី៤កែវក្នុង១ថ្ងៃ នឹងបង្កើនហានិភ័យនៃជំងឺតម្រងនោមទ្វេរដង រួមទាំងជំងឺថ្លើមផងដែរ។

ស្រឡាញ់តម្រងនោមរបស់អ្នក ស្រឡាញ់ជីវិតរបស់អ្នក គួរតែកាត់បន្ថយឬឈប់ទម្លាប់មិនល្អខាងលើនេះចេញ៕ 

អត្ថបទដោយ​​៖ Senghong